ତିହିଡି, ୨୪।୧୨(ସଞ୍ଜିତ ବଳ): ତିହିଡି ବ୍ଲକ ଭଟପଡା ପଞ୍ଚାୟତ ଅଧୀନ ମିର୍ଜାପୁର ଗ୍ରାମରେ ମଙ୍ଗଳବାର ଏକ ରାସ୍ତା ନିର୍ମାଣକୁ ନେଇ ଭାଜପା ଓ କଂଗେସ କର୍ମୀ ମୁହାଁମୁହିଁ ହୋଇଛନ୍ତି l ପରିସ୍ଥିତି ଉତ୍ତେଜନାପୂର୍ଣ୍ଣ ହେବାରୁ ତିହିଡି ପୋଲିସ ଘଟଣାସ୍ଥଳରେ ପହଞ୍ଚି ଗଣ୍ଡଗୋଳକୁ ନିୟନ୍ତ୍ରଣ କରିଥିବା ଜଣାଯାଇଛି l ରାସ୍ତା ନିର୍ମାଣ ପାଇଁ ଏଫଡ଼ିଆରରେ ୧ଲକ୍ଷ ୯୮ ହଜାର ଟଙ୍କା ଅନୁଦାନ ମିଳିଥିଲା l ତେବେ ଏହି ନିର୍ମାଣ କାର୍ଯ୍ୟ କରିବାକୁ ଉଭୟ ଭାଜପା ଓ କଂଗ୍ରେସ କର୍ମୀମାନେ ଉଦ୍ୟମ କରିଥିଲେl ଏପରିକି ଉଭୟ ଦଳ ପକ୍ଷରୁ ୨ଟି ଫଳକ ମଧ୍ୟ ନିର୍ମାଣ କରାଯିବା ସହ ରାସ୍ତା ନିର୍ମାଣ ସାମଗ୍ରୀ ମଧ୍ୟ ମହଜୁଦ ରଖାଯାଇଥିଲା l ମଙ୍ଗଳବାର ସକାଳେ ଉଭୟ ଦଳର କର୍ମୀମାନେ କାର୍ଯ୍ୟ କରିବାକୁ ଉଦ୍ୟମ କରିବାରୁ ଗଣ୍ଡଗୋଳ ଉପୁଜିଥିଲା। ଏହା ସଂଘର୍ଷର ରୂପ ନେବାରୁ ଆଇଆଇସି ପ୍ରସନ୍ନ କୁମାର ନାୟକ ସଦଳବଳେ ଘଟଣାସ୍ଥଳରେ ପହଞ୍ଚିଥିଲେ l ତେବେ ଭାଜପା ପକ୍ଷରୁ ରାସ୍ତା ନିର୍ମାଣ କରାଯାଉଥିବା ବେଳେ ସେଠାରେ ପୋଲିସ ମୁତୟନ ଥିବା ଜଣାଯାଇଛି l
