ନୂଆଦିଲ୍ଲୀ,୬।୪: ଭାରତୀୟ ଜନତା ପାର୍ଟିର ସ୍ଥାପନା ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦଳର କର୍ମକର୍ତ୍ତାଙ୍କୁ ସମ୍ବୋଧିତ କରିଛନ୍ତି। ମୋଦି ଦଳର ସ୍ଥାପନା ଦିବସର ଶୁଭେଚ୍ଛା ଜଣାଇବା ସହ କହିଛନ୍ତି, ଆଜି ଆମେ ଦେଶର କୋଣେ କୋଣେ ହନୁମାନଙ୍କ ଜୟନ୍ତି ପାଳନ କରୁଛେ। ହନୁମାନଙ୍କ ଜୀବନ ଆଜିବି ଆମକୁ ଭାରତର ବିକାଶ ଯାତ୍ରାରେ ପ୍ରେରଣା ଦେଉଛି।
ଭାଜପାର ୪୪ତମ ସ୍ଥାପନା ଦିବସରେ ପ୍ରଧାନମନ୍ତ୍ରୀ ମୋଦି କହିଛନ୍ତି, ଯେତେବେଳେ ଲକ୍ଷ୍ମଣଙ୍କ ଉପରେ ବିପଦ ଆସିଲା ସେତେବେଳେ ହନୁମାନ ସମ୍ପୂର୍ଣ୍ଣ ପର୍ବତକୁ ଉଠାଇ ଆଣିଥିଲେ। ଭାଜପା ବି ଏହି ପ୍ରେରଣାରୁ ପରିଣାମ ଆଣିବା ପାଇଁ ଲୋକଙ୍କ ସମସ୍ୟାକୁ ସମାଧାନ କରିବାକୁ ପ୍ରୟାସ କରି ଆସୁଛି, କରିବା ଜାରି ରଖିବ, କରିବା ଆବଶ୍ୟକ। ଆଜି ଭାରତ ସମୁଦ୍ର ଭଳି ଚ୍ୟାଲେଞ୍ଜକୁ ପାର କରିବାକୁ ଓ ଏହାର ମୁକାବିଲା କରିବାକୁ ପୂର୍ବାପେକ୍ଷା ଅଧିକ ସକ୍ଷମ ରହିଛି।
ଏହି ସ୍ଥାପନା ଦିବସରେ ବିରୋଧିଙ୍କୁ ଟାର୍ଗେଟ କରି ମୋଦି କହିଛନ୍ତି, ଆଜି ଲୋକେ ଖୋଲାଖୋଲି ଭାବେ କହୁଛନ୍ତି, ମୋଦି ତୁମର କବର ଖୋଳିବୁ, ଧମକ ଦେଉଛନ୍ତି, ବାଦଶାହା ମାନସିକତା ରଖିଥିବା ଦଳ ଗୋଟିଏ କଥା ଜାଣନ୍ତି ନାହିଁ ଯେ ଦେଶର ଗରିବ ଓ ଯୁବା, ମାଆ ଓ ଝିଅ, ଦଳିତ ଆଦିବାସୀ ସମସ୍ତେ ଭାଜପାର ପଦ୍ମ ଫୁଟାଇବାକୁ ଠିଆ ହୋଇଛନ୍ତି। ଏହି ରାଜନୈତିକ ଦଳସବୁ ଆମ ବିରୋଧରେ ଚାଲ ଖେଲିବେ। ମାଆ ଭାରତିଙ୍କୁ ଏହିସବୁ କୁଦୃଷ୍ଟିରୁ ମୁକ୍ତି ଦେବାପାଇଁ ଯଦି କଠୋର ହେବାକୁ ପଡେ ତେବେ କଠୋର ହୁଅନ୍ତୁ।
