ନୂଆଦିଲ୍ଲୀ,୨୧।୧: ଜାନୁଆରୀ ୨୫ରୁ ଆରମ୍ଭ ହେବାକୁ ଯାଉଥିବା ଭାରତ ବିପକ୍ଷ ୫ ଟେଷ୍ଟ ମ୍ୟାଚ ବିଶିଷ୍ଟ ସିରିଜ ପୂର୍ବରୁ ଇଂଲଣ୍ଡ ଦଳ ଏକ ବଡ଼ ଝଟ୍କା ଲାଗିଛି। ଇଂଲଣ୍ଡ ତାରକା ବ୍ୟାଟ୍ସମ୍ୟାନ ହ୍ୟାରି ବ୍ରୁକ ଭାରତ ବିପକ୍ଷ ଟେଷ୍ଟ ସିରିଜରୁ ବାଦ୍ ପଡ଼ିଛନ୍ତି। ଇଂଲଣ୍ଡ ଏବଂ ୱେଲ୍ସ କ୍ରିକେଟ ବୋର୍ଡ ଏକ ବିବୃତ୍ତି ଜାରି କରି କହିଛି ଯେ, ବ୍ୟକ୍ତିଗତ କାରଣରୁ ହ୍ୟାରି ବ୍ରୁକ ଇଂଲଣ୍ଡକୁ ଫେରୁଛନ୍ତି ଏବଂ ଟେଷ୍ଟ ସିରିଜ ଖେଳିବା ପାଇଁ ହ୍ୟାରି ବ୍ରୁକ ଭାରତକୁ ଫେରିବେ ନାହିଁ । ଏହି କଷ୍ଟ ସମୟରେ ଗୋପନୀୟତା ପାଇଁ ବ୍ରୁକଙ୍କ ପରିବାର ନିବେଦନ କରିଛନ୍ତି। ଆମେ ଚାହୁଁ ଯେ ବ୍ରୁକ ପରିବାରର ଗୋପନୀୟତା ପ୍ରତି ଯତ୍ନବାନ ହେବା ଉଚିତ ଏବଂ ସେମାନଙ୍କର ବ୍ୟକ୍ତିଗତ ସ୍ଥାନ ଏଥିରେ ହସ୍ତକ୍ଷେପ କରାଯିବା ଉଚିତ୍ ନୁହେଁ। ଇସିବି ଦ୍ୱାରା ହ୍ୟାରି ବ୍ରୁକଙ୍କ ସ୍ଥାନ ଏପର୍ଯ୍ୟନ୍ତ ଘୋଷଣା କରାଯାଇ ନାହିଁ।
ଇଂଲଣ୍ଡର ମଧ୍ୟମ କ୍ରମରେ ହ୍ୟାରି ବ୍ରୁକ ଅନ୍ୟତମ ବିପଜ୍ଜନକ ଖେଳାଳି। ଟେଷ୍ଟ କ୍ରିକେଟରେ ଡେବ୍ୟୁ କରିବା ଦିନଠାରୁ ବ୍ରୁକ ଏକ ଚର୍ଚ୍ଚାର ବିଷୟ ପାଲଟିଛନ୍ତି ଏବଂ ତାଙ୍କୁ କ୍ରିକେଟ ଜଗତର ପରବର୍ତ୍ତୀ ବଡ଼ ତାରକା ଭାବରେ ଦେଖାଯାଉଛି। ଏପର୍ଯ୍ୟନ୍ତ ୧୨ଟି ଟେଷ୍ଟ ମ୍ୟାଚ ଖେଳିବାବେଳେ ବ୍ରୁକ ୧୧୮୧ରନ ସଂଗ୍ରହ କରିଛନ୍ତି। ବ୍ରୁକଙ୍କ ହାରାହାରି ୬୨.୧୬ ରହିଛି। କେବଳ ଏତିକି ନୁହେଁ, ବ୍ରୁକ ଟେଷ୍ଟ କ୍ରିକେଟ ରେ ୪ଶତକ ଏବଂ ୭ ଅର୍ଦ୍ଧଶତକ ହାସଲ କରିଛନ୍ତ।
