ପଦ୍ମପୁର,୯।୯(ପ୍ରଦୀପ୍ତ ଦାଶ) ପଦ୍ମପୁର ଜିଲା କୃଷି ବିଭାଗ କାର୍ଯ୍ୟାଳୟରେ ଏକ ବଡ ଧରଣର କେଲେଙ୍କାରୀ ସାମ୍ନାକୁ ଆସିଛି । କାର୍ଯ୍ୟାଳୟର ବରିଷ୍ଠ କିରାଣୀ ଏବଂ ପିଅନ ଲକ୍ଷାଧିକ ଟଙ୍କା ଉଠାଇ ନେଇଥିବା ପଦ୍ମପୁର ଥାନାରେ ଜିଲା କୃଷି ଅଧିକାରୀ ପ୍ରଭାସ ଚନ୍ଦ୍ର ପଣ୍ଡା ଲିଖିତ ଅଭିଯୋଗ କରିଛନ୍ତି ।
ଅଭିଯୋଗ ମୁତାବକ, ପଦ୍ମପୁର ବରିକେଲରେ ଥିବା ଜିଲା କୃଷି ଅଧିକାରୀଙ୍କ କାର୍ଯାଳୟର ବରିଷ୍ଠ କିରାଣୀ କ୍ଷୀରୋଦ୍ର ଭୋଇ ଗତ୨୨।୭।୨୫ ତାରିଖରେ ବିଲ ନମ୍ବର ୨୩ରେ ୧୪ଲକ୍ଷ ୬୦ହଜାର ୧୦ ଟଙ୍କା ଓ ତା ୧୧.୬.୨୫ରେ ୮ଲକ୍ଷ ୨୪ହଜାର ୨୨୫ ଟଙ୍କା ମୋଟ ୨୨ ଲକ୍ଷ ୩୦ ହଜାର ୨୨୫ ଟଙ୍କା ପିଅନ ରୂପକ ସାହୁଙ୍କ ଏଚଡିଏଫସି ବ୍ୟାଙ୍କ ଏକାଉଣ୍ଟକୁ ଟ୍ରାନ୍ସଫର ହୋଇଥିଲା ।
ଏହି ଘଟଣା ପଦ୍ମପୁର ସବ୍ ଟ୍ରେଜେରୀରୁ ଜିଲା କୃଷି ଅଧିକାରୀ ପଣ୍ଡା ଜାଣିବା ପରେ ଗତ ୫ ତାରିଖରେ ପଦ୍ମପୁର ଥାନାରେ ଲିଖିତ ଅଭିଯୋଗ କରିଥିଲେ । ଏନେଇ ପଦ୍ମପୁର ଥାନାରେ ଧାରା ୩୧୬ (୪), ୩୧୮ (୪)୩୦୫ E/୩(୫)ରେ ଏକ ମାମଲା(ନମ୍ବର ୨୪୦/୨୫) ମାମଲା ରୁଜୁ ହୋଇଥିଲା।
ପୋଲିସ ତଦନ୍ତ ପରେ କିରାଣୀ କ୍ଷୀରୋଦ୍ର ମେହେଙ୍କୁ ବରିକେଲ ଅଫିସ ବାସଭବନରୁ ଗିରଫ କରି କୋର୍ଟ ଚାଲାଣ କରିଛି। ସେହିପରି ପିଅନ ରୂପକ ସାହୁ ଫେରାର ଥିବା ପୋଲିସ ପକ୍ଷରୁ କୁହାଯାଇଛି। ଉଭୟ କିରାଣୀ ଓ ପିଅନ ଗତ ୧୧ତାରିଖରୁ କାର୍ଯ୍ୟାଳୟକୁ ଆସୁ ନ ଥିଲେ। ଏ ସମ୍ପର୍କରେ ଜିଲା କୃଷି ଅଧିକାରୀ ପ୍ରଭାସ ଚନ୍ଦ୍ର ପଣ୍ଡାଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ଉଠାଇ ନ ଥିଲେ । ମାମଲାକୁ ପଦ୍ମପୁର ଥାନା ଏସ୍ଆଇ ପ୍ରମିଳା ମରି ତଦନ୍ତ କରୁଛନ୍ତି।
