ଦିଗପହଣ୍ଡି, ୬|୬(ଅଶେଷ ନାଥ ମିଶ୍ର) ଗଞ୍ଜାମ ଜିଲା ଦିଗପହଣ୍ଡିର ଜଣାଶୁଣା ଫଟୋ ଏବଂ ଭିଡିଓଗ୍ରାଫର ସ୍ବର୍ଗତ ଓଡ଼ି ପ୍ରଦୀପ କୁମାରଙ୍କ ଦ୍ଵାଦଶାହ ସ୍ମୃତି ସଭା ଅବସରରେ ଏକ ସ୍ବେଚ୍ଛାକୃତ ରକ୍ତଦାନ ଶିବିର ଆୟୋଜନ କରିବା ପାଇଁ ଶନିବାର ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ସ୍ଥାନୀୟ ଏନଏସି କାର୍ଯ୍ଯାଳୟରେ ଅଧ୍ୟକ୍ଷ ପ୍ରଫୁଲ୍ଲ ପଣ୍ଡାଙ୍କ ସଂଯୋଜନାରେ ଅନୁଷ୍ଠିତ ବୈଠକରେ ଆସନ୍ତା ୧୩ ତାରିଖ ସକାଳ ୯ ଟା ରେ ଏନଏସି ସମ୍ମିଳନୀ କକ୍ଷରେ ଶିବିର ଆୟୋଜନ କରାଯିବାକୁ ବୈଠକରେ ନିଷ୍ପତ୍ତି ନିଆ ଯାଇଥିଲା। ଖେମୁଣ୍ଡି ସ୍ବେଚ୍ଛାକୃତ ରକ୍ତଦାତା ସଂଘ ଓ ପ୍ରଦୀପଙ୍କ ପରିବାର ବର୍ଗଙ୍କ ମିଳିତ ଉଦ୍ଯମରେ ଶିବିର ଆୟୋଜନ ହେବାକୁ ଥିବା ବେଳେ ବ୍ରହ୍ମପୁର ବଡ଼ ଡାକ୍ତରଖାନା ରକ୍ତ ଭଣ୍ଡାର ଦ୍ୱାରା ଶିବିର ପରିଚାଳନା କରାଯିବ। ସେହିଭଳି ଦିଗପହଣ୍ଡି ଏନଏସି ପ୍ରଶାସନ ରକ୍ତଦାନ ଶିବିରର ସଫଳ ପରିଚାଳନା ଦିଗରେ ସହଯୋଗ ଯୋଗାଇ ଦେବାକୁ ସମ୍ମତି ପ୍ରଦାନ କରିଥିବା ଜଣାପଡିଛି। ଅନୁଷ୍ଠିତ ଏହି ବୈଠକରେ ରକ୍ତଦାତା ସଂଘ ସଭାପତି ଭି. ଧର୍ମ ରାଜୁ, ସମ୍ପାଦକ ହରପ୍ରସାଦ ରଥ, ପ୍ରାକ୍ତନ ସଭାପତି ତପନ କୁମାର ମିଶ୍ର, ଏନଏସି ଉପାଧ୍ୟକ୍ଷା ଙ୍କ ପ୍ରତିନିଧି କେ. କୁନା, ସାମାଜିକ କର୍ମୀ ଭି. ଶ୍ୟାମ ସୁନ୍ଦର ରାଜୁ, ବସନ୍ତ କୁମାର ପଟ୍ଟନାୟକ, ଶ୍ରୀଧର ମେକାପ, ଆଇନଜୀବୀ ମନୋରଞ୍ଜନ ପଣ୍ଡା, କାଉନସିଲର ସୁଶାନ୍ତ କୁମାର ପାତ୍ର, ନୀଳମାଧବ ଗୌଡ଼, ସୁନିଲ କୁମାର ପଣ୍ଡା ପ୍ରମୁଖ ଉପସ୍ଥିତ ଥିଲେ।
