ରାଜନଗର, ୧୪ା୧ (ଡି.ଏନ.ଏ.): ବିଶ୍ୱତାପନ ଜଳବାୟୁ ପରିବର୍ତ୍ତନ ସତ୍ତ୍ୱେ ପ୍ରକୃତିର ଅନବଦ୍ୟ ସୃଷ୍ଟି ଲୁଣା ଜଙ୍ଗଲ ଅବକ୍ଷୟର ଦ୍ୱାରଦେଶରେ ପହଞ୍ଚତ୍ଛି। ଭାରତ ସରକାରଙ୍କ ଅଧୀନରେ ଥିବା ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ ପକ୍ଷରୁ ସଦ୍ୟ ପ୍ରକାଶିତ ଲୁଣା ଜଙ୍ଗଲ ସର୍ଭେ ରିପୋର୍ଟରେ ଭିତରକନିକାରେ ଥିବା ଲୁଣା ଜଙ୍ଗଲ ବୃଦ୍ଧି ପାଇ ସମଗ୍ର ଦେଶରେ ପ୍ରଥମ ସ୍ଥାନ ଅଧିକାର କରିଛି। ଏହାକୁ ନେଇ ପ୍ରକୃତି ପ୍ରେମୀ, ପରିବେଶବିତଙ୍କ ମଧ୍ୟରେ ଆନନ୍ଦ ପ୍ରକାଶ ପାଇଛି। ବଙ୍ଗୋପସାଗର ତଟରେ ଗଢି ଉଠିଥିବା ଭିତରକନିକାର ଲୁଣା ଜଙ୍ଗଲ କ୍ରମାଗତ ଭାବେ ସାମୁଦ୍ରିକ ଝଡ ଓ ପ୍ରାକୃତିକ ବିପର୍ଯ୍ୟୟର ମୁକାବିଲା କରି ଆସୁଛି। ପ୍ରତିକୂଳ ପରିବେଶ ସତ୍ତ୍ୱେ ଲୁଣା ଜଙ୍ଗଲ ବୃଦ୍ଧି ଘଟି ଚାଲିଛି। ସଦ୍ୟ ରିପୋର୍ଟ ଅନୁଯାୟୀ ସମଗ୍ର ଦେଶରେ ୧୭ ବର୍ଗ କି.ମି. ଲୁଣା ଜଙ୍ଗଲ ବୃଦ୍ଧି ପାଇଥିବାବେଳେ ସେଥିମଧ୍ୟରୁ ୮ ବର୍ଗ କି.ମି. କେବଳ ଭିତରକନିକା ଜାତୀୟ ଉଦ୍ୟାନରେ ବୃଦ୍ଧି ପାଇଛି। ଫରେଷ୍ଟ ସର୍ଭେ ଅଫ୍ ଇଣ୍ଡିଆ ୨୦୨୧ ରିପୋର୍ଟ ଅନୁଯାୟୀ ଆନ୍ଧ୍ରପ୍ରଦେଶରେ ୨୦୧୯ ସର୍ଭେ ତୁଳନାରେ ୧ ବର୍ଗ କି.ମି., ଗୋଆରେ ୧ ବର୍ଗ କି.ମି., କର୍ଣ୍ଣାଟକରେ ୩ ବର୍ଗ କି.ମି., ମହାରାଷ୍ଟ୍ରରେ ୪ ବର୍ଗ କି.ମି., ପଶ୍ଚିମବଙ୍ଗରେ ୨ ବର୍ଗ କି.ମି. ଓ ଓଡ଼ିଶାରେ ୮ ବର୍ଗ କି.ମି. ଲୁଣା ଜଙ୍ଗଲ ବୃଦ୍ଧି ପାଇଛି। ଏହାବାଦେ ଗୁଜୁରାଟରେ ୨ ବର୍ଗ କି.ମି. ଲୁଣା ଜଙ୍ଗଲ ହ୍ରାସ ପାଇଥିବାବେଳେ କେରଳ, ତାମିଲନାଡୁ, ଆଣ୍ଡାମାନ ନିକୋବର, ଡାମନଡିଉ ଓ ପୁଡୁଚେରୀରେ ଲୁଣା ଜଙ୍ଗଲ ସ୍ଥିତି ଯାହା ଥିଲା ସମାନ ରହିଛି। ରିପୋର୍ଟ ଅନୁଯାୟୀ ଓଡ଼ିଶାର ବାଲେଶ୍ୱର ଜିଲାରେ ୦.୩୩ ବର୍ଗ କି.ମି., ଜଗତ୍ସିଂହପୁର ଜିଲାରେ ୦.୨୭ ବର୍ଗ କି.ମି. ଲୁଣା ଜଙ୍ଗଲ ବୃଦ୍ଧି ପାଇଛି। କେନ୍ଦ୍ରାପଡା ଅର୍ଥାତ୍ ଭିତରକନିକାରେ ୭.୭୬ ବର୍ଗ କି.ମି. ଲୁଣା ଜଙ୍ଗଲ ବୃଦ୍ଧି ପାଇଛି। ପୁରୀରେ ୦.୦୨ ପ୍ରତିଶତ ଲୁଣା ଜଙ୍ଗଲ ହ୍ରାସ ପାଇଥିବାବେଳେ ଭଦ୍ରକରେ ସ୍ଥିତି ସମାନ ରହିଛି।
