ସୋନପୁର,୨୧।୪: (ନି.ପ୍ର.) ମହାନଦୀରୁ ମାଛ, ଚିଙ୍ଗୁଡି ଧରିବା ପାଇଁ ଚାଲିଛି ବେଆଇନ ବ୍ଲାଷ୍ଟିଂ ଓ କୀଟନାଶକ ପ୍ରୟୋଗ। ମୁଷ୍ଟିମେୟ ଅଣପାରମ୍ପରିକ ମତ୍ସ୍ୟଜୀବୀ ସୁବିଧାରେ ମାଛ ଧରିବା ପାଇଁ ନଦୀଗର୍ଭରେ ଡିନାମାଇଟ୍ ଫୁଟାଉଛନ୍ତି। ବିସ୍ଫୋରଣ ଯୋଗୁ ମାଛ ମରି ପାଣିରେ ଭାସୁଛନ୍ତି । ସେହିପରି ଚିଙ୍ଗୁଡି ଧରିବା ପାଇଁ ବିଷାକ୍ତ କୀଟନାଶକ ପ୍ରୟୋଗ କରାଯାଉଛି । ଗୁରୁବାର ସୋନପୁର ସହର ନିକଟସ୍ଥ ମହାନଦୀ ଗର୍ଭରେ ଥିବା ଲଙ୍କେଶ୍ୱର ଗଣ୍ଡ ଉପରମୁଣ୍ଡରେ ୧୦ରୁ ୧୨ଜଣ ଲୋକ ମାଛ ମାରିବା ପାଇଁ ବେଆଇନ ଭାବେ ବ୍ଲାଷ୍ଟିଂ କରିଥିଲେ। ଶବ୍ଦ ଶୁଣି ପାରମ୍ପରିକ ମତ୍ସ୍ୟଜୀବୀମାନେ ଘଟଣାସ୍ଥଳକୁ ଯିବା ସହିତ ଏହାର ବିରୋଧ କରିଥିଲେ। ଉଭୟ ଗୋଷ୍ଠୀ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା। କାଉନସିଲର ତଥା ମହାନଦୀ ସୁରକ୍ଷା କମିଟିର ଗଙ୍ଗାଧର ତରିଆ ପୋଲିସକୁ ଖବର ଦେଇଥିଲେ। ତେବେ ସୋନପୁର ପୋଲିସ ଘଟଣାସ୍ଥଳରେ ନ ପହଞ୍ଚତ୍ବାରୁ ବ୍ଲାଷ୍ଟିଂ କରିଥିବା ଲୋକେ ଫେରାର ହୋଇଯାଇଥିଲେ। ମତ୍ସ୍ୟଜୀବୀମାନେ ଘଟଣାସ୍ଥଳରୁ ଅବ୍ୟବହୃତ ବିସ୍ଫୋରକ, ଗଞ୍ଜେଇ ଚିଲମ ଓ ଦିଆସିଲ ଠାବ କରିଥିଲେ। ଘଟଣାକୁ ନେଇ ମହାନଦୀ ସୁରକ୍ଷା କମିଟିର ମତ୍ସ୍ୟଜୀବୀମାନେ ଅସନ୍ତୋଷ ବ୍ୟକ୍ତ କରିଥିଲେ।
ମହାନଦୀରେ ବ୍ଲାଷ୍ଟିଂ କରିବା ଦ୍ୱାରା ମାଛ, ଚିଙ୍ଗୁଡି ମରି ପାଣିରେ ଭାସିବା ପରେ ଅଣପାରମ୍ପରିକ ମତ୍ସ୍ୟଜୀବୀ ଏଗୁଡିକୁ ବଜାରରେ ବିକ୍ରି କରୁଛନ୍ତି। ତେବେ ବ୍ଲାଷ୍ଟିଂ ଓ କୀଟନାଶକ ପ୍ରୟୋଗ ଦ୍ୱାରା ମାଛବଂଶ ଲୋପ ପାଇଯାଉଛନ୍ତି। ମହାନଦୀ କୂଳରେ ବସବାସ କରି ପାରମ୍ପରିକ କୌଶଳରେ ମାଛ ମାରୁଥିବା କୈବର୍ତ୍ତ୍ୟମାନେ ଆଗଭଳି ମାଛ ପାଉନାହାନ୍ତି। ସେମାନଙ୍କ ଜୀବିକା ଏବେ ସଙ୍କଟରେ। ମାଛ ଧରି ଜୀବିକା ନିର୍ବାହ କରୁଥିବା ଶତାଧିକ ମତ୍ସ୍ୟଜୀବୀଙ୍କ ଜାଲ ଓ ଡଙ୍ଗା ଏବେ ଅଦରକାରୀ ହୋଇପଡିଛି। ସୋନପୁର ସହରର ଟିକିରିପଡା, ତଲପଡା, ତରିଆପଡା ଓ ସଡକପଡାରେ ବସବାସ କରୁଥିବା ୧୫୦ମତ୍ସ୍ୟଜୀବୀ ପରିବାର କର୍ମସଂସ୍ଥାନ ହରାଇ ଏବେ ଚିନ୍ତାରେ ଅଛନ୍ତି। ମହାନଦୀରେ ଜଳସ୍ତର ଏବେ କମିଛି। ଏହି ସୁଯୋଗରେ ନଦୀଗର୍ଭରେ ପୁଣି ବ୍ଲାଷ୍ଟିଂ ଓ କୀଟନାଶକ ପ୍ରୟୋଗ ବୃଦ୍ଧି ପାଇଛି। ଏହାକୁ କେନ୍ଦ୍ର କରି ମତ୍ସ୍ୟଜୀବୀଙ୍କ ମନରେ ଅସନ୍ତୋଷ ପ୍ରକାଶ ପାଇଛି। ପାରମ୍ପରିକ ମତ୍ସ୍ୟଜୀବୀଙ୍କ ଦ୍ୱାରା ଗଠିତ ମହାନଦୀ ସୁରକ୍ଷା କମିଟିର ଋଷଭ ବୁଡେକ, ସୁରୁବାବୁ ସାହୁ, ବେଲାରସେନ ନାଏକ ଓ ମୁନା ପାଣ୍ଡେ ପ୍ରମୁଖ ଏଭଳି ବେଆଇନ୍ ଭାବେ ମାଛ ମାରିବାକୁ ବିରୋଧ କରିଛନ୍ତି। ପ୍ରଶାସନ ଏ ଦିଗରେ ଉଚିତ ପଦକ୍ଷେପ ଗ୍ରହଣ ନ କଲେ ଆନ୍ଦୋଳନ ଜୋରଦାର ହେବ ବୋଲି ମତ୍ସ୍ୟଜୀବୀଙ୍କ ପକ୍ଷରୁ ଚେତାବନୀ ଦିଆଯାଇଛି ।
