ଅନୁଗୋଳ ଅଫିସ, ୧୪ା୧: ଅନୁଗୋଳ ନିର୍ବାଚନ ମଣ୍ଡଳୀରେ ଶୁକ୍ରବାର ବିଜେଡି ପ୍ରତିଷ୍ଠା ଦିବସ ପାଳିତ ହୋଇଯାଇଛି। ଅନୁଗୋଳ ସଭାଘରଠାରେ ଆୟୋଜିତ ଏହି ପ୍ରତିଷ୍ଠା ଦିବସ କାର୍ଯ୍ୟକ୍ରମକୁ ଜିଲା ଯୁବ ବିଜେଡି ସଭାପତି ଦୀନେଶ ପ୍ରଧାନ ଓ ବହୁ ବରିଷ୍ଠ କର୍ମୀଙ୍କୁ ଆମନ୍ତ୍ରଣ କରାଯାଇ ନ ଥିବାରୁ ଦଳରେ ଗୋଷ୍ଠୀ ବିବାଦ ଚର୍ଚ୍ଚା ଆରମ୍ଭ ହୋଇଛି। ଆୟୋଜକ ଗୋଷ୍ଠୀ ନିଜ ପତିଆରା ଜାହିର କରିବାକୁ ଏପରି କରିଥିବା ଅସନ୍ତୁଷ୍ଟ କର୍ମୀ ମହଲରେ ଆଲୋଚନା ହେଉଛି।
ଗତ ଡିସେମ୍ବର ୨୯ରେ ମୁଖ୍ୟମନ୍ତ୍ରୀଙ୍କ ଅନୁଗୋଳ ଗସ୍ତ ଅବସରରେ ପ୍ରବଳ ଜନ ସମାଗମ ହୋଇଥିବାରୁ ଶୁକ୍ରବାର ଅନୁଗୋଳ ନିର୍ବାଚନମଣ୍ଡଳୀ ବିଜେଡିର ପ୍ରତିଷ୍ଠା ଦିବସରେ ମଧ୍ୟ ଅନୁରୂପ ଭିଡ଼ ହେବ ବୋଲି ଆୟୋଜକମାନେ ଆଶା କରିଥିଲେ। ଏହାଛଡ଼ା ସରକାରଙ୍କ ଘୋଷଣା ଅନୁଯାୟୀ ସ୍ବୟଂ ସହାୟକ ଗୋଷ୍ଠୀ ସଦସ୍ୟାଙ୍କୁ ଋଣ ଅର୍ଥ ପ୍ରଦାନ କରାଯିବ ବୋଲି ପ୍ରଚାର କରାଯାଇଥିଲା। ତେଣୁ ଜମାଣିଆ ଗହଳି ଆଶାରେ ବଡ଼ ଧରଣର ଆୟୋଜନ କରାଯାଇଥିଲା। କାର୍ଯ୍ୟକ୍ରମରେ ବରିଷ୍ଠ ପର୍ଯ୍ୟବେକ୍ଷକ ପ୍ରତାପ ଜେନା, ଅନୁଗୋଳ ଜିଲା ପର୍ଯ୍ୟବେକ୍ଷକ ପ୍ରଶାନ୍ତ ମୁଦୁଲି, ତାଳଚେର ବିଧାୟକ ବ୍ରଜ କିଶୋର ପ୍ରଧାନ, ଆଠମଲ୍ଲିକ ବିଧାୟକ ରମେଶ ଚନ୍ଦ୍ର ସାଏ, ପାଲଲହଡ଼ା ବିଧାୟକ ମୁକେଶ ପାଳ, ଜିଲା ବିଜେଡି ସଭାପତି ମହେନ୍ଦ୍ର ବସ୍ତିଆ, ନଗରପାଳ ଅକ୍ଷୟ କୁମାର ସାମନ୍ତ ପ୍ରମୁଖ ଯୋଗଦେଇଥିଲେ। ହେଲେ ଆଶା ଅନୁଯାୟୀ କର୍ମୀ କିମ୍ବା ସ୍ବୟଂ ସହାୟକ ଗୋଷ୍ଠୀ ସଦସ୍ୟାଙ୍କୁ ଦେଖିବାକୁ ମିଳି ନ ଥିଲା। କିଛି ଗୋଷ୍ଠୀର ସଦସ୍ୟା ଆସିଥିଲେ ମଧ୍ୟ ପ୍ରତିଷ୍ଠା ଦିବସ ପାଳନ ହେଉଥିବା ଜାଣିବା ପରେ ସେମାନେ ଫେରିଯାଇଥିଲେ। ତେଣୁ କାର୍ଯ୍ୟକ୍ରମରେ ବହୁ ସଂଖ୍ୟାରେ ଚେୟାର ଫାଙ୍କା ପଡ଼ିଥିବା ଦେଖାଯାଇଥିଲା। ଏ ସମ୍ପର୍କରେ ଜିଲା ବିଜେଡି ସଭାପତି ମହେନ୍ଦ୍ର ବସ୍ତିଆ କହିଛନ୍ତି, ପ୍ରତିଷ୍ଠା ଦିବସ କାର୍ଯ୍ୟକ୍ରମରେ କର୍ମୀଙ୍କ ଭଲ ସମାବେଶ ହୋଇଥିଲା। ଅନୁଗୋଳ ନିର୍ବାଚନ ମଣ୍ଡଳୀର ହୋଇ ନ ଥିବାରୁ ଯୁବ ବିଜେଡି ସଭାପତିଙ୍କୁ ଡକାଯାଇ ନାହିଁ। ତେବେ ଅନୁଗୋଳ ବିଧାୟକ ଏ ନେଇ ଭଲଭାବେ କହିପାରିବେ ବୋଲି ବସ୍ତିଆ ପ୍ରକାଶ କରିଥିଲେ। ବରିଷ୍ଠ ପର୍ଯ୍ୟବେକ୍ଷକ ପ୍ରତାପ ଜେନା କହିଛନ୍ତି, ଅଧିକ ସଂଖ୍ୟକ ଚେୟାର ପକାଯାଇଥିଲା। ଯୁବ ବିଜେଡି ସଭାପତିଙ୍କୁ କାହିଁକି ଡକାଯାଇ ନାହିଁ ସେ ଜାଣି ନାହାନ୍ତି। ପର୍ଯ୍ୟବେକ୍ଷକ ମୁଦୁଲି କହିଛନ୍ତି, ଦଳରେ ଥିବା ଅସନ୍ତୋଷ ସମ୍ପର୍କରେ ଆଲୋଚନା କରାଯିବ। ଜିଲା ଯୁବ ବିଜେଡି ସଭାପତି ପ୍ରଧାନ କହିଛନ୍ତି, ପ୍ରତିଷ୍ଠା ଦିବସ ପାଳନ ସମ୍ପର୍କରେ ସୂଚନା ନ ଥିଲା। ସେ ଅନୁଗୋଳ ନିର୍ବାଚନମଣ୍ଡଳୀର ଓ ଗତ ୩ଥର ଏଠାରେ ଭୋଟ ଦେଇସାରିଛନ୍ତି।
