ଅନୁଗୋଳ,୨୯ା୩(ଅମିତ କୁମାର ସାମଲ): ବିଜେଡି-ଭାଜପା ମଧ୍ୟରେ ମେଣ୍ଟ ହେବ ବୋଲି ପ୍ରଥମେ ଶୁଣାଗଲା। ଏହାକୁ ନେଇ ଉଭୟ ଦଳ ପକ୍ଷରୁ ଘନ ଘନ ବୈଠକ ହେଲା। କିନ୍ତୁ ପରେ ଭାଜପା ଓ ବିଜେଡି ଏକାକୀ ନିର୍ବାଚନ ଲଢ଼ିବେ ବୋଲି ଘୋଷଣା କଲେ। ଏପରି କି ଭାଜପା ପକ୍ଷରୁ ଲୋକ ସଭା ନିର୍ବାଚନ ପାଇଁ ପ୍ରଥମ ପ୍ରାର୍ଥୀ ତାଲିକା ଘୋଷଣା କରାଗଲା। ହେଲେ ଏହାପରଠାରୁ ଦଳ ଆଉ ପ୍ରାର୍ଥୀ ତାଲିକାକୁ ନେଇ ଆଗେଇପାରି ନାହିଁ କି ବାକି ଲୋକ ସଭା ଆସନ ଏବଂ ଗୋଟିଏ ହେଲେ ବି ବିଧାନସଭା ଆସନ ପାଇଁ ପ୍ରାର୍ଥୀଙ୍କ ନାମ ଘୋଷଣା କରିନାହିଁ। ଏଣେ ବିଜେଡି ୧୫ ଲୋକ ସଭା ଆସନ ସହ ଏକାବେଳେ ୭୨ ବିଧାନସଭା ନିର୍ବାଚନମଣ୍ଡଳୀ ପାଇଁ ପ୍ରାର୍ଥୀ ତାଲିକା ପ୍ରକାଶ କରିସାରିଲାଣି। ବିଜେଡିର ଏହି ପଦକ୍ଷେପ ପରେ ଅନୁଗୋଳ ଜିଲାରେ ବିଜେଡି ପ୍ରାର୍ଥୀମାନେ ଏବେ ଲୋକଙ୍କ ନିକଟକୁ ଯିବା ଆରମ୍ଭ କଲେଣି। ହେଲେ ବିଧାନସଭା ପ୍ରାର୍ଥୀ ଘୋଷଣା କ୍ଷେତ୍ରରେ ଭାଜପା ପଛରେ ପଡ଼ିଥିବାରୁ ଅନୁଗୋଳ ଜିଲାର ଭାଜପା ଆଶାୟୀମାନଙ୍କ ନିଦ ହଜିଯାଇଛି। ଜିଲାର କେଉଁ ଆସନରୁ ଦଳ କାହାକୁ ପ୍ରାର୍ଥୀ କରିବ ତାହାକୁ ନେଇ ମଧ୍ୟ କର୍ମୀ ଦ୍ୱନ୍ଦ୍ୱରେ ପଡ଼ିଛନ୍ତି।
୨୦୧୯ ସାଧାରଣ ନିର୍ବାଚନରେ ଅନୁଗୋଳ ଜିଲାର ୫ ବିଧାନସଭା ନିର୍ବାଚନମଣ୍ଡଳୀରେ ଭାଜପା ପ୍ରାର୍ଥୀମାନେ ବିଜେଡିକୁ କଡ଼ା ଟକ୍କର ଦେଇଥିଲେ। କିନ୍ତୁ ନିର୍ବାଚନୀ ଯୁଦ୍ଧରେ ଭାଜପାର ୫ ପ୍ରାଥର୍ର୍ୀ ପରାଜିତ ହୋଇଥିଲେ। ହେଲେ ଚଳିତ ନିର୍ବାଚନରେ ଭାଜପା ସମ୍ବଲପୁର ଲୋକ ସଭା ଆସନ ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନାମ ଘୋଷଣା କରିବା ପରେ ଅନୁଗୋଳ ଜିଲା ଭାଜପା ଶିବିରରେ ଉତ୍ସାହ ଖେଳିଯାଇଛି। କାରଣ ସମ୍ବଲପୁର ଲୋକ ସଭା କ୍ଷେତ୍ର ମଧ୍ୟରେ ଅନୁଗୋଳ ଜିଲାର ଛେଣ୍ଡିପଦା ଓ ଆଠମଲ୍ଲିକ ବିଧାନସଭା ନିର୍ବାଚନମଣ୍ଡଳୀ ଆସୁଛି। ତେଣୁ ଏହି ୨ ବିଧାନସଭା କ୍ଷେତ୍ରରୁ ଭାଜପା ଟିକେଟ୍ ଆଶାୟୀ ନେତାମାନେ ଦଳୀୟ ପ୍ରାର୍ଥୀ ଘୋଷଣାକୁ ଆତୁର ହୋଇ ଚାହିଁ ରହିଛନ୍ତି। ଦଳ ଏଠାରେ ପୁରୁଣା ମୁହଁଙ୍କୁ ଆଉଥରେ ଭରସା କରିବ ନା ଅମଳ ନେତାଙ୍କୁ ଆଣି ଛିଡ଼ା କରିବ, ତାହାକୁ ନେଇ ଏବେ ବିଭିନ୍ନ ମହଲରେ ଆଲୋଚନା ଜୋର ଧରିଥିବାରୁ ଏହି ନେତାମାନେ ଚିନ୍ତାରେ ପଡ଼ିଥିବା କୁହାଯାଉଛି। ଅନୁଗୋଳ ବିଧାନସଭା କ୍ଷେତ୍ରରେ ମଧ୍ୟ ସମାନ ସ୍ଥିତି। ଫଳରେ ଦଳର ବରିଷ୍ଠ ନେତା ପ୍ରତାପ ଚନ୍ଦ୍ର ପ୍ରଧାନ ଚୁପ୍ ହୋଇ ଦଳର ତାଲିକାକୁ ଅପେକ୍ଷା କରିଥିବା ସମର୍ଥକମାନେ କୁହାକୁହି ହେଉଛନ୍ତି। ସେହିପରି ତାଳଚେର, ପାଲଲହଡ଼ାରେ ଦଳ କାହାକୁ ପ୍ରାର୍ଥୀ କରିବ ତାହା ଏଯାଏ ସ୍ଥିର କରିପାରି ନ ଥିବା କୁହାଯାଉଛି। ହେଲେ ଆଠମଲ୍ଲିକରେ ପୂର୍ବତନ ମନ୍ତ୍ରୀ ସଞ୍ଜୀବ ସାହୁଙ୍କ ସପକ୍ଷରେ ଅଧିକ ଆଲୋଚନା ହେଉଥିବାରୁ ସେ ସାମାନ୍ୟ ଆଶ୍ୱସ୍ତ ଥିବା ଚର୍ଚ୍ଚା ହେଉଛି।
