କେନ୍ଦୁଝର,୧୫ା୧୦(ସ୍ବ.ପ୍ର.): କେନ୍ଦୁଝର ଜିଲା ଘଷିପୁରା ବ୍ଲକ୍ ରାମଚନ୍ଦ୍ରପୁର ଥାନା ଅଞ୍ଚଳର ଜଣେ ମହିଳାଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଦେବାକୁ କହି ପଞ୍ଚାୟତ କାର୍ଯ୍ୟାଳୟରେ ଅସଦାଚରଣ ଅଭିଯୋଗ ହୋଇଥିଲା। ଘଟଣାକୁ ନେଇ ଭାଜପା ନଦୀ ସୁରକ୍ଷା ସମିତି (ନମାମି ଗଙ୍ଗେ)ପକ୍ଷରୁ ରାଜ୍ୟ ସଭାପତି ମହେଶ୍ୱର ସାହୁଙ୍କ ନେତୃତ୍ୱରେ ଏକ ଟିମ୍ ଶୁକ୍ରବାର କେନ୍ଦୁଝର ଏସ୍ପି ମିତ୍ରଭାନୁ ମହାପାତ୍ରଙ୍କୁ ସାକ୍ଷାତ କରି ଦାବିପତ୍ର ପ୍ରଦାନ କରିଛିି।
ସୂଚନା ମୁତାବକ, ଗତ ୬ରେ ଜଣେ ବ୍ୟକ୍ତି ଆଧାରକାର୍ଡ ଓ ରାଶନକାର୍ଡ ସାଙ୍ଗରେ ଧରି ପଞ୍ଚାୟତ ଅଫିସକୁ ଉକ୍ତ ଦଳିତ ମହିଳାଙ୍କୁ ଏକୁଟିଆ ଡାକିଥିଲେ। ଅଫିସ୍ରେ ପହଞ୍ଚତ୍ବା ପରେ ସେଠାରେ ଥିବା ସରପଞ୍ଚଙ୍କ ସ୍ବାମୀ ନିଶାସକ୍ତ ଅବସ୍ଥାରେ ତାଙ୍କୁ ଏକ ରୁମ୍କୁ ଡାକି ନେଇଥିଲେ। ସେଠାରେ କବାଟ ବନ୍ଦ କରି ତାଙ୍କୁ ଅସଦାଚରଣ କରିଥିଲେ। ମହିଳା କୌଶଳକ୍ରମେ ସେଠାରୁ ଖସି ଆସି ଘଟଣା ସଂକ୍ରାନ୍ତରେ ସ୍ବାମୀଙ୍କୁ ଜଣାଇଥିଲେ। ପରେ ମହିଳା ଓ ତାଙ୍କ ସ୍ବାମୀ ରାମଚନ୍ଦ୍ରପୁର ଥାନାରେ ଏତଲା ଦେଇଥିଲେ। ତେବେ ପୋଲିସ ଏତଲା ଗ୍ରହଣ କରିବା ପରିବର୍ତ୍ତେ ଗାଳିଗୁଲଜ କରିଥିବା ପୀଡ଼ିତା କହିଛନ୍ତି। ପରେ ପୋଲିସ ସେମାନଙ୍କଠାରୁ ଆଉ ଏକ ଏତଲା ଲେଖାଇଥିଲା। ଏତଲା ଅନୁଯାୟୀ ପୋଲିସ ନଂ. ୨୨୯/ ୨୦୨୨ ଓ ଦଫା ୩୪୧, ୩୫୪(ଏ) ରେ ଏକ ମାମଲା ରୁଜୁ କରିଥିଲା। ତେବେ ଅଭିଯୁକ୍ତଙ୍କୁ ଅଦ୍ୟାବଧି ଗିରଫ କରାଯାଇ ନାହିଁ। ଅଭିଯୁକ୍ତ ଶାସକ ଦଳର ହୋଇଥିବାରୁ ବଜାରରେ ବୁଲି ଧମକ ଦେଉଥିବାରୁ ପୀଡ଼ିତା ଓ ତାଙ୍କ ସ୍ବାମୀ ଭୟଭୀତ ଅବସ୍ଥାରେ ରହୁଛନ୍ତି। ସମ୍ପୃକ୍ତ ଅଭିଯୁକ୍ତଙ୍କୁ ତୁରନ୍ତ ଗିରଫ କରିବାକୁ ଦାବି କରିଛନ୍ତି। ନଚେତ୍ ଭାଜପା ପକ୍ଷରୁ ଆନ୍ଦୋଳନ ହେବ ବୋଲି ଚେତାବନୀ ଦେଇଛନ୍ତି।
