ଝାରସୁଗୁଡ଼ା ଅଫିସ,୨୮ା୫: ବ୍ରଜରାଜନଗର ଉପନିର୍ବାଚନ ପ୍ରଚାରରେ ଭୋଜପୁରୀ ଅଭିନେତା ତଥା ଉତ୍ତରପ୍ରଦେଶ ଭାଜପା ରାଜ୍ୟ କାର୍ଯ୍ୟକାରିଣୀ ସଦସ୍ୟ ଦିନେଶ ଲାଲ୍ ଯାଦବ ଶୁକ୍ରବାର ଭାଜପା ପ୍ରାର୍ଥିନୀ ରାଧାରାଣୀ ପଣ୍ଡାଙ୍କ ସପକ୍ଷରେ ପ୍ରଚାର କରିଥିଲେ। ଦଳ ତରଫରୁ ବ୍ରଜରାଜନଗର ମଣ୍ଡଳିଆ ଛକରେ ଅଭିନେତା ଯାଦବଙ୍କୁ ସ୍ବାଗତ ସମ୍ବର୍ଦ୍ଧନା ଦିଆଯାଇଥିଲା। ପରେ ଏକ ଖୋଲା ଭ୍ୟାନରେ ପ୍ରାର୍ଥିନୀ ପଣ୍ଡା, ଭାଜପା ରାଜ୍ୟ ସମ୍ପାଦକ ଟଙ୍କଧର ତ୍ରିପାଠୀଙ୍କ ସହ ଅଭିନେତା ଯାଦବ ରୋଡ୍ ଶୋ’ରେ ବାହାରିଥିଲେ। ଏହା ମଣ୍ଡଳିଆ ଛକରୁ ବାହାରି କାଳୀନଗର, ବୁଢିଯାମ ଓ ଲମଟିବାହାଲ ଦେଇ ବ୍ରଜରାଜନଗର ପୌରାଞ୍ଚଳର ବିଭିନ୍ନ ଓ୍ବାର୍ଡ ପରିକ୍ରମା କରିଥିଲା। ଏହି ସମୟରେ ଭୋଜପୁରୀ ଅଭିନେତାଙ୍କୁ ଦେଖିବା ପାଇଁ ବିଭିନ୍ନ ସ୍ଥାନରେ ଲୋକଙ୍କ ସମାଗମ ହୋଇଥିଲା। ରୋଡ୍ ଶୋ ସମୟରେ ଅଣଓଡିଆ ଭୋଟରଙ୍କୁ ଅଭିନେତା ଭୋଜପୁରୀ ଭାଷାରେ ଭାଷଣ ଦେବାବେଳେ ଲୋକେ ରାଧାରାଣୀ ପଣ୍ଡା ଜିନ୍ଦାବାଦ ବୋଲି ସ୍ଲୋଗାନ ଦେଇଥିଲେ। ଅଭିନେତା ଯାଦବ ତାଙ୍କ ବକ୍ତବ୍ୟରେ କହିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଦେଶ ବିକାଶ ପଥରେ ଆଗେଇଚାଲିଛି। ଓଡ଼ିଶାରେ ଭାଜପାକୁ ଅଧିକ ସୁଦୃଢ କରିବା ପାଇଁ ପଦ୍ମଫୁଲ ଚିହ୍ନରେ ଭୋଟ୍ଦେଇ ପ୍ରାର୍ଥିନୀ ପଣ୍ଡାଙ୍କୁ ବିଜୟୀ କରିବା ପାଇଁ ସେ ନିବେଦନ କରିଥିଲେ।
