ପାରଳାଖେମୁଣ୍ଡି,୮।୧୨(ଗିରିଧାରୀ ପରିଛା): ଗଜପତି ଜିଲା ଗୁମ୍ମା ବ୍ଲକ ଅଞ୍ଚଳରେ ଗତ ଚାରି ଦିନ ହେଲା ହାତୀ ଉପଦ୍ରବ ବୃଦ୍ଧି ପାଇଛି। ଏହି ସମୟ ମଧ୍ୟରେ ଧାନ ଫସଲ, କଦଳୀ ଚାଷ ନଷ୍ଟ ହେବା ସହ କେତେକ ସ୍ଥାନରେ ଘର ଭାଙ୍ଗିଥିବା ଖବର ମିଳିଛି। ତେବେ ଆଜି ଏକ ଆଶ୍ଚର୍ଯ୍ୟଜନକ ଘଟଣାକ୍ରମରେ ହାତୀ ଆକ୍ରମଣରୁ ଜଣେ ବାଇକ୍ ଆରୋହୀ ଅଳ୍ପକେ ବର୍ତ୍ତି ଯାଇଥିବା ବେଳେ ତାଙ୍କ ମୋଟରସାଇକେଲକୁ ହାତୀଟି ଭାଙ୍ଗି ଚୂରମାର କରି ଦେଇଛି।
ଯାନୀଗୁଡ଼ା ଠାରୁ ଆଦାନଗୁଡ଼ା ଯିବା ଡେପାଗୁଡ଼ା ଜଙ୍ଗଲ ରାସ୍ତାରେ ଚାରିଟିକିଆ ହାତୀପଲ ସହିତ ବାଇକ୍ ମୁହାଁମୁହିଁ ହୋଇଥିଲା। ହାତୀ ଆକ୍ରମଣର ଭୟରେ ବାଇକ୍ ଚାଳକ ଗାଡ଼ି ଛାଡ଼ି ଦୌଡ଼ି ପଳାଇ ଯାଇଥିଲେ।
ହାତୀପଲ ମଧ୍ୟରୁ ଗୋଟିଏ ଦନ୍ତା ହାତୀ ମୋଟରସାଇକେଲ୍ ନିକଟକୁ ଆସି ଏହାକୁ ଆକ୍ରମଣ କରିଥିଲା। ଭାଇରାଲ ହୋଇଥିବା ଭିଡିଓରେ ହାତୀଟି ଖେଳନା ଭଳି ବାଇକ୍କୁ କଚାଡ଼ୁଥିବାର ଦେଖିବାକୁ ମିଳିଛି, ଫଳରେ ଗାଡ଼ିଟି ସମ୍ପୂର୍ଣ୍ଣ ଭାଙ୍ଗିଯାଇଛି।
ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳିଯାଇଛି। କାଶୀନଗର ବନବିଭାଗ ପକ୍ଷରୁ ସୂଚନା ଦିଆଯାଇଛି ଯେ ହାତୀପଲ ଉପରେ ନଜର ରଖାଯାଇଛି ଏବଂ ସେମାନେ ଏବେ ହରିପୁର ଜଙ୍ଗଲରେ ଅଛନ୍ତି।
