ନୂଆଦିଲ୍ଲୀ,୩ା୮: ୧ କୋଟିରୁ ଅଧିକ କେନ୍ଦ୍ର ସରକାରୀ କର୍ମଚାରୀ ଏବଂ ପେନ୍ସନ୍ଭୋଗୀ ଖୁବ୍ଶୀଘ୍ର ଖୁସି ଖବର ପାଇବାକୁ ଯାଉଛନ୍ତି। ରିପୋର୍ଟ ଅନୁଯାୟୀ, ଅର୍ଥ ମନ୍ତ୍ରଣାଳୟର ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ ରାଜ୍ୟସଭାରେ ଏକ ଲିଖିତ ଉତ୍ତରରେ କହିଛନ୍ତି ଯେ, ସରକାରଙ୍କୁ ବିଭିନ୍ନ ଅଂଶୀଦାରଙ୍କଠାରୁ ସୂଚନା ମିଳିଛି ଏବଂ ଉପଯୁକ୍ତ ସମୟରେ ସରକାରୀ ବିଜ୍ଞପ୍ତି ଘୋଷଣା କରାଯିବ।
ସେ ସୂଚନା ଦେଇଛନ୍ତି, ଅଷ୍ଟମ ବେତନ କମିଶନ ନିର୍ଦ୍ଧାରିତ ସମୟସୀମା ମଧ୍ୟରେ ତାଙ୍କର ସୁପାରିସ ଦାଖଲ କରିବ, ଯାହା ସମୟ ମଧ୍ୟରେ ଜଣାଇ ଦିଆଯିବ। କେନ୍ଦ୍ର ସରକାର ଜାନୁଆରୀ ୧୬ରେ ଅଷ୍ଟମ ବେତନ କମିଶନ ଘୋଷଣା କରିଥିଲେ। ବର୍ତ୍ତମାନ ୬ ମାସରୁ ଅଧିକ ସମୟ ବିତିଗଲାଣି କିନ୍ତୁ ବର୍ତ୍ତମାନ ପର୍ଯ୍ୟନ୍ତ ନୂତନ ବେତନ କମିଶନର ଅଧ୍ୟକ୍ଷ ଏବଂ ସଦସ୍ୟଙ୍କ ନିଯୁକ୍ତି ସମ୍ପର୍କରେ କୌଣସି ସରକାରୀ ଘୋଷଣା କରାଯାଇ ନାହିଁ। ସପ୍ତମ ବେତନ କମିଶନର ୧୦ ବର୍ଷର କାର୍ଯ୍ୟକାଳ ୩୧ ଡିସେମ୍ବର ୨୦୨୫ରେ ଶେଷ ହେବାକୁ ଥିବା ବେଳେ ଏହି କମିଶନର କାର୍ଯ୍ୟକାଳ ୧ ଜାନୁଆରୀ ୨୦୨୬ରୁ ଆରମ୍ଭ ହେବାକୁ ଯାଉଛି।
ସାଧାରଣତଃ ସରକାର ପ୍ରତି ୧୦ ବର୍ଷରେ ଏକ ବେତନ କମିଶନ ଗଠନ କରି କର୍ମଚାରୀଙ୍କ ଦରମା ସମୀକ୍ଷା ଏବଂ ସଂଶୋଧନ କରନ୍ତି। ଏଠାରେ କେନ୍ଦ୍ର ୮ମ କେନ୍ଦ୍ରୀୟ ବେତନ କମିଶନ (CPC) ଗଠନ ଘୋଷଣା କରିବାର ୬ ମାସରୁ ଅଧିକ ସମୟ ବିତିଯାଇଛି, କିନ୍ତୁ ଏପର୍ଯ୍ୟନ୍ତ ଏହି ପ୍ରସଙ୍ଗର ସମାଧାନ ହୋଇନାହିଁ। ଏହା କାର୍ଯ୍ୟକାରୀ ହେବା ପରେ ଲକ୍ଷ ଲକ୍ଷ କର୍ମଚାରୀ ଏବଂ ପେନ୍ସନ୍ଭୋଗୀଙ୍କ ଦରମା, ପେନ୍ସନ୍ ଏବଂ ଭତ୍ତାରେ ଉନ୍ନତି ଆସିବ। ବର୍ତ୍ତମାନ ୧୦ ବର୍ଷର ଚକ୍ର ଅନୁଯାୟୀ, ୮ମ ବେତନ କମିଶନ ୨୦୨୪-୨୫ରେ କାର୍ଯ୍ୟକାରୀ ହେବାକୁ ଯାଉଛି। ଯାହା ଫଳରେ ସରକାରୀ ଚାକିରିଆମାନେ ଉପକୃତ ହେବେ।
