ନୂଆଦିଲ୍ଲୀ,୨।୪ : ଭାରତୀୟ ଜନତା ପାର୍ଟି ରବିବାର କଂଗ୍ରେସ ଫାଇଲ୍ସ ଶୀର୍ଷକ ଏକ ସିରିଜ ଆରମ୍ଭ କରି କଂଗ୍ରେସ ବିରୋଧରେ ଦୁର୍ନୀତି ଅଭିଯୋଗ କରିଛି। ଏହି ଭିଡିଓ ସିରିଜରେ କଂଗ୍ରେସ ବିରୋଧରେ ଅନେକ ଗୁରୁତର ଅଭିଯୋଗ ଅଣାଯାଇଛି। ପ୍ରଥମ ସିରିଜରେ ଭାଜପା କଂଗ୍ରେସ ସରକାର ସମୟରେ ହୋଇଥିବା ଦୁର୍ନୀତି ବିଷୟରେ ଉଲ୍ଲେଖ କରିଛି। ଅଭିଯୋଗ ହୋଇଛି ଯେ ୟୁପିଏ ସରକାର ସମୟରେ ୪୮,୨୦,୬୯,୦୦,୦୦,୦୦୦ଟଙ୍କାର ଦୁର୍ନୀତି ହୋଇଛି।
ଭିଡିଓରେ କୁହାଯାଇଛି ଯେ କଂଗ୍ରେସ ଏସବୁ ଟଙ୍କା ଲୁଟି ନେଇଛି। ଏଥିରେ କୋଇଲା ଠାରୁ ଆରମ୍ଭ କରି ୨-ଜି ଏବଂ କମନୱେଲଥ ସ୍କାମର ଉଲ୍ଲେଖ କରାଯାଇଛି। ଏହି ଲୁଟ ଟଙ୍କାରେ ଦେଶର ବହୁ ପ୍ରଗତି କାର୍ଯ୍ୟ ହୋଇପାରିଥାନ୍ତା।
ଏହି ଟଙ୍କାରେ, ୨୪ ଆଇଏନଏସ ବିକ୍ରାନ୍ତ, ୩୦୦ ରାଫାଲ ବିିମାନ ଏବଂ ୧୦୦୦ ମଙ୍ଗଳ ମିଶନ ନିର୍ମାଣ କିମ୍ବା କ୍ରୟ କରାଯାଇପାରିଥାନ୍ତା। କଂଗ୍ରେସର ଘୋଟାଲା ଏବଂ ଦୁର୍ନୀତିର ମୂଲ୍ୟ ଦେବାକୁ ପଡିବ ବୋଲି ଭାଜପାକହିଛି ଏବଂ କଂଗ୍ରେସ ଯୋଗୁଁ ଆମ ଦେଶ ପ୍ରଗତି ତଥା ବିକାଶ ପଥରେ ପଛରେ ପଡିଛି।
କଂଗ୍ରେସ ସରକାରଙ୍କ ୧୦ ବର୍ଷ ବିଷୟରେ ଭାଜପା ଆଲୋଚନା କରିଛି। ଏଥିରେ ଅଗଷ୍ଟା ୱେଷ୍ଟଲ୍ୟାଣ୍ଡର ସିଇଓ ଲାଞ୍ଚ ପ୍ରଦାନ କରିଥିବା ଅଭିଯୋଗ ହୋଇଥିଲା। ଭିଭିଆଇପି ହେଲିକପ୍ଟର କ୍ରୟରେ ୩୫୦ କୋଟି ଲାଞ୍ଚ ଅଭିଯୋଗ ହୋଇଛି। ଏହା ବ୍ୟତୀତ ଏକ ଲକ୍ଷ ୮୬ ହଜାର କୋଟି ମୂଲ୍ୟର କୋଇଲା ସ୍କାମ, ଏକ କୋଟି ୭୬ ଲକ୍ଷ କୋଟି ମୂଲ୍ୟର ୨-ଜି ସ୍ପେକ୍ଟ୍ରମ ସ୍କାମ ବିଷୟରେ ମଧ୍ୟ ଉଲ୍ଲେଖ କରାଯାଇଛି।
ଏଥି ସହିତ ପ୍ରାୟ ୧୦ ହଜାର କୋଟିର ମନରେଗା ସ୍କାମ, ୭୦ ହଜାର କୋଟିର କମନୱେଲଥ ସ୍କାମ ଏବଂ ଇଟାଲୀରୁ ହେଲିକପ୍ଟର କାରବାରରେ ୩୬୨ କୋଟି ଲାଞ୍ଚ ସମ୍ପର୍କରେ ଉଲ୍ଲେଖ କରାଯାଇଛି। ଭାଜପା କହିଛି ଯେ କଂଗ୍ରେସ ସରକାର ଦୁର୍ନୀତି ସରକାରରେ ପରିଣତ ହୋଇଥିଲେ କିନ୍ତୁ ମନମୋହନ ସିଂ ଚୁପ ରହିଥିଲେ।
ଭିଡିଓ ଶେଷରେ କୁହାଯାଇଛି, ଏହା କେବଳ କଂଗ୍ରେସ ସ୍କାମର ଏକ ଝଲକ, ପୂରା ଫିଲ୍ମ ବାକି ରହିଛି। କଂଗ୍ରେସ ଅର୍ଥ ଦୁର୍ନୀତିର ପରବର୍ତ୍ତୀ ଏପିସୋଡରେ ଦେଖନ୍ତୁ, ପେଟିଂର ମୂଲ୍ୟ ୨ କୋଟି ଟଙ୍କା ଥିଲା। ସେହି ଦୁଇ କୋଟି ପାଇଁ ଗାନ୍ଧୀ ପରିବାର ମଧ୍ୟ ଧମକ ଦେଉଥିଲେ।
