ସମ୍ବଲପୁର, ୮।୫ (ପ୍ରମୋଦ ବହିଦାର):ବିଜେଡି ସାଙ୍ଗଠନିକ ସମ୍ପାଦକ ତଥା ଦଳର ସମ୍ବଲପୁର ଲୋକ ସଭା ପ୍ରାର୍ଥୀ ପ୍ରଣବ ପ୍ରକାଶ ଦାସଙ୍କ ଶିକ୍ଷାଗତ ଯୋଗ୍ୟତାକୁ ନେଇ ପ୍ରଶ୍ନ ଉଠାଇଛି ଭାଜପା। ନାମାଙ୍କନ ସତ୍ୟପାଠରେ ପ୍ରଣବ ଉଲ୍ଲେଖ କରିଥିବା ଶିକ୍ଷାଗତ ଯୋଗ୍ୟତା ସମ୍ପର୍କିତ ତଥ୍ୟ ଭୁଲ୍। ତେଣୁ ତାଙ୍କ ନାମାଙ୍କନକୁ ରଦ୍ଦ କରିବା ପାଇଁ ମଙ୍ଗଳବାର ଭାଜପା ପକ୍ଷରୁ ଜିଲା ନିର୍ବାଚନ ଅଧିକାରୀ ତଥା ଜିଲାପାଳଙ୍କ ନିକଟରେ ବିଧିବଦ୍ଧଭାବେ ଅଭିଯୋଗ କରାଯାଇଛି। ଭାଜପାର ନିର୍ବାଚନ ଏଜେଣ୍ଟ ଆଇନଜୀବୀ ପ୍ରଦୀପ ବହିଦାର ବିଜେଡି ଲୋକ ସଭା ପ୍ରାର୍ଥୀ ପ୍ରଣବ ୩ଟି ଗ୍ରାଉଣ୍ଡରେ ମିଥ୍ୟା ସତ୍ୟପାଠ ଦାଖଲ କରିଛନ୍ତି ବୋଲି ଅଭିଯୋଗରେ ଦର୍ଶାଇଛନ୍ତି।
ସେହିପରି ଭାଜପା ନେତା ତଥା ବରିଷ୍ଠ ଆଇନଜୀବୀ ପୀତାମ୍ବର ଆଚାର୍ଯ୍ୟ ସମ୍ବଲପୁରରେ ଆୟୋଜିତ ଖବରଦାତା ସମ୍ମିଳନୀରେ ଏହି ପ୍ରସଙ୍ଗରେ ତୁଳନାତ୍ମକ ତଥ୍ୟ ଦେଇ ବିଜେଡିକୁ ଘେରିବାକୁ ଚେଷ୍ଟା କରିଛନ୍ତି। ପ୍ରଣବଙ୍କ ଶିକ୍ଷାଗତ ଯୋଗ୍ୟତା ସମ୍ପର୍କରେ ତଥ୍ୟ ୨୦୦୯ ନିର୍ବାଚନ ସମୟରେ ଯୁକ୍ତ ୨ କଳା ପାସ୍ ବୋଲି ସତ୍ୟପାଠରେ ଉଲ୍ଲେଖ ଥିବା ବେଳେ ୨୦୨୪ରେ ସେ ଯୁକ୍ତ ୨ ବିଜ୍ଞାନରେ ପାସ୍ କରିଥିବା ସେ ଦର୍ଶାଇଛନ୍ତି। ସେହିପରି ପ୍ରଣବ ନିଜର ସ୍ଥାବର ଓ ଅସ୍ଥାବର ସମ୍ପତ୍ତି ବାବଦରେ ସମ୍ପୂର୍ଣ୍ଣ ତଥ୍ୟ ଦେଇନାହାନ୍ତି। ବିଧାୟକ ଭାବେ ଦରମା ଓ ଅନ୍ୟାନ୍ୟ ଭତ୍ତା ପାଉଥିବା ବେଳେ ୨୦୧୯-୨୦ ଆର୍ଥତ୍କ ବର୍ଷ ପାଇଁ ସେ ନିଜର ଆୟ ଶୂନ୍ୟ ବୋଲି ଦର୍ଶାଇଥିବା ନେଇ ଆଇନଜୀବୀ ଆଚାର୍ଯ୍ୟ ଅଭିଯୋଗ କରିଛନ୍ତି। ସତ୍ୟପାଠରେ ୫ ବର୍ଷର ଆୟ ବଦଳରେ ୪ବର୍ଷର ଦର୍ଶାଇ ଗୋଟିଏ ବର୍ଷର ଆୟ ଲୁଚାଇଥିବା ସେ କହିଛନ୍ତି। ଏହି ଆଧାରରେ ସୁପ୍ରିମକୋର୍ଟ ଏବଂ ହାଇକୋର୍ଟ ଅନେକ ନିର୍ବାଚିତ ବିଧାୟକ ଓ ଏମ୍ପିଙ୍କ ନିର୍ବାଚନକୁ ଖାରଜ କରିଛନ୍ତି। ସ୍ବଭାବ କବି ଗଙ୍ଗାଧର ମେହେର ଏବଂ ଗୁରୁ ସତ୍ୟନାରାୟଣ ବହିଦାରଙ୍କ ପରି ସଂସ୍କୃତିସମ୍ପନ୍ନ ମାଟିରେ ନିଜର ଶିକ୍ଷାଗତ ଯୋଗ୍ୟତା ଓ ଆୟକୁ ଲୁଚାଇବା ଘଟଣା ସମ୍ବଲପୁରବାସୀଙ୍କ ପ୍ରତି ଅପମାନ ବୋଲି ଆଚାର୍ଯ୍ୟ କହିଛନ୍ତି।
ପୀତାମ୍ବର ଆଚାର୍ଯ୍ୟଙ୍କ ଅଭିଯୋଗର ପ୍ରତିକ୍ରିୟା ରଖିଛନ୍ତି ବିଜେଡି ମୁଖପାତ୍ର ଡ. ଲେନିନ୍ ମହାନ୍ତି। ପ୍ରଣବଙ୍କ ସାର୍ଟିଫିକେଟ ଏବଂ ଜିରୋ ଆଇଟି ରିଟର୍ନ ସମ୍ପର୍କରେ ତଥ୍ୟ ରଖି ପୀତାମ୍ବର ଦେଖାଇଥିବା ପ୍ରଣବଙ୍କ ସାର୍ଟିଫିକେଟ ଟାମ୍ପରିଂ ହୋଇଥିବା ଡ. ମହାନ୍ତି କହିଛନ୍ତି। ୧୯୯୧ରେ ପ୍ରଣବ ପ୍ରକାଶ ଯୁକ୍ତ ୨ ବିଜ୍ଞାନରେ ପାସ୍ ହୋଇଥିବା ସାର୍ଟିଫିକେଟ ଦେଖାଇଥିଲେ ଲେନିନ୍। ପ୍ରଣବ କୋଭିଡ୍ ସମୟରେ ସବୁ ରୋଜଗାର ସିଏମ୍ ଫଣ୍ଡକୁ ଦେଇଛନ୍ତି। ସେଥିପାଇଁ ତାଙ୍କର ଆଇଟି ରିଟର୍ନ ଜିରୋ ହୋଇଛି ବୋଲି ଲେଲିନ୍ କହିଛନ୍ତି।
