ପାଟନା,୨୧।୩ : ବିହାର ବୋର୍ଡ ଦ୍ୱାଦଶ ପରୀକ୍ଷା ଫଳ ୨୦୨୩ ଘୋଷଣା କରାଯାଇଛି। ପାଟନାରେ ଥିବା ବିଏସବି କାର୍ଯ୍ୟାଳୟରେ ଶିକ୍ଷା ମନ୍ତ୍ରୀ ଏହି ଫଳାଫଳ ଘୋଷଣା କରିଛନ୍ତି। ଫଳାଫଳ ବିହାର ସ୍କୁଲ ପରୀକ୍ଷା ବୋର୍ଡ (ବିଏସଇବି) ର ଅଫିସିଆଲ ୱେବସାଇଟରେ ଅପରାହ୍ନ ୨ ଟାରେ ଏହା ଅପଲୋଡ ହୋଇଛି ।
ବିହାର ଦ୍ୱାଦଶ ବୋର୍ଡ ପରୀକ୍ଷା ୧ ଫେବୃଆରୀ ୨୦୨୩ ରୁ ୧୧ ଫେବୃଆରୀ ପର୍ଯ୍ୟନ୍ତ ଦୁଇଟି ଶିଫ୍ଟରେ କରାଯାଇଥିଲା।
ବିହାର ଦ୍ୱାଦଶ ବୋର୍ଡ ପରୀକ୍ଷା ଫଳ ବିହାର ବୋର୍ଡର ଅଫିସିଆଲ ୱେବସାଇଟରେ biharboardonline.bihar.gov.in କିମ୍ବା onlinebseb.in କିମ୍ବା results.biharboardonline.com ରେ ଯାଞ୍ଚ କରାଯାଇପାରିବ ।
ବିହାର ବୋର୍ଡ ଦ୍ୱାଦଶ ବିଜ୍ଞାନ, କଳା ଏବଂ ବାଣିଜ୍ୟରେ ଛାତ୍ରୀ ମାନେ ବାଜିମାତ୍ କରିଛନ୍ତି। ୪୭୨ ମାର୍କ ରଖି ବିଜ୍ଞାନରେ ଆୟୁଷୀ ନନ୍ଦନ ବିହାର ବୋର୍ଡ ସାଇନ୍ସ ଟପ୍ପର ହୋଇଛନ୍ତି। ସେହିପରି ୪୭୫ ମାର୍କ ରଖି ମହମ୍ମଦସା କଳାରେ ଟପ୍ପର ହୋଇଛନ୍ତି। ଅପରପକ୍ଷରେ ବାଣିଜ୍ୟରେ ୪୭୫ ମାର୍କ ରଖି ସୋମ୍ୟା ଶର୍ମା ଟପ୍ପର ହୋଇଛନ୍ତି।
ପରୀକ୍ଷାରେ ୮୩.୪ ପ୍ରତିଶତ ଛାତ୍ରିଛାତ୍ର ପାସ କରିଛନ୍ତି। ଚଳିତ ବର୍ଷ ବିହାର ବୋର୍ଡର ଦ୍ୱାଦଶ ପରୀକ୍ଷାରେ ସମୁଦାୟ ୧୩,୦୪,୫୮୬ ଛାତ୍ରୀଛାତ୍ର ଉପସ୍ଥିତ ଥିଲେ। ଏଥିମଧ୍ୟରୁ ୬,୩୧,୫୬୩ ଜଣ ଛାତ୍ରୀ ଏବଂ ୬,୭୩,୦୨୩ ଜଣ ଛାତ୍ର ଥିଲେ। ବିହାର ବୋର୍ଡ ଦ୍ୱାରା ପାଟନାରେ ୮୦ଟି ପରୀକ୍ଷା କେନ୍ଦ୍ର ପ୍ରତିଷ୍ଠା କରାଯାଇଥିଲା, ଯେଉଁଠାରେ ବୋର୍ଡ ପରୀକ୍ଷା ପାଇଁ ୭୯,୬୪୧ ଛାତ୍ରୀଛାତ୍ର ଉପସ୍ଥିତ ଥିଲେ।
