ନୂଆଦିଲ୍ଲୀ,୧୨।୯: ଭାରତ ଯୋଡ ଯାତ୍ରା ମଧ୍ୟରେ ସୋମବାର କଂଗ୍ରେସ ଏକ ବିବାଦୀୟ ଫଟୋ ଶେୟାର କରିଛି। କଂଗ୍ରେସ ନିଜର ଅଫିସିଆଲ ଟୁଇଟର୍ ହ୍ୟାଣ୍ଡେଲରୁ ନିଆଁ ଲାଗିଥିବା ଆରଏସଏସ ପ୍ୟାଣ୍ଟର ଏକ ଫଟୋ ପୋଷ୍ଟ କରିଛି। ଏହି ଫଟୋ ମାଧ୍ୟମରେ କଂଗ୍ରେସ ଆରଏସଏସ-ଭାଜପାକୁ ଟାର୍ଗେଟ କରିଛି। ଟୁଇଟରରେ ଏହି ଫଟୋ ପୋଷ୍ଟ କରି କଂଗ୍ରେସ ଲେଖିଛି ଯେ ଦେଶକୁ ଘୃଣାଭାବରୁ ମୁକ୍ତ କରିବା ଏବଂ ଆରଏସଏସ-ଭାଜପା ଦ୍ୱାରା ହୋଇଥିବା କ୍ଷୟକ୍ଷତିର ଆକଳନ କରିବା ପାଇଁ ଆମେ ପ୍ରତ୍ୟେକ ପଦକ୍ଷେପ ନେଉଛୁ। ଫଟା ଆରଏସଏସ ପ୍ୟାଣ୍ଟରେ ନିଆଁ ଜଳୁଥିବା ଦେଖାଯାଉଛି ଏବଂ ଧୂଆଁ ମଧ୍ୟ ବାହାରୁଛି। ଫଟୋ ଉପରେ ‘ଆଉ ୧୪୫ ଦିନ ବାକି ଅଛି’ ଲେଖାଯାଇଛି। ଏହାକୁ ନେଇ ରାଜନୀତି ତୀବ୍ର ହୋଇଛି।
ଭାଜପା ନେତା ସମ୍ବିତ ପାତ୍ର କହିଛନ୍ତି, ଏହା ‘ଭାରତ ଯୋଡ ଯାତ୍ରା’ ନୁହେଁ ବରଂ ‘ଭାରତ ତୋଡ ଯାତ୍ରା’ ଏବଂ ‘ଆଗ୍ ଲଗାଓ ଯାତ୍ରା’। ମୁଁ ରାହୁଲ ଗାନ୍ଧୀଙ୍କୁ ପଚାରିବାକୁ ଚାହେଁ, ଆପଣ ଏହି ଦେଶରେ ହିଂସା ଚାହୁଁଛନ୍ତି କି? କଂଗ୍ରେସ ଏହି ଫଟୋକୁ ତୁରନ୍ତ ହଟାଇବା ଉଚିତ।
ସେହିପରି କଂଗ୍ରେସର ବିବାଦୀୟ ଟୁଇଟ୍କୁ ନେଇ ଉତ୍ତରପ୍ରଦେଶରେ ପିଡବ୍ଲ୍ୟୁଡି ମନ୍ତ୍ରୀ ଜିତିନ ପ୍ରସାଦଙ୍କ ପ୍ରତିକ୍ରିୟା ପ୍ରକାଶ ପାଇଛି। ସେ ଟୁଇଟ୍ କରି କହିଛନ୍ତି, ରାଜନୈତିକ ମତଭେଦ ସ୍ବାଭାବିକ। କିନ୍ତୁ ରାଜନୈତିକ ବିରୋଧୀଙ୍କୁ ଜାଳିବା ପାଇଁ ଏହି ପ୍ରକାର ମାନସିକତା ଆବଶ୍ୟକ କି? ନକାରାତ୍ମକତା ଏବଂ ଘୃଣାର ଏହି ରାଜନୀତିକୁ ସମସ୍ତେ ନିନ୍ଦା କରିବା ଉଚିତ୍।
ସୂଚନାଯୋଗ୍ୟ, କଂଗ୍ରେସ ନେତା ରାହୁଲ ଗାନ୍ଧୀଙ୍କ ନେତୃତ୍ୱରେ ଦଳ ‘ଭାରତ ଯୋଡ’ ଯାତ୍ରା ଆରମ୍ଭ କରିଛି। ଦରଦାମ ବୃଦ୍ଧି, ବେରୋଜଗାରୀକୁ ବିରୋଧ କରି କଂଗ୍ରେସ ପଦଯାତ୍ରା କରୁଛି। କନ୍ୟାକୁମାରୀଠାରୁ ଜମ୍ମୁ କଶ୍ମୀର ପର୍ଯ୍ୟନ୍ତ ଏହି ଯାତ୍ରା ୧୨ଟି ରାଜ୍ୟ ଦେଇ ୩,୭୫୦ କିଲୋମିଟର ଦୂରତା ଅତିକ୍ରମ କରିବ। ଏହି ଯାତ୍ରା ୧୫୦ ଦିନ ଧରି ଚାଲିବ।
