ପାରାଦୀପ,୨୭।୬(ଶରତ ରାଉତ): ପାରାଦୀପ ଶିଳ୍ପାଞ୍ଚଳର ଏକମାତ୍ର ସରକାରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ବିଜୁ ମେମୋରିଆଲ ହସ୍ପିଟାଲରେ ଏବେ ଡାକ୍ତର ଅଭାବ। ସମୁଦାୟ ୧୦ ଡାକ୍ତର ପଦବୀ ମଧ୍ୟରୁ ୮ଟି ଖାଲି ପଡ଼ିଛି। ଏଭଳି ସମୟରେ ଜଗତ୍ସିଂହପୁର ଜିଲା ପାଇଁ ଚଳିତ ସପ୍ତାହରେ ୨୧ ଜଣ ନୂଆ ଡାକ୍ତରଙ୍କୁ ନିଯୁକ୍ତି ଦିଅଯାଇଛି। କିନ୍ତୁ ପାରାଦୀପ ସିଏଚସି ପାଇଁ ଆଦୌ ନୂଆ ଡାକ୍ତର ନାହାଁନ୍ତି। ଏନେଇ ଆରକେଏସ୍ (ରୋଗୀ କଲ୍ୟାଣ ସମିତି) ସଦସ୍ୟଙ୍କଠାରୁ ଆରମ୍ଭ କରି ସାଧାରଣ ଲୋକେ କ୍ଷୋଭ ପ୍ରକାଶ କରିଛନ୍ତି। ଆରକେଏସ୍ ସଦସ୍ୟ ତଥା ଆଇନଜୀବୀ ସୁରେଶ ଦାସ କୁହନ୍ତି, ପାରାଦୀପ ବିଜୁ ମେମୋରିଆଲ ହସ୍ପିଟାଲ ଉପରେ ୧୫ଟି ବୃହତ୍ତ ଶିଳ୍ପରେ କାମ କରୁଥିବା ଶ୍ରମିକ, କର୍ମଚାରୀ, ପୌରାଞ୍ଚଳରେ ବସବାସ କରୁଥିବା ଅଧିବାସୀଙ୍କ ସମେତ ସ୍ଥାନୀୟ ପଞ୍ଚାୟତ ନୂଆଗଡ, ପାରାଦୀପଗଡ, ଭୂତମୁଣ୍ଡାଇ, କୋଠୀ ଆଦି ଅଞ୍ଚଳର ଲୋକ ନିର୍ଭରଶୀଳ। ଏହାଛଡ଼ା ପ୍ରତିଦିନ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକର ଖରିନାସୀ, ହୁକିଟୋଲା ଅଞ୍ଚଳରୁ ମଧ୍ୟ ଲୋକମାନେ ଏହି ହସ୍ପିଟାଲ ଆସିଥାନ୍ତି। ଏଠାକାର ବହିର୍ବିଭାଗକୁ ଦୈନିକ ୪୦୦ ରୁ ୫୦୦ ରୋଗୀ ଆସୁଛନ୍ତି। ଏତେ ସଂଖ୍ୟକ ରୋଗୀଙ୍କ ପାଇଁ ମାତ୍ର ୨ ଜଣ ଡାକ୍ତର ରହିଛନ୍ତି। ସେମାନଙ୍କ ମଧ୍ୟରୁ ଜଣେ ସିଏମ୍ଓ ଚାର୍ଜରେ ଥିବାରୁ ଅଧିକାଂଶ ସମୟ ସରକାରୀ କାମରେ ବାହାରେ ରହୁଛନ୍ତି। ଆଉ ଜଣେ ଡାକ୍ତର ରାତି ଦିନ ଡ୍ୟୁଟି କରିବା ସମ୍ଭବ ହେଉନାହିଁ। ଏପରିସ୍ଥଳେ ପାରାଦୀପରେ ଖାଲିଥିବା ଡାକ୍ତରୀ ପଦବୀ ମଧ୍ୟରୁ ୨ରୁ ୩ଟି ପୂରଣ ହେବ ବୋଲି ଆମେ ଆଶାବାଦୀ ଥିଲୁ। କିନ୍ତୁ ୨୧ ଜଣଙ୍କ ମଧ୍ୟରେ ଜଣେ ଡାକ୍ତରଙ୍କୁ ଏଠାରେ ନିଯୁକ୍ତି ଦିଆ ନ ଯିବା ଚିନ୍ତାର କାରଣ ପାଲଟିଛି। ସେହିପରି ଆଦର୍ଶପ୍ରୟାସ ସ୍ବେଚ୍ଛାସେବୀ ସଙ୍ଗଠନ ସଭାପତି ଦେବକଲ୍ୟାଣ ମହାପାତ୍ର କୁହନ୍ତି, ବିଜୁ ମେମୋରିଆଲ ହସ୍ପିଟାଲରେ ଜରୁରିକାଳୀନ ଡାକ୍ତର ନିଯୁକ୍ତି ପାଇଁ ପୂର୍ବରୁ ଅନେକ ଥର ଲିଖିତଭାବେ ଅଭିଯୋଗ କରାଯାଇଛି। ୩ ବିଶେଷଜ୍ଞ ଡାକ୍ତର ସମେତ ୪ ଏମବିବିଏସ୍ ଡାକ୍ତରଙ୍କ ଏହି ହସ୍ପିଟାଲରେ ଆବଶ୍ୟକ। ଏଠାରେ ସ୍ତ୍ରୀ ଓ ପ୍ରସୂତ ସମେତ ମେଡିଶିନ ଭଳି ଗୁରୁତ୍ୱପୂର୍ଣ୍ଣ ବିଭାଗରେ ମଧ୍ୟ ଡାକ୍ତର ପଦବୀ ଖାଲି ପଡ଼ିଛି। ଏଭଳିସ୍ଥଳେ ବିଜୁ ମେମୋରିଆଲ ହସ୍ପିଟାଲକୁ ଅଣଦେଖା କରାଯାଇଛି। ତୁରନ୍ତ ଏଠାରେ ଡାକ୍ତର ପଦବୀ ପୂରଣ ନ ହେଲେ ଆନ୍ଦୋଳନ କରାଯିବ ବୋଲି ସେ କହିଛନ୍ତି। ସେହିପରି ନିଯୁକ୍ତି ପ୍ରସଙ୍ଗକୁ ନେଇ ହସ୍ପିଟାଲରେ କାର୍ଯ୍ୟରତ ୨ ଡାକ୍ତର ମଧ୍ୟ ନିରାଶବ୍ୟକ୍ତ କରିଛନ୍ତି। ପାରାଦୀପ ହସ୍ପିଟାଲ ପାଇଁ ନୂଆ ଡାକ୍ତର ନିଯୁକ୍ତି ନ ଦିଆଯିବା ପ୍ରସଙ୍ଗରେ ଜିଲା ମୁଖ୍ୟ ଚିକିତ୍ସାଧିକାରୀ ଡାକ୍ତର କ୍ଷେତ୍ରବାସୀ କୁହନ୍ତି, ଯେଉଁ ୨୧ ଜଣ ଡାକ୍ତର ନିଯୁକ୍ତି ପାଇଛନ୍ତି ସେମାନେ କେବଳ ଆମ ହସ୍ପିଟାଲ ପାଇଁ। କୌଣସି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପାଇଁ ନୁହେଁ। ଗାଇଡଲାଇନ୍ ଆଧାରରେ ନୂଆ ଡାକ୍ତରଙ୍କୁ ଥଇଥାନ କରାଯାଇଛି।
