ଥୁଆମୁଳ ରାମପୁର:୧୭।୬(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୁଳ ରାମପୁର ବ୍ଳକ ସ୍ଥିତ କର୍ଲାପାଟ ଥାନା ଅଞ୍ଚଳରେ ସଡ଼କ ଦୁର୍ଘଟଣା ଦିନକୁ ଦିନ ବୃଦ୍ଧି ପାଉଥିବା ବେଳେ ପୁଣି ସୋମବାର ଏକ ବାଇକ୍ ଦୁର୍ଘଟଣା ଘଟି ଜଣେ ଯୁବକଙ୍କ ମୃତ୍ୟୁ ଘଟିଛି।
ମିଳିଥିବା ସୂଚନା ମୁତାବକ, କଳାହାଣ୍ଡି ଜିଲା ଥୁଆମୁଳ ରାମପୁର ବ୍ଳକ କର୍ଲାପାଟ ଥାନା ଅଧୀନ ପେରମଞ୍ଜି ଗ୍ରାମ ସ୍ଥିତ ଶ୍ମଶାନ ପାଖରେ ଏକ୍ ବାଇକ୍ ଭାରସାମ୍ୟ ହରାଇ ରାସ୍ତା କଡ଼ରେ ଲାଗିଥିବା ଏକ ବିଜୁଳି ଖୁଣ୍ଟରେ ପିଠି ହୋଇଯାଇଥିଲା। ଫଳରେ ଘଟଣାସ୍ଥଳରେ ବାଇକ୍ ଆରୋହୀଙ୍କ ମୃତ୍ୟୁ ଘଟିଥିଲା। ମୃତକ ହେଲେ ଥୁଆମୁଳ ରାମପୁର ବ୍ଳକ ଅଧୀନ ସିଲେଟ ପଞ୍ଚାୟତ ସେମିଖାଲ ଗ୍ରାମର ଡାଲି ମାଝୀଙ୍କ ପୁଅ ସାନି ମାଝୀ ବୋଲି ଜଣାପଡ଼ିଛି।
ରବିବାର ବିଳମ୍ବିତ ରାତିରେ ସାନି ଥୁଆମୁଳ ରାମପୁରରୁ ଭବାନୀପାଟଣା ଯାଉଥିବା ବେଳେ ଏହି ଦୁର୍ଘଟଣା ଘଟିଥିବା କୁହାଯାଉଛି l ଏନେଇ ସୋମବାର ସକାଳେ ଖବର ପାଇ କର୍ଲାପାଟ ଥାନା ଅଧିକାରୀ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଭବାନୀପାଟଣା ମୁଖ୍ୟ ଡାକ୍ତରଖାନାକୁ ପଠାଇଥିଲେ। ଏନେଇ ପୋଲିସ ଏକ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି।
