ନୀଳଗିରି,୫।୮(ସ୍ବ.ପ୍ର.): ବାଲେଶ୍ୱର ଜିଲା ନୀଳଗିରି ବ୍ଲକ ଅଧୀନ ବେଗୁନିଆ ପଞ୍ଚାୟତ ତୋଟାପ ଗ୍ରାମରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ସୋନ ନଦୀ ଉପରେ ୧୧କୋଟି ଟଙ୍କା ବ୍ୟୟରେ ନିର୍ମାଣ ସରିଥିବା ବିଜୁ ସେତୁ ୨ ବର୍ଷ ହେବ ମୁଖ୍ୟରାସ୍ତାକୁ ସଂଯୋଗ ହୋଇପାରିନି। ଘରୋଇ ଜମି ଅଧିଗ୍ରହଣରେ ପ୍ରତିବନ୍ଧକ ଯୋଗୁ ଏଭଳି ସମସ୍ୟା ଉପୁଜିଛି। ଏଥିପ୍ରତି ଦୃଷ୍ଟି ଦେବା ଲାଗି ସ୍ଥାନୀୟ ବାସିନ୍ଦା ଦାବି କରିଛନ୍ତି।
ବେଗୁନିଆ ପଞ୍ଚାୟତ ମଧ୍ୟ ଦେଇ ସୋନ ନଦୀ ବହିଯାଇଛି। ଅଞ୍ଚଳବାସୀ ରାଜ୍ୟ ସରକାରଙ୍କଠାରେ ଦୀର୍ଘଦିନ ଧରି ଦାବି କରିବା ପରେ ପ୍ରଶାସନ ଗମନାଗମନ ସୁବିଧାକୁ ଲକ୍ଷ୍ୟ ରଖି ସୋନ ନଦୀ ଉପରେ ସେତୁ ନିମାଣ ପାଇଁ ୧୧କୋଟି ଟଙ୍କା ବ୍ୟୟ ଓ ସରକାରଙ୍କ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଗତ ୨୦୧୮ରେ ଅର୍ଥ ମଞ୍ଜୁର ହେବା ପରେ ବେଗୁନିଆ ପଞ୍ଚାୟତରେ ବିଜୁ ସେତୁର ଶିଳାନ୍ୟାସ ପରେ କାର୍ଯ୍ୟ ଆରମ୍ଭ ହୋଇଥିଲା। ଆଜକୁ ୨ ବର୍ଷ ହେବ ସମ୍ପୃକ୍ତ ଠିକାଦାର ସେତୁର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ କରିସାରିଛନ୍ତି। ହେଲେ ସେତୁର ଗୋଟିଏ ପାଖ ସଂଯୋଗ ହୋଇନାହିଁ। ସେତୁରୁ ମୁଖ୍ୟ ରାସ୍ତା ମଧ୍ୟରେ କିଛି ଘରୋଇ ଜମି ରହିଥିବାରୁ ଜମି ମାଲିକ ରାସ୍ତା ଛାଡୁନାହାନ୍ତି। ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଅନ୍ୟପକ୍ଷରେ ବର୍ଷାଦିନେ ଉକ୍ତ ପଞ୍ଚାୟତବାସୀ ନଦୀର ଦୁଇ ପାଖରେ ରହିଥିବାରୁ ଯିବାଆସିବା ପାଇଁ ବହୁ ଅସୁବିଧାର ସମ୍ମୁଖୀନ ହୋଇଥାଆନ୍ତି। ଉକ୍ତ ନଦୀ ଦେଇ ନ ଗଲେ ୧୫ କି.ମି. ବୁଲିବାକୁ ପଡେ। ଉକ୍ତ ରାସ୍ତା ମୟୂରଭଞ୍ଜକୁ ସଂଯୋଗ କରିବା ସହ ଦୋବାଟି, ହରିପୁର, ପଥରଗ ସୁଜୁପୂର, ନିଶଙ୍ଖପୁର, ଶଂସାପାଳ, ଡୁମଗଣ୍ଡିରା, ଭକ୍ତାନନ୍ଦପୁର, ତୋଟାପଡା଼, କୁସୁନପୁର, ଦୁର୍ଗାଦେବୀ ସମେତ ରେମୁଣା ବ୍ଲକର ବନ୍ଧୁ ଗ୍ରାମବାସୀ ଉପକୃତ ହୋଇଥାନ୍ତି ।
ସେପଟେ ଗ୍ରାମ୍ୟ ଉନ୍ନୟନ ବିଭାଗ ହାତ ଉପରେ ହାତ ଦେଇ ବସିରହିଛି । ଏ ସମ୍ପର୍କରେ ଗ୍ରାମ୍ୟ ଉନ୍ନୟନ ବିଭାଗର ଏସ୍ଡିଓ ଈଶ୍ୱରୀ ପ୍ରସାଦ ଦାସ କହିଛନ୍ତି, ସେତୁ ଓ ମୁଖ୍ୟ ରାସ୍ତା ମଧ୍ୟରେ ୯ଜଣଙ୍କ ଘରୋଇ ଚାଷ ଜମି ରହିଛି । କିଛି ଜମି ମାଲିକଙ୍କ ସହ ଯୋଗାଯୋଗ ହୋଇଥିବା ବେଳେ ଅନ୍ୟମାନଙ୍କ ସହ ଯୋଗାଯୋଗରେ ଅଛୁ ।
