ବଇଣ୍ଡା,୨୨ା୪(ପରିକ୍ଷିତ ସାହୁ):ଅନୁଗୋଳ ଜିଲା ଆଠମଲ୍ଲିକ ବିଧାନସଭା କ୍ଷେତ୍ରରେ ଆସନ୍ତା ମେ ୨୫ରେ ହେବ ଭୋଟଗ୍ରହଣ। ଏଥର ଏହି ନିର୍ବାଚନମଣ୍ଡଳୀରେ ବିଜେଡି ଓ ଭାଜପା ପ୍ରାର୍ଥୀ ପରିବର୍ତ୍ତନ କରିଛନ୍ତି। ବିଜେଡି ଗତଥରର ବିଧାୟକ ରମେଶ ସାଏଙ୍କ ସ୍ଥାନରେ ପୂର୍ବତନ ପୂର୍ତ୍ତ ସଚିବ ନଳିନୀକାନ୍ତ ପ୍ରଧାନଙ୍କୁ ପ୍ରାର୍ଥୀ କରିଛି। ସେହିପରି ଗତଥରର ପ୍ରାର୍ଥୀ ଭାଗୀରଥି ପ୍ରଧାନଙ୍କ ସ୍ଥାନରେ ଭାଜପା ଅଭିଜ୍ଞ ସଞ୍ଜୀବ କୁମାର ସାହୁଙ୍କୁ ଟିକେଟ୍ ଦେଇଛି। କଂଗ୍ରେସ ଗତଥରର ପ୍ରାର୍ଥୀ ବିଜୟାନନ୍ଦ ଚାଉଳିଆଙ୍କୁ ପୁଣି ପ୍ରାର୍ଥୀ କରିଥିଲେ ହେଁ ଦଳ ପୂର୍ବାପେକ୍ଷା ଦୁର୍ବଳ ହୋଇପଡ଼ିଥିବା କୁହାଯାଉଛି। ତେଣୁ ଏହି ନିର୍ବାଚନମଣ୍ଡଳୀକୁ ନିଜ କବ୍ଜାରେ ରଖିବାକୁ ବିଜେଡି ଓ ଭାଜପା ପକ୍ଷରୁ ଜୋର୍ଦାର ଉଦ୍ୟମ ହେଉଛି। ଇତିମଧ୍ୟରେ ବିଧାୟକ ସାଏଙ୍କୁ ଭାଜପା ନିଜ ଶିବିରରେ ସାମିଲ କରିଥିବା ବେଳେ ଭାଜପାର ବରିଷ୍ଠ ନେତା ଭାଗୀରଥିଙ୍କୁ ନିଜ ଆଡ଼କୁ ଟାଣି ନେଇଛି ବିଜେଡି। ତେଣୁ ଉଭୟ ଦଳ ଆଠମଲ୍ଲିକକୁ ଅକ୍ତିଆର ପାଇଁ ସମ ରଣନୀତିରେ କାର୍ଯ୍ୟ କରୁଥିବା ଦେଖାଯାଉଛି।
ଆଠମଲ୍ଲିକ ବିଧାନସଭା ନିର୍ବାଚନମଣ୍ଡଳୀରେ ଶେଷଥର ପାଇଁ କଂଗ୍ରେସ ୧୯୯୫ ମସିହାରେ ବିଜୟୀ ହୋଇଥିଲା। କଂଗ୍ରେସ ପ୍ରାର୍ଥୀ ଅମର ନାଥ ପ୍ରଧାନ ଏଠାରୁ ବିଧାୟକ ନିର୍ବାଚିତ ହୋଇଥିଲେ। ଏହାପରଠାରୁ ଆଠମଲ୍ଲିକକୁ ବିଜେଡି ସମ୍ପୂର୍ଣ୍ଣ କବ୍ଜାରେ ରଖିଛି। ୨୦୦୦ ଓ ୨୦୦୪ ନିର୍ବାଚନରେ ବିଜେଡିର ନଗେନ୍ଦ୍ର ପ୍ରଧାନ ବିଜୟୀ ହୋଇଥିବା ବେଳେ ୨୦୦୯, ୨୦୧୪ରେ ବିଜେଡିରୁ ସଞ୍ଜୀବ ସାହୁ ଏବଂ ୨୦୧୯ରେ ରମେଶ ସାଏ ଏଠାରୁ ବିଧାନସଭାକୁ ନିର୍ବାଚିତ ହୋଇଥିଲେ। ହେଲେ ଚଳିତ ନିର୍ବାଚନରେ ବିଧାୟକ ସାଏଙ୍କ ଟିକେଟ୍ କାଟି ବିଜେଡି ନଳିନୀଙ୍କୁ ପ୍ରାର୍ଥୀ କରିବା ପରେ ସାଏ ସମର୍ଥକଙ୍କ ସହ ଭାଜପାରେ ସାମିଲ ହୋଇଛନ୍ତି। ସାମାଜିକ କର୍ମୀ ଅର୍ଜନୁ ସାହୁ ମଧ୍ୟ ପଦ୍ମ ଧରିଛନ୍ତି। ଏହାକୁ ନେଇ ଭାଜପା ଶିବିରରେ ଉତ୍ସାହ ରହିଥିବା ଆଲୋଚନା ହେଉଛି। ସେହିପରି ଭାଜପାରୁ ପ୍ରାର୍ଥୀ ହୋଇଥିବା ସଞ୍ଜୀବ ଆଠମଲ୍ଲିକ ରାଜନୀତିରେ ବେଶ୍ ପ୍ରବୀଣ। ସେ ପୂର୍ବରୁ ବିଜେଡି ଟିକେଟ୍ରେ ୨ ଥର ବିଧାୟକ ନିର୍ବାଚିତ ହୋଇଥିବାରୁ ଏବଂ କିଛିଦିନ ମନ୍ତ୍ରୀ ରହିଥିବାରୁ ଭୋଟରଙ୍କ ନିକଟରେ ସେ ବେଶ୍ ଜଣାଶୁଣା। ସେହିପରି ବିଜେଡି ମଧ୍ୟ ବରିଷ୍ଠ ଭାଜପା ନେତା ତଥା ପୂର୍ବତନ ଜିଲା ସଭାପତି ଭାଗୀରଥିଙ୍କୁ ନିଜ ଆଡ଼କୁ ଟାଣିନେଇ ଭାଜପା ରଣନୀତିକୁ ଓଲଟପାଲଟ କରିଦେଇଛି। ଦୀର୍ଘବର୍ଷ ଧରି ଆଠମଲ୍ଲିକ ରାଜନୀତି ସହ ଭାଗୀରଥି ଜଡ଼ିତ ଥିଲେ। ଏପରି କି ଭାଜପାରୁ ସେ ୩ ଥର ବିଧାନସଭା ନିର୍ବାଚନ ଲଢ଼ି ଭଲ ଭୋଟ ହାସଲ କରିଥିଲେ। ତେଣୁ ତାଙ୍କ ଯୋଗଦାନ ବିଜେଡି ରଣନୀତିକୁ ଅଧିକ ଶାଣିତ କରିଥିବା ଆଲୋଚନା ହେଉଛି। ଅପରପକ୍ଷରେ ଆଠମଲ୍ଲିକ ବିଧାନସଭା ନିର୍ବାଚନମଣ୍ଡଳୀ ସମ୍ବଲପୁର ଲୋକ ସଭା କ୍ଷେତ୍ର ଅଧୀନରେ ଆସୁଥିବାବେଳେ ବିଜେଡିରୁ ହେଭିଓ୍ବେଟ ପ୍ରଣବ ପ୍ରକାଶ ଦାସ ଓ ଭାଜପାରୁ ହେଭିଓ୍ବେଟ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଲୋକ ସଭା ପ୍ରାର୍ଥୀ ହୋଇଛନ୍ତି। ତେଣୁ ଏହି ହେଭିଓ୍ବେଟ୍ ନେତାଙ୍କ ଲଢ଼େଇର ପ୍ରଭାବ ଆଠମଲ୍ଲିକ ଭୋଟରଙ୍କ ଉପରେ ପଡ଼ିବ ବୋଲି ଚର୍ଚ୍ଚା ହେଉଛି।
