ନୂଆଦିଲ୍ଲୀ,୩୦।୭: କରୋନା ଯୋଗୁ ଭାରତୀୟ ବଜାର କ୍ଷତିଗ୍ରସ୍ତ ହୋଇଛି। ନିଯୁକ୍ତି ଉପରେ ଏହା ପ୍ରତ୍ୟକ୍ଷ ଭାବେ ପ୍ରଭାବ ପକାଇଛି। ସାଧାରଣତଃ ଦେଶର ସଙ୍ଗଠିତ କ୍ଷେତ୍ରରେ ବହୁ କମ୍ ଲୋକ କାମ କରିଥାନ୍ତି। ଅଣସଙ୍ଗଠିତ କ୍ଷେତ୍ର ଅନେକ ଲୋକଙ୍କୁ କାମ କରିବାର ସୁଯୋଗ ପ୍ରଦାନ କରୁଥିବା ବେଳେ ଅର୍ଥ ବ୍ୟବସ୍ଥାକୁ ଏହି କ୍ଷେତ୍ରର ଯୋଗଦାନ ଗୁରୁତ୍ୱପୂର୍ଣ୍ଣ ରହିଛି। ଦେଶର ଅଣୁ କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ)ଗୁଡ଼ିକରେ ଉଭୟ ସଙ୍ଗଠିତ ଏବଂ ଅଣସଙ୍ଗଠିତ ଉଭୟ ଶ୍ରମଶକ୍ତିକୁ ନିଯୁକ୍ତି ପ୍ରଦାନ କରିଥାଏ। ଏହି କ୍ଷେତ୍ର ବର୍ତ୍ତମାନ ସଙ୍କଟ ସ୍ଥିତି ଦେଇ ଗତି କରୁଛି। ଏହି କ୍ଷେତ୍ରରେ କାମ କରୁଥିବା ୧୦୦ ନିୟୁତ ବା ୧୦ କୋଟି ନିଯୁକ୍ତି ଉପରେ ବର୍ତ୍ତମାନ କଳାବାଦଲ ଛାଇ ହୋଇ ରହିଛି। ଉକ୍ତ କ୍ଷେତ୍ରକୁ ସମୟ ପୂର୍ବରୁ ବଞ୍ଚାଇବା ଲାଗି ସରକାର ହସ୍ତକ୍ଷେପ କରିବାର ଆବଶ୍ୟକତା ରହିଛି ବୋଲି ଏମ୍ଏସ୍ଏମ୍ଇ ମନ୍ତ୍ରଣାଳୟର ଜଣେ ବରିଷ୍ଠ ଅଧିକାରୀ ବାଣିଜ୍ୟ ସଂକ୍ରାନ୍ତ ପାର୍ଲାମେଣ୍ଟର ଷ୍ଟାଣ୍ଡିଂ କମିଟି ସାମ୍ନାରେ ପ୍ରେଜେଣ୍ଟେଶନ ରଖିଛନ୍ତି।
ଅଧିକାରୀ ଜଣକ କହିଛନ୍ତି, କରୋନା ଯୋଗୁ ଟ୍ରାଭେଲ ଏବଂ ଟୁରିଜମ୍ ଶିଳ୍ପ ଉପରେ ସଙ୍କଟ ସ୍ଥିତି ଉପୁଜିଛି। ଏହି କ୍ଷେତ୍ରରେ କାମ କରୁଥିବା ଲକ୍ଷ ଲକ୍ଷ ଲୋକଙ୍କ ଚାକିରି ଚାଲିଯାଇଛି। ଏମ୍ଏସ୍ଏମ୍ଇଗୁଡ଼ିକୁ ଟ୍ରାକ୍କୁ ଫେରାଇ ଆଣିବା ଲାଗି ଅଧିକାରୀ ମାନେ ସରକାରଙ୍କୁ କେତେକ ପ୍ରସ୍ତାବ ଦେଇଛନ୍ତି। ପେମେଣ୍ଟ ନିୟମକୁ ସରଳ କରିବା, ଇଣ୍ଟରେଷ୍ଟ ଏବଂ ପ୍ରିମିୟମ ପେମେଣ୍ଟକୁ ଗୋଟିଏ ବର୍ଷ ଲାଗି ଟାଳିବା, ବାତିଲ ହୋଇଥିବା ଟୁର୍ ପ୍ରୋଗ୍ରାମ ଉପରେ ଜିଏସ୍ଟି ଫେରସ୍ତ ଭଳି ଅନ୍ୟ ପଦକ୍ଷେପ ସରକାର ହାତକୁ ନିଅନ୍ତୁ ବୋଲି ପ୍ରସ୍ତାବରେ କୁହାଯାଇଛି। ଏମ୍ଏସ୍ଏମ୍ଇଗୁଡିକୁ ସହାୟତା କରିବା ଲାଗି ସରକାର ଆତ୍ମନିର୍ଭର ଭାରତ ପ୍ୟାକେଜରେ ୩ ଲକ୍ଷ କୋଟି ଟଙ୍କାର ଋଣ ସହାୟତା ଘୋଷଣା କରିଛନ୍ତି।
ଅଧିକାରୀ ପୁଣି କହିଛନ୍ତି ଯେ, ଦେଶର ଦେଖାଯାଇଥିବା ମୋଟ କରୋନା ମାମଲା ମଧ୍ୟରୁ ୫୦% ସଂକ୍ରମଣ ୭୨% ଶିଳ୍ପ ଉତ୍ପାଦନ ହେଉଥିବା ସ୍ଥାନଗୁଡିକରେ ଦେଖାଯାଉଛି। ଫଳରେ ଶିଳ୍ପ ଉତ୍ପାଦନ ଉପରେ ଏହାର ପ୍ରତ୍ୟକ୍ଷ ପ୍ରଭାବ ପଡିଛି। କରୋନା ପୂର୍ବରୁ ଭାରତୀୟ ଅର୍ଥ ବ୍ୟବସ୍ଥା ମାନ୍ଦାବସ୍ଥା ସହ ଜୁଝୁଛି। ବହୁ ପୂର୍ବରୁ ଜିଡିପିରେ ହ୍ରାସ ହେଉଥିବା ଦେଖାଯାଇଛି। ଆମେରିକା, ଚାଇନା ଏବଂ ୟୁରୋପରେ ବାଣିଜ୍ୟ ଆଧାରରେ ଭାରତୀୟ ଅର୍ଥ ବ୍ୟବସ୍ଥାରେ ନିବେଶ ନିର୍ଭର କରୁଛି। ଏକ ଗଣମାଧ୍ୟମ ରିପୋର୍ଟ ଅନୁସାରେ ସଂସଦୀୟ କମିଟିକୁ କୁହାଯାଇଛି ଯେ, ଗତ କିଛି ତ୍ରୈମାସ ଧରି ଭାରତୀୟ ଅର୍ଥ ବ୍ୟବସ୍ଥାରେ ଲଗାତର ହ୍ରାସ ଦେଖାଯାଉଛି। କରୋନା ପୂର୍ବ ସମୟରେ ମଧ୍ୟ ମାନ୍ଦାବସ୍ଥା ସମ୍ପର୍କରେ ଜୋର୍ଦାର ଚର୍ଚ୍ଚା ଆରମ୍ଭ ହୋଇଥିଲା। କରୋନା ଯୋଗୁ ଅର୍ଥ ବ୍ୟବସ୍ଥା ଅକଳରେ ପଡ଼ିଯାଇଛି। ଯେତେ ଶୀଘ୍ର ଏହି ରୋଗର ଟିକା ଆସିବ ସଂକ୍ରମଣକୁ ରୋକିବା ଦିଗରେ ଏହା ସହାୟକ ହୋଇପାରିବ ବୋଲି ବଜାର ବିଶେଷଜ୍ଞ ମତ ପ୍ରକାଶ କରିଛନ୍ତି।
