ମୁମ୍ବାଇ, ୮।୬: ମହାରାଷ୍ଟ୍ରରେ ଭାଜପା ଗୁରୁବାର ରାଜ୍ୟର ୪୮ ଲୋକ ସଭା ଏବଂ ୨୮୮ବିଧାନସଭା ଆସନ ପାଇଁ ‘ ନିର୍ବାଚନ ମୁଖ୍ୟ’ଙ୍କ ଘୋଷଣା କରିଛି। ରାଜ୍ୟ ଭାଜପା ମୁଖ୍ୟ ଚନ୍ଦ୍ରଶେଖର ବାୱନକୁଲେ ଏଠାରେ ଏକ ଖବରଦାତା ସମ୍ମିଳନୀରେ କହିଛନ୍ତି ଯେ ନିର୍ବାଚନର ପ୍ରସ୍ତୁତି ତଥା ପରିଚାଳନା ପାଇଁ ନିର୍ବାଚନ ମୁଖ୍ୟ ଦାୟୀ ରହିବେ। ସେ କହିଛନ୍ତି, ଶିବସେନା ମିଳିତ ମଞ୍ଚରେ ଆମେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଏବଂ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସଙ୍କ ଅଧ୍ୟକ୍ଷତାରେ ଲୋକ ସଭା ଏବଂ ବିଧାନସଭା ନିର୍ବାଚନ ଲଢିବୁ।
ସେ ଦାବି କରିଛନ୍ତି ଯେ ଆମେ ୪୮ଟି ଲୋକ ସଭା ମଧ୍ୟରୁ ୪୫ଟି ଏବଂ ୨୮୮ଟି ବିଧାନସଭା ଆସନରୁ ୨୦୦ଟି ଜିତିବୁ। ବାୱନକୁଲେ କହିଛନ୍ତ, ଶିବସେନା ପ୍ରାର୍ଥୀମାନେ ପ୍ରତିଦ୍ୱନ୍ଦ୍ୱିତା କରୁଥିବା ଆସନରେ ଶିବସେନା ପ୍ରାର୍ଥୀଙ୍କ ବିଜୟ ନିଶ୍ଚିତ କରିବାକୁ ଭାଜପାର ନିର୍ବାଚନ ମୁଖ୍ୟ କାର୍ଯ୍ୟ କରିବେ। ଗତ ନଅ ବର୍ଷ ମଧ୍ୟରେ ମୋଦି ସରକାରଙ୍କ ପ୍ରଦର୍ଶନ ବିଷୟରେ ଲୋକଙ୍କୁ ଅବଗତ କରାଇବା ପାଇଁ ‘ମୋଦି @ ୯’ ପଦକ୍ଷେପର ଏକ ଅଂଶ ଭାବରେ ଆସନ୍ତା ଏକ ମାସ ମଧ୍ୟରେ ପ୍ରତ୍ୟେକ ବିଧାନସଭା ନିର୍ବାଚନମଣ୍ଡଳୀରେ ୬୦ ହଜାର ଲୋକଙ୍କ ପାଖରେ ପହଞ୍ଚିବାକୁ ଲକ୍ଷ୍ୟ ରଖିଛି। ଜୁନ ୧୦ରେ କେନ୍ଦ୍ରୀୟ ମହାରାଷ୍ଟ୍ରର ନନ୍ଦେଡରେ ଏକ ରାଲିରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ସମ୍ବୋଧିତ କରିବେ ବୋଲି ସେ କହିଛନ୍ତି।
ସୂଚନାଯୋଗ୍ୟ, ୨୦୧୯ ମହାରାଷ୍ଟ୍ର ନିର୍ବାଚନ ଭାଜପା ଶିବସେନା ସହ ମିଳିତ ଭାବେ ପ୍ରତିଦ୍ୱନ୍ଦ୍ୱିତା କରିଥିଲା। ୨୫ଟି ଆସନରେ ପ୍ରତିଦ୍ୱନ୍ଦ୍ୱିତା କରି ଭାଜପା ଏହି ନିର୍ବାଚନରେ ୨୩ଟି ଆସନ ଜିତିଥିବାବେଳେ ଶିବସେନା ୨୩ଟି ଆସନରୁ ୧୮ଟି ଜିତିଥିଲା। ସେହିପରି ୨୫ଟି ଆସନରେ ପ୍ରତିଦ୍ୱନ୍ଦ୍ୱିତା କରିଥିବା କଂଗ୍ରେସ କେବଳ ଗୋଟିଏ ଆସନ ପାଇଥିବାବେଳେ ଏହାର ସହଯୋଗୀ ଏନସିପି ୧୯ ଟି ଆସନରୁ ୪ଟି ପାଇଥିଲା।
