ଶ୍ରୀନଗର,୮ା୨: ଜାମ୍ମୁ-କାଶ୍ମୀର ବିଧାନସଭାରେ ଦେଖିବାକୁ ମିଳିଛି ଏକ ବିରଳ ଦୃଶ୍ୟ। ଭାଜପା ବିଧାୟିକା ଦେବୟାନୀ ରାଣା ମୁଖ୍ୟମନ୍ତ୍ରୀ ଓମାର ଅବଦୁଲ୍ଲାଙ୍କ ବଜେଟକୁ କଡ଼ା ସମାଲୋଚନା କରିଥିଲେ। ଯାହାକୁ ଶାସକ ‘ନ୍ୟାସନାଲ କନଫରେନ୍ସ’ (NC) ର ବିଧାୟକମାନେ ତାଙ୍କୁ ଉତ୍ସାହିତ କରିବା ସହ ତାଙ୍କର ପ୍ରଶଂସା କରିଛନ୍ତି।
ଦେବୟାନୀ ରାଣା ହେଉଛନ୍ତି ସ୍ୱର୍ଗତ ଦବିନ୍ଦର ସିଂହ ରାଣାଙ୍କ ଝିଅ। ଦବିନ୍ଦର ଦୀର୍ଘ ଦିନ ଧରି ଓମାର ଅବଦୁଲ୍ଲାଙ୍କ ସହଯୋଗୀ ଓ ଘନିଷ୍ଠ ବନ୍ଧୁ ଥିଲେ। ନିକଟରେ ତାଙ୍କର ମୃତ୍ୟୁ ପରେ ଦେବୟାନୀ ନାଗ୍ରୋଟା ଆସନରୁ ବିଜୟୀ ହୋଇଛନ୍ତି। ତାଙ୍କର ଏହି ପ୍ରଥମ ଅଭିଭାଷଣ ପୂର୍ବରୁ ବାଚସ୍ପତି ସମସ୍ତ ସଦସ୍ୟଙ୍କୁ ଜଣେ ନୂତନ ବିଧାୟିକାଙ୍କୁ ଉତ୍ସାହିତ କରିବାକୁ ଅନୁରୋଧ କରିଥିଲେ।
My maiden speech in the J&K Legislative Assembly as MLA Nagrota speaking on the J&K Budget 2026-27 on 7th February 2026@bjp4india @bjp4jnk @bjym4jk #JammuAndKashmir pic.twitter.com/2Ndo7NJAtg
— Devyani Rana (@devyanidsrana) February 7, 2026
ଦେବୟାନୀ ନିଜର ୧୨ ମିନିଟର ଅଭିଭାଷଣରେ ତଥ୍ୟ ସହ ବଜେଟର ସମାଲୋଚନା କରିଥିଲେ। ସେ ଦର୍ଶାଇଥିଲେ ଯେ, ଗତ ବର୍ଷ ବନ୍ୟା ଓ ଭୂସ୍ଖଳନରେ ବହୁ ଧନଜୀବନ ହାନି ହୋଇଥିବା ବେଳେ ଏଥିପାଇଁ ଅନୁଦାନକୁ ୭୧୯ କୋଟିରୁ ୩୫୦ କୋଟିକୁ କମାଇ ଦିଆଯାଇଛି। ଶିକ୍ଷା କ୍ଷେତ୍ରରେ ୧୯୩ କୋଟି ଟଙ୍କା କମ୍ ବ୍ୟୟବରାଦ କରାଯାଇଛି, ଯାହା ଗରିବ ପିଲାଙ୍କ ପ୍ରଗତିରେ ବାଧା ସୃଷ୍ଟି କରିବ। ଦିବ୍ୟାଙ୍ଗଙ୍କ ପାଇଁ ମାଗଣା ବସ୍ ସେବା ଥିଲେ ମଧ୍ୟ ବସ୍ଗୁଡ଼ିକରେ ସେମାନଙ୍କ ପାଇଁ ଆବଶ୍ୟକୀୟ ବ୍ୟବସ୍ଥା ନାହିଁ।
ଭାଜପା ପ୍ରାର୍ଥୀ ଭାବେ ଦେବୟାନୀ ଲଢ଼ୁଥିଲେ ମଧ୍ୟ ଓମାର ଅବଦୁଲ୍ଲା ସମ୍ମାନ ଦୃଷ୍ଟିରୁ ତାଙ୍କ ବିରୋଧରେ କୌଣସି ନିର୍ବାଚନୀ ପ୍ରଚାର କରିନଥିଲେ। ବିଧାନସଭାରେ ମଧ୍ୟ ବଜେଟକୁ କଡ଼ା ସମାଲୋଚନା କରିବା ସତ୍ତ୍ୱେ ତାଙ୍କର ସ୍ପଷ୍ଟବାଦିତା ଓ ପ୍ରସ୍ତୁତି ପାଇଁ ଉଭୟ ଶାସକ ଓ ବିରୋଧୀ ଦଳର ସଦସ୍ୟମାନେ ଟେବୁଲ ବାଡ଼େଇ ତାଙ୍କୁ ଅଭିନନ୍ଦନ ଜଣାଇଥିଲେ।
