ଇସଲାମାବାଦ୍,୬ା୩: ଇରାନ ସହିତ ଚାଲିଥିବା ଯୁଦ୍ଧ ମଧ୍ୟରେ ଆରବ ଦେଶଗୁଡ଼ିକୁ ଆଉ ଏକ ବଡ଼ ଝଟକା ଲାଗିଛି। ପେଟ୍ରୋଲ-ଡିଜେଲକୁ ନେଇ ସବୁଠି ଦେଖା ଦେଇଛି ବଡ ସଙ୍କଟ। ଏହାରି ମଧ୍ୟରେ ସାମ୍ନାକୁ ଆସିଛି ଏକ ବଡ ଖବର। ଇରାନ ଉପରେ ଆକ୍ରମଣ ପାଇଁ ତୈଳ ଯୋଗାଣ ହେଉଛି ବାଧାପ୍ରାପ୍ତ। ଏହି ଯୁଦ୍ଧ ତୈଳ ସଙ୍କଟକୁ ଆହୁରି ବୃଦ୍ଧି କରୁଛି। ଇରାନ-ଇସ୍ରାଏଲ ଯୁଦ୍ଧ ପାଇଁ ଏବେ ତେଲ ଦର ମଧ୍ୟ ଦିନକୁ ଦିନ ବୃଦ୍ଧି ପାଇବାରେ ଲାଗୁଛି! ଆଜି ମଧ୍ୟ ଦେଶରେ ୧୦୦ ଟଙ୍କା ଉପରେ ତେଲ ଦର ଥିବା ବେଳେ, ଏହି ଯୁଦ୍ଧ ଟେନସନ୍ କୁ ଆହୁରି ବୃଦ୍ଧି କରୁଛି। ତେବେ ଏହାରି ଭିତରେ ତୈଳକୁ ନେଇ ସାମ୍ନାକୁ ଆସିଛି ଏକ ବଡ ଖବର।
ପାକିସ୍ତାନରେ ପେଟ୍ରୋଲ ଏବଂ ଡିଜେଲ ଷ୍ଟକ୍ ଦ୍ରୁତ ଗତିରେ ହ୍ରାସ ପାଉଛି। ଆଶଙ୍କା କରାଯାଉଛି ଯେ ଦେଶରେ କେବଳ ଆଉ ମାତ୍ର କିଛି ଦିନ ପାଇଁ ତେଲ ବାକି ଅଛି। ପାକିସ୍ତାନ ପେଟ୍ରୋଲିୟମ୍ ଡିଲର୍ସ ଆସୋସିଏସନ୍ (PPDA) ଏବେ କହିଛି ଯେ ସରକାର ୨୦-୨୫ ଦିନର ଯୋଗାଣ ଦାବି କରୁଥିବା ବେଳେ, ଗତ ତିନି ଦିନ ଧରି ସେମାନଙ୍କୁ କୌଣସି ତେଲ ମିଳିନାହିଁ।
ଗୁରୁବାର ଦିନ PPDA ନେତାମାନେ ଏକ ଚେତାବନୀ ଜାରି କରି ଅଭିଯୋଗ କରିଛନ୍ତି ଯେ ପେଟ୍ରୋଲିୟମ୍ କମ୍ପାନୀଗୁଡ଼ିକ ଯୋଗାଣ ହ୍ରାସ କରିଛନ୍ତି ଏବଂ ଧମକ ଦେଇଛନ୍ତି ଯେ ଯଦି ଯୋଗାଣରେ ଉନ୍ନତି ନହୁଏ, ତେବେ ଆଗାମୀ କିଛି ଦିନ ମଧ୍ୟରେ ପେଟ୍ରୋଲ ପମ୍ପ ବନ୍ଦ ହୋଇପାରେ। ଆସୋସିଏସନ୍ କହିଛି ଯେ ସମସ୍ତ OMC ସେମାନଙ୍କୁ ହଇରାଣ କରୁଛନ୍ତି। ଏହି ସପ୍ତାହାନ୍ତ ସୁଦ୍ଧା, ପାକିସ୍ତାନର ତୈଳ ଯୋଗାଣ ପ୍ରାୟତଃ ଶେଷ ହୋଇଯିବ। ସେହିପରି, କିଛି ଦିନ ମଧ୍ୟରେ ଦେଶରୁ ପେଟ୍ରୋଲ ଏବଂ ଡିଜେଲ ଅଦୃଶ୍ୟ ହୋଇଯିବା ଭଳି ମନେ ହେଉଛି।
ଆସୋସିଏସନର କେନ୍ଦ୍ରୀୟ ସମ୍ପାଦକ ଚୌଧୁରୀ ଇରଫାନ ଏଲାହି କହିଛନ୍ତି ଯେ, ଇନ୍ଧନ ଯୋଗାଣରେ ଅଭାବ ଯୋଗୁଁ ପରିସ୍ଥିତି ଚିନ୍ତାଜନକ ହୋଇପଡ଼ିଛି। ସେ ଆହୁରି କହିଛନ୍ତି ଯେ, “ଡିଜେଲ ଯୋଗାଣ ଯଥେଷ୍ଟ ହ୍ରାସ ପାଇଛି, ମାତ୍ର ୨୦% କୁ ହ୍ରାସ ପାଇଛି, ଏବଂ ପେଟ୍ରୋଲ ଯୋଗାଣ ମଧ୍ୟ ଯଥେଷ୍ଟ ହ୍ରାସ ପାଇଛି।” ଇଲାହି ଏହା ମଧ୍ୟ ଦାବି କରିଛନ୍ତି ଯେ ତେଲ ଯୋଗାଣ ଅଭାବ ଯୋଗୁଁ ଇନ୍ଧନ ମୂଲ୍ୟ ଦ୍ରୁତ ଗତିରେ ବୃଦ୍ଧି ପାଉଛି, ଡିଜେଲ ମୂଲ୍ୟ 17 ଟଙ୍କା ପାକିସ୍ତାନୀ ମୁଦ୍ରା ଏବଂ ପେଟ୍ରୋଲ ମୂଲ୍ୟ 35 ପାକିସ୍ତାନୀ ମୁଦ୍ରା ହିସାବରେ ବୃଦ୍ଧି ପାଉଛି।
