ଭଞ୍ଜନଗର,୨୧।୧୨(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ବାର ଆସୋସିଏଶନ ଯୁବ ଆଇନଜୀବୀ ତଥା ଭାଜପା ନେତା ଅରୁଣ ପ୍ରଧାନଙ୍କ ରବିବାର ରାତିରେ ତାରସିଂ ଥାନା ଅନ୍ତର୍ଗତ ଗାୟଗଣ୍ଡା ନିକଟର କାର ଦୁର୍ଘଟଣାରେ ମୃତ୍ୟୁ ଘଟିଛି।
ଖବରପାଇ ଭଞ୍ଜନଗର ମେଡ଼ିକାଲରେ ଆଇନଜୀବୀ ଏବଂ ତାଙ୍କ ଶୁଭେଚ୍ଛୁମାନଙ୍କ ଭିଡ଼ ଜମିଛି। ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ପ୍ରମୁଖ ଅରୁଣଙ୍କ ବିୟୋଗରେ ଗଭୀର ଶୋକବ୍ୟକ୍ତ କରିଛନ୍ତି। ଘଟଣାରୁ ପ୍ରକାଶ ଯେ, ରବିବାର ରାତି ପ୍ରାୟ ୯ ଟା ସମୟରେ ଅରୁଣ ନିଜ ଗ୍ରାମ ଗାୟଗଣ୍ଡାକୁ କାର ଯୋଗେ ଫେରୁଥିଲେ। ବାଟରେ ଗ୍ରାମ ନିକଟରେ ଅରୁଣ ଗାଡିରୁ ଭାରସାମ୍ୟ ହରାଇଥିଲେ। ଫଳରେ ଗାଡିଟି ଓଲଟି ପଡ଼ିବା ସହ ଅରୁଣ ଗୁରୁତର ଭାବେ ଆହତ ହୋଇଥିଲେ। ଅଞ୍ଚଳବାସୀ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଚିକିତ୍ସା ପାଇଁ ଭଞ୍ଜନଗର ହସ୍ପିଟାଲ ଆଣିଥିଲେ। ମେଡ଼ିକାଲରେ ଅରୁଣଙ୍କୁ ଡାକ୍ତର ଏକ ଘଣ୍ଟା ରଖି ଚିକିତ୍ସା କରିବା ପରେ ଇସିଜି କରି ରାତି ୧୧ ଟାରେ ମୃତ ଘୋଷଣା କରିଥିଲେ।
ତାଙ୍କର ଅକାଳ ବିୟୋଗରେ ଭଞ୍ଜନଗର ଅଞ୍ଚଳରେ ଶୋକର ଛାୟା ଖେଳିଯାଇଛି। ତାରସିଂ ପୋଲିସ, ଏଏସପି ରଞ୍ଜନ କୁମାର ଦେ, ଏସ୍ଡିପିଓ ଡ ଦୀପକ କୁମାର ମିଶ୍ର ପ୍ରମୁଖ ଭଞ୍ଜନଗର ମେଡ଼ିକାଲରେ ପହଞ୍ଚି ଘଟଣାର ତଦନ୍ତ କରୁଛନ୍ତି। ଅରୁଣ ଭାଜପାର ଜଣେ ଆଗ ଧାଡ଼ିର ନେତା ଥିଲେ। ସେ ଭଞ୍ଜନଗର ବାର ଆସୋସିଏଶନର ବିଭିନ୍ନ ପଦ ପଦବୀରେ ଏକାଧିକଥର ବିଜୟୀ ହୋଇଥିଲେ।
Dharitri – Odisha’s No.1 Odia Daily
