ସମ୍ବଲପୁର,୩।୫(ବ୍ୟୁରୋ): ସମ୍ବଲପୁରରେ ହନୁମାନ ଜୟନ୍ତୀ ଶୋଭାଯାତ୍ରା ସମୟରେ ଘଟିଥିବା ହିଂସା ଘଟଣା ଦୁର୍ଭାଗ୍ୟଜନକ। ଏହା ସମସ୍ତଙ୍କୁ ବ୍ୟଥିତ କରିଥିଲା। ପୋଲିସ ଓ ଜିଲା ପ୍ରଶାସନ ସହିତ ଜନସାଧାରଣଙ୍କ ସହଯୋଗରେ ସହରରେ ଶାନ୍ତି ଫେରିଆସିଛି। ଏହି ଘଟଣାରେ ପୋଲିସ ଅନେକଙ୍କୁ ଗିରଫ କରି ଜେଲ ହାଜତକୁ ପଠାଇଛି। ହେଲେ ଭାଜପା ଫ୍ୟାକ୍ଟ ଫାଇଣ୍ଡିଂ ଟିମ୍ ପଠାଇ ହୀନ ରାଜନୀତି କରୁଛି। ଯଦି ସମ୍ବଲପୁରରେ ଫୁଣି ବିଶୃଙ୍ଖଳା ସୃଷ୍ଟି ହୁଏ ତା’ହେଲେ ରାଜ୍ୟ ଭାଜପା ଦାୟୀ ରହିବ ବୋଲି ଓଡ଼ିଶା ସାଂସ୍କୃତିକ ସମାଜ ଭବନରେ ମଙ୍ଗଳବାର ଆୟୋଜିତ ଖବରଦାତା ସମ୍ମିଳନୀରେ ବିଜେଡି ରାଜ୍ୟ ମହିଳା ସଭାପତି ତଥା ଅତାବିରା ବିଧାୟିକା ସ୍ନେହାଙ୍ଗିନୀ ଛୁରିଆ କହିଛନ୍ତି।
ସେ ଆହୁରି କହିଛନ୍ତି, ସମ୍ବଲପୁର ଶାନ୍ତି ଓ ଭାଇଚାରାର ସହର। ଅପ୍ରୀତିକର ଘଟଣା ପରେ ସବୁ ଧର୍ମର ପ୍ରୟାସ ଯୋଗୁ ଶାନ୍ତି ଫେରିଆସୁଛି। ଏହାକୁ ଆୟୁଧ ଭାବେ ଭାଜପା ଫ୍ୟାକ୍ଟ ଫାଇଣ୍ଡିଂ ଟିମ୍କୁ ବ୍ୟବହାର କରୁଛି। କୋର୍ଟ, ତଦନ୍ତକାରୀ ସଂସ୍ଥା, ମାନବାଧିକାର କମିଶନ, ଏସ୍ଟି କମିଶନ ଉପରେ ସେମାନଙ୍କ ଭରସା ନାହିଁ ବୋଲି ଭାଜପା ପ୍ରମାଣ କରୁଛି। ଅପରପକ୍ଷେ ଦେଶର ଭାଜପା ଶାସିତ ରାଜ୍ୟଗୁଡିକରେ ନିୟମିତ ଭାବେ ଅଘଟଣ ଘଟୁଛି। କିନ୍ତୁ ସେଠାକୁ ଭାଜପାର ଫ୍ୟାକ୍ଟ ଫାଇଣ୍ଡିଂ ଟିମ୍ ଯାଉନାହିଁ। ଭାଜପାକୁ ଓଡ଼ିଶାବାସୀ ଉଚିତ୍ ଜବାବ ଦେଉଛନ୍ତି ଓ ଆଗକୁ ମଧ୍ୟ ଦେବେ ବୋଲି ନେତାମାନେ କହିଥିଲେ। ଖବରଦାତା ସମ୍ମିଳନୀରେ ପୂର୍ବତନ ବିଧାୟିକା ଡାକ୍ତର ରାସେଶ୍ୱରୀ ପାଣିଗ୍ରାହୀ, ଜିଲା ବିଜେଡି ସଭାପତି ସିଦ୍ଧାର୍ଥ ଦାସ, ବରିଷ୍ଠ ନେତା ନଳିନୀ କାନ୍ତ ପ୍ରଧାନ, ଜିଲା ପରିଷଦ ସଭାପତି କୁମୁଦିନୀ ନାଏକ, ମୁଖପାତ୍ର ସଞ୍ଜୟ ବାବୁ ପ୍ରମୁଖ ଉପସ୍ଥିତ ଥିଲେ। ବିଧାୟିକା ସ୍ନେହାଙ୍ଗିନୀ ବକ୍ତବ୍ୟ ଦେବା ପରେ ଖବରଦାତାମାନେ ତାଙ୍କୁ ବିଭିନ୍ନ ପ୍ରଶ୍ନ କରିଥିଲେ। ପୋଲିସ ଓ ପ୍ରଶାସନକୁ ସୁରକ୍ଷା ଦେବାକୁ ବିଜେଡି ଏଭଳି କରୁଛି କି, ପୋଲିସର ତ୍ରୁଟିପୂର୍ଣ୍ଣ ପରିଚାଳନା ପାଇଁ ଦାୟୀ କିଏ, ଆହତ ବିଶ୍ୱନାଥ ଶିଖା ଓ ମୃତ ଚନ୍ଦ୍ରଶେଖର ମିର୍ଦ୍ଧାଙ୍କ ପରିବାର ବର୍ଗଙ୍କୁ ପ୍ରଶାସନ ଓ ବିଜେଡି କର୍ମୀ ନିଜ ଅଧୀନରେ ରଖିବାକୁ ଯୋଜନା କରୁଛନ୍ତି ଭଲି ପ୍ରଶ୍ନ ପଚାରିଥିଲେ। ହେଲେ ବିଧାୟିକା ଛୁରିଆ ପ୍ରଶ୍ନର ଉତ୍ତର ନ ଦେଇ ଏଡାଇ ଚାଲିଯାଇଥିଲେ।
