ନୂଆଦିଲ୍ଲୀ, ୨୭।୮ : ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ପୁଣିଥରେ ଭାଜପାକୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ ଭାରତୀୟ ଜନତା ପାର୍ଟି ଅପାଠୁଆଙ୍କ ଦଳ ଏବଂ ସେମାନେ ଦେଶକୁ ଅପାଠୁଆ ରଖିବାକୁ ଚାହୁଁଛନ୍ତି। ଦିଲ୍ଲୀ ଶିକ୍ଷା ମନ୍ତ୍ରୀ କହିଛନ୍ତି ଯେ ଜାତୀୟ ରାଜଧାନୀରେ ସରକାରୀ ବିଦ୍ୟାଳୟଗୁଡ଼ିକୁ ବନ୍ଦ କରିବାକୁ ଭାଜପା ଲକ୍ଷ୍ୟ ରଖିଛି।
ଉପରାଜ୍ୟପାଳ ବିନୟ କୁମାର ସାକ୍ସେନାଙ୍କ ପକ୍ଷରୁ ଫାଇଲ ଫେରସ୍ତ କରିବା ପରେ ସିସୋଡିଆ ଏଭଳି ବିବୃତ୍ତି ଦେଇଛନ୍ତି। ଉପରାଜ୍ୟପାଳ ଫାଇଲରେ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କ ଦସ୍ତଖତ ନଥିବା ଦର୍ଶାଇ ଏସବୁକୁ ଫେରାଇ ଦେଇଥିଲେ। ଶନିବାର ଏକ ଗଣମାଧ୍ୟaମ ସମ୍ମିଳନୀରେ ମନୀଷ ସିସୋଡିଆ କହିଛନ୍ତି, ଦିଲ୍ଲୀର ସରକାରୀ ବିଦ୍ୟାଳୟଗୁଡ଼ିକ ଘରୋଇ ବିଦ୍ୟାଳୟ ଠାରୁ ଉନ୍ନତ ଧରଣର।
ସେ କହିଛନ୍ତି ଯେ ଦିଲ୍ଲୀରେ ଏଏପି ନେତୃତ୍ୱାଧୀନ ସରକାରକୁ ଭାଙ୍ଗିବା ପାଇଁ ଭାଜପା ଷଡ଼ଯନ୍ତ୍ର କରୁଛି। ତାଙ୍କ ବାସଭବନରେ ସିବିଆଇ ଚଢ଼ାଉ ମୂଲ୍ୟହୀନ ହୋଇଥିବାରୁ କେନ୍ଦ୍ରର ଭାଜପା ସରକାର ଏବେ ଦିଲ୍ଲୀର ସରକାରୀ ବିଦ୍ୟାଳୟରେ ତ୍ରୁଟି ଖୋଜିବାକୁ ଚେଷ୍ଟା କରୁଛନ୍ତି। ଦିଲ୍ଲୀ ଉପମୁଖ୍ୟମନ୍ତ୍ରୀ କହିଛନ୍ତି, ମୋତେ କୁହନ୍ତୁ, ସିବିଆଇ ଚଢ଼ାଉର ୧୦ ଦିନ ପରେ ମଧ୍ୟ କ’ଣ ମିଳିଲା? ଯଦି ମଦ ଦୁର୍ନୀତିରେ କିଛି ନ ବାହରିବାରୁ ଭାଜପା ଏବେ କହୁଛି ଯେ ବିଦ୍ୟାଳୟ ନିର୍ମାଣରେ ଅନିୟମିତା ହୋଇଛି।
ସେ ଏହା ମଧ୍ୟ କହିଛନ୍ତି ଯେ ଏହି ସବୁ ଅଭିଯୋଗ ମିଥ୍ୟା। ଦିଲ୍ଲୀର ଶିକ୍ଷା ମଡେଲରେ ଏଏପିର ଅବଦାନକୁ ପ୍ରଶଂସା କରି ସେ କହିଛନ୍ତି, ୨୦୧୫ ପରଠାରୁ କେଜରିୱାଲ ସରକାରଙ୍କ ଦ୍ୱାରା ୭୦୦ ଟି ନୂତନ ବିଦ୍ୟାଳୟ କୋଠା ନିର୍ମାଣ କରାଯାଇଛି। ଏହି ବିଦ୍ୟାଳୟଗୁଡ଼ିକ ଘରୋଇ ବିଦ୍ୟାଳୟ ସହିତ ପ୍ରତିଦ୍ୱନ୍ଦ୍ୱିତା କରୁଛନ୍ତି। କେଜରିୱାଲଙ୍କ ଦସ୍ତଖତ ହୋଇ ନଥିବାରୁ ଦିଲ୍ଲୀ ଉପରାଜ୍ୟପାଳଙ୍କ ଦ୍ୱାରା ଫେରସ୍ତ ହୋଇଥିବା ଫାଇଲଗୁଡିକ ବିଷୟରେ ସେ କହିଛନ୍ତି ଯେ ଏହା ଏକ ନିତିଦିନିଆ ପ୍ରକ୍ରିୟା ଥିଲା। ମନୀଷ ସିସୋଡିଆ କହିଛନ୍ତି,ସାକ୍ସେନା ଉପରାଜ୍ୟପାଳଙ୍କ ଭଳି ବ୍ୟବହାର କରିବା ଆବଶ୍ୟକ।
