ଭଦ୍ରକ ଅଫିସ,୨୨।୪: ଭଦ୍ରକ-ଆନନ୍ଦପୁର ୫୩ ନଂ ରାଜ୍ୟ ରାଜପଥର ବନ୍ତ ବଜାର ଜଳସେଚନ ଅଫିସ ନିକଟରେ ଆଇରନ ଟ୍ରକ ଧକ୍କାରେ ଜଣେ ଯୁବକଙ୍କ ମୃତ୍ୟୁ ଘଟିଛି। ସ୍ଥାନୀୟ ଲୋକେ ଶୁକ୍ରବାର ରାତିରୁ କ୍ଷତି ପୂରଣ ଦାବିରେ ରାସ୍ତା ରୋକ କରିଛନ୍ତି । ମୃତକ ହେଉଛନ୍ତି ବନ୍ତ ଥାନା ଟିଲୋ ବଡ଼ସାହି ଗ୍ରାମର ଯୁବକ ଶଙ୍କର୍ଷଣ ସାହୁ। ସେ ମଟୋର ସାଇକେଲରେ ଶୁକ୍ରବାର ସାରେ ବନ୍ତ ବଜାରରୁ ଘରକୁ ଫେରୁଥିବା ସମୟରେ ଜଳସେଚନ ଅଫିସ ସମ୍ମୁଖରେ ପାଚେରୀ ନିର୍ମାଣ ପାଇଁ କୁଢ଼ ହୋଇପଡିଥିବା ବାଲି ଓ ଚିପ୍ସ ପାଖରେ ଶଙ୍କର୍ଷଣଙ୍କ ଉପରେ ଆନନ୍ଦପୁର ଦିଗରୁ ଦ୍ରୁତ ଗତିରେ ଆସୁଥିବା ଆଇରନ ବୋଝେଇ ଟ୍ରକଟି ଚଢି ଯାଇଥିଲା । ଗୁରୁତର ଅବସ୍ଥାରେ ତାଙ୍କୁ ଭଦ୍ରକ ମୁଖ୍ୟ ଚିକିତ୍ସାଳୟ ନିଆଯାଇଥିଲା । ପରେ କଟକ ଅଭିମୁଖେ ନେଉଥିବା ସମୟରେ କୁଆଖିଆ ପାଖରେ ତାଙ୍କର ମୃତ୍ୟୁ ଘଟିଛି । ଘଟଣାସ୍ଥଳରେ ଉତ୍ତେଜନା ଦେଖାଦେବା ସହ ଶହଶହ ଲୋକ ଏକାଠି ହୋଇ ରାସ୍ତାରୋକ କରି ଶଙ୍କର୍ଷଣଙ୍କ ପରିବାରକୁ କ୍ଷତିପୂରଣ ସହ, ବେଆଇନ ଭାବରେ ଯାତାୟତ କରୁଥିବା ଆଇରନ ଗାଡିକୁ ସମ୍ପୂର୍ଣ ବନ୍ଦ କରାଯିବା ସହ,ଦୈନନ୍ଦିନ ସକାଳ ୬ ଘଟିକାରୁ ରାତ୍ର ୧୦ ଘଟିକା ପର୍ଯ୍ୟନ୍ତ ବନ୍ଦ ରଖିବାକୁ ଦାବି କରଛନ୍ତି ।
