ନୂଆଦିଲ୍ଲୀ,୧୭।୩: ଭାଜପା ନେତା ତଥା କେନ୍ଦ୍ର ମନ୍ତ୍ରୀ ଅନୁରାଗ ଠାକୁର ଶୁକ୍ରବାର କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି, ଶୁକ୍ରବାର ରାହୁଲ ଗାନ୍ଧୀଙ୍କୁ ଗୃହ ନିୟମର ଏକ ବୁକଲେଟ ଦେବା ପାଇଁ ମୁଁ ଆଣିଥିଲି। ଯେଉଁଥିରେ ତାଙ୍କର ଉପସ୍ଥାନ ଗୃହରେ ହାରାହାରି ଉପସ୍ଥାନଠାରୁ ବି କମ୍। ଗୋଟିଏ ପରିବାର, ଘର ଏବଂ ଦେଶ ଅପେକ୍ଷା ବଡ କି ବୋଲି ଅନୁରାଗ ପ୍ରଶ୍ନ କରିଛନ୍ତି। ସଂସଦ ଏବଂ ଦେଶକୁ ବିଦେଶୀ ମାଟିରୁ ଅପମାନିତ କରିଥିବା ରାହୁଲ ଗାନ୍ଧୀ ଗୃହକୁ ଆସି ଦେଶକୁ କ୍ଷମା ମାଗିବାରେ କାହିଁକି ଲଜ୍ଜା ଅନୁଭବ କରୁଛନ୍ତି। ସେହିପରି ରାହୁଲ ଗାନ୍ଧୀଙ୍କ ‘ଦୁର୍ଭାଗ୍ୟବଶତଃ , ମୁଁ ଜଣେ ଏମ୍ପି’ ବିବୃତ୍ତିରେ ଉପରେ ମଧ୍ୟ କେନ୍ଦ୍ରମନ୍ତ୍ରୀ ପ୍ରତିକ୍ରିୟା ରଖିଛନ୍ତି। ରାହୁଲଙ୍କୁ ଟାର୍ଗେଟ କରି ଅନୁରାଗ କହିଛନ୍ତି, ବେଳେବେଳେ ସତ୍ୟ ପଦାକୁ ଆସିଯାଏ। ଆଉ ଏହା ବାସ୍ତବରେ ସେ ଏମ୍ପି ହେବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ଅନୁରାଗ କହିଛନ୍ତି। ସୂଚନାଯୋଗ୍ୟ, ଗୁରୁବାର ରାହୁଲ ଗାନ୍ଧୀ ଏକ ଖବରଦାତା ସମ୍ମିଳନୀ କରିଥିଲେ। ଯାହାର ଏକ କ୍ଲିପ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଯେଉଁଥିରେ ରାହୁଲ ଗାନ୍ଧୀ କହିଛନ୍ତି, ଦୁର୍ଭାଗ୍ୟବଶତଃ, ମୁଁ ଜଣେ ଏମ୍ପି। ଏହି ସମୟରେ ତାଙ୍କ ସହ ବୈଠକରେ ବସିଥିବା ଦଳର ବରିଷ୍ଠ ନେତା ଜୟରାମ ରମେଶ ତାଙ୍କୁ ଏହି ମନ୍ତବ୍ୟରେ ସଂଶୋଧନ କରୁଥିବା ଦେଖିବାକୁ ମିଳିଥିଲା।
