ରିଷିଡା, ୨୦।୬ (ସୁଶାନ୍ତ ମଲ୍ଲିକ): ଏକ ଠିକା କାମକୁ କେନ୍ଦ୍ର କରି ହୋଇଥିବା ଗଣ୍ଡଗୋଳ ଓ ମାଡ଼ପିଟ ଘଟଣାରେ ଜଣେ ଭାଜପା କର୍ମୀ ଜେଲ ଯିବା ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଘଟଣାଟି ଏମ୍. ରାମପୁର ଥାନା ଅନ୍ତର୍ଗତ ରିଷିଡା ଫାଣ୍ଡି ଅଧୀନସ୍ଥ ଗୋଚ୍ଛାଡେଙ୍ଗେନ ପଞ୍ଚାୟତର କନ୍ଧକୁନ୍ଦେଇପାଲି ଗ୍ରାମରେ ଘଟିଥିବା ଜଣାପଡ଼ିଛି।
ପୋଲିସ ସୂଚନା ଅନୁଯାୟୀ, କନ୍ଧକୁନ୍ଦେଇପାଲି ଗ୍ରାମରେ ବନ ବିଭାଗ ପକ୍ଷରୁ ଏକ ଗୃହ ନିର୍ମାଣ ପାଇଁ ଅନୁଦାନ ଆସିଥିଲା। ଏହି ଗୃହ ନିର୍ମାଣ କାମ ପାଇଁ ପ୍ରଥମେ ବଡସୁର୍ଡା ଗ୍ରାମର ଭାଜପା କର୍ମୀ ଯୁଧିଷ୍ଠିର ବେହେରାଙ୍କୁ କୁହାଯାଇଥିଲା। କିନ୍ତୁ ପରବର୍ତ୍ତୀ ସମୟରେ କନ୍ଧକୁନ୍ଦେଇପାଲି ଶିବମନ୍ଦିର କମିଟିର କର୍ମକର୍ତ୍ତା ତଥା ତାଳକୁନା ଗ୍ରାମର କ୍ଷେତ୍ରମୋହନ ପଧାନଙ୍କ ହସ୍ତକ୍ଷେପ ଯୋଗୁ ତାଙ୍କୁ କାମରୁ ବଞ୍ଚିତ କରାଯାଇଥିବା ମନେ କରି ଯୁଧିଷ୍ଠିର ପୂର୍ବରୁ କ୍ଷେତ୍ରମୋହନଙ୍କୁ ଧମକ ଦେଇଥିବା ଅଭିଯୋଗ ହୋଇଛି।
ଶୁକ୍ରବାର କନ୍ଧକୁନ୍ଦେଇପାଲି ଗ୍ରାମରେ କ୍ଷେତ୍ରମୋହନ ପଧାନ ସ୍ଥାନୀୟ ୱାର୍ଡ ସଦସ୍ୟଙ୍କ ସହ ଆଲୋଚନା କରୁଥିବା ବେଳେ ଯୁଧିଷ୍ଠିର ସେଠାରେ ପହଞ୍ଚି ତାଙ୍କ ସହ ଝଗଡ଼ା କରିଥିଲେ। ପରେ ଏକ ଲୁହା ବାଲ୍ଟିରେ ଆକ୍ରମଣ କରି କ୍ଷେତ୍ରମୋହନଙ୍କ ମୁଣ୍ଡ ଫଟାଇ ଦେଇଥିବା ନେଇ ରିଷିଡା ଫାଣ୍ଡିରେ ଅଭିଯୋଗ ହୋଇଥିଲା।
ଅନ୍ୟପକ୍ଷରେ, ସେହି ଗ୍ରାମର ପୁଷ୍ପା ମାଝୀ ନାମକ ଜଣେ ମହିଳା ମଧ୍ୟ ଯୁଧିଷ୍ଠିର ବେହେରାଙ୍କ ବିରୋଧରେ ଗାଳିଗୁଲଜ, ଟଣାଓଟରା ଓ ଧମକଚମକ ଦେଇଥିବା ନେଇ ଫାଣ୍ଡିରେ ଅଭିଯୋଗ କରିଥିଲେ।
ଏହି ଘଟଣାକୁ ନେଇ କେସିଙ୍ଗା ଏସ୍ଡିପିଓ ସନ୍ଦୀପ ମାଝୀଙ୍କ ତତ୍ତ୍ୱାବଧାନରେ ଏମ୍. ରାମପୁର ଥାନାଧିକାରୀ ସଂଯୁକ୍ତା ପଧାନଙ୍କ ନେତୃତ୍ୱରେ ରିଷିଡା ଫାଣ୍ଡି ଅଧିକାରୀ ମନୁ ଆ ବିଡିକା ଅଭିଯୁକ୍ତ ଯୁଧିଷ୍ଠିର ବେହେରାଙ୍କୁ ଗିରଫ କରିଥିଲେ। ପରେ ଯୁଧିଷ୍ଠିର ମଧ୍ୟ କ୍ଷେତ୍ରମୋହନ ପଧାନଙ୍କ ନାମରେ ପାଲଟା ଏତଲା ଦାଖଲ କରିଥିଲେ।
ଏନେଇ ଏମ୍. ରାମପୁର ଥାନାରେ କେସ୍ ନମ୍ବର ୧୫୦/୨୬, ୧୫୧/୨୬ ଏବଂ ୧୫୨/୨୬ ରେ ତିନୋଟି ପୃଥକ ମାମଲା ରୁଜୁ କରାଯାଇଛି। ଯୁଧିଷ୍ଠିର ବେହେରାଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ତାଙ୍କ ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ ହାଜତକୁ ପଠାଇ ଦିଆଯାଇଥିବା ଜଣାପଡ଼ିଛି। ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି।
