ବାଲେଶ୍ୱର(ମାନସ ବିଶ୍ୱାଳ)/ବାହାନଗା(ଅରୂପ ଦାସ), ୧୯।୭: ବାହାନଗା ଟ୍ରେନ୍ ଦୁର୍ଘଟଣା ମନରୁ ଲିଭି ନ ଥିବା ବେଳେ ଆଉ ଏକ ନିଶ୍ଚିତ ଦୁର୍ଘଟଣା ପରିସ୍ଥିତିକୁ ଏଡ଼ାଇ ଦିଆଯାଇପାରିଛି। ଲୋକୋ ପାଇଲଟ୍ଙ୍କ ଉପସ୍ଥିତ ବୁଦ୍ଧି ଯୋଗୁ ଭଦ୍ରକ-ବାଲେଶ୍ୱର ମେମୁ ଟ୍ରେନ୍ (ନଂ.୦୮୦୩୨) ଦୁର୍ଘଟଣାରୁ ବର୍ତ୍ତିଯାଇଛି। ଫଳରେ ପାଖାପାଖି ୧ହଜାର ଯାତ୍ରୀଙ୍କ ଜୀବନ ରକ୍ଷା ପାଇଯାଇଛି। ସୂଚନା ଅନୁଯାୟୀ, ମଙ୍ଗଳବାର ଭଦ୍ରକରୁ ମେମୁ ଟ୍ରେନ ବାଲେଶ୍ୱର ଆସୁଥିଲା। ନୀଳଗିରି ରୋଡ୍ରେ ସିଗନାଲ୍୍ କିମ୍ବା ଟ୍ରାକ୍ର ତ୍ରୁଟି ଜଣାପଡ଼ି ନ ଥିବା ବେଳେ ମଧ୍ୟାହ୍ନ ୧୨ଟା ୪୮ମିନିଟ୍ରେ ଟ୍ରେନ୍ ଲୁପ୍ଲାଇନ୍ ଭିତରକୁ ପଶିଯାଇଥିଲା। ଲୋକୋ ପାଇଲଟ ଟ୍ରାକ୍ରେ କୌଣସି ତ୍ରୁଟି ଥିବା ସନ୍ଦେହ କରିଥିଲେ। ହଠାତ୍ ଟ୍ରେନ୍କୁ ବ୍ରେକ୍ କରି ଅଟକାଇଥିଲେ। ଟ୍ରେନ୍ରୁ ଓହ୍ଲାଇ ଟ୍ରାକ୍ ଆଗକୁ ନ ଥିବା ଦେଖିଥିଲେ। ପରେ ଟ୍ରେନ୍କୁ ପଛକୁ ବ୍ରେକ୍ କରି ଘଟଣା ସମ୍ପର୍କରେ କଣ୍ଟ୍ରୋଲ ରୁମ୍କୁ ଜଣାଇଥିଲେ। ଟ୍ରେନ ପଛକୁ ଫେରୁଥିବା ଦେଖି ଯାତ୍ରୀମାନେ ବ୍ୟସ୍ତ ହୋଇପଡ଼ିଥିଲେ। ୨ ଘଣ୍ଟା ବିଳମ୍ବରେ ଟ୍ରେନ୍ ବାଲେଶ୍ୱର ରେଳଷ୍ଟେଶନର ୪ ନମ୍ବର ଟ୍ରାକ୍ରେ ପହଞ୍ଚିଥିଲା। ଟ୍ରେନରୁ ଯାତ୍ରୀମାନେ ଓହ୍ଲାଇ ଲୋକୋ ପାଇଲଟ୍ଙ୍କୁ ଜୀବନ ରକ୍ଷା ଲାଗି ଧନ୍ୟବାଦ ଦେବା ସହ ଫୁଲତୋଡ଼ା ଦେଇ ସମ୍ବର୍ଦ୍ଧିତ କରି ପ୍ରଶଂସା କରିଥିଲେ। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ନୀଳଗିରି ରୋଡ୍ ଷ୍ଟେଶନ ଛାଡ଼ିବାର ପ୍ରାୟ ୧୦୦ ମିଟର ପରେ ଏକ ବଡ଼ ଧରଣର ଶବ୍ଦ ହୋଇଥିଲା। ଏହାପରେ ଟ୍ରେନ ଜୋର୍ରେ ବ୍ରେକ୍ ମାରି ରହିଥିଲା। କିଛି ସମୟ ମଧ୍ୟରେ ଟ୍ରେନ୍ ଟ୍ରାକ୍ରେ ତ୍ରୁଟି ଥିବା ଜଣାପଡ଼ିଥିଲା। ପରେ ଟେକ୍ନିକାଲ ଟିମ୍ ଆସି ତ୍ରୁଟି ସଜାଡ଼ିବା ପରେ ଟ୍ରେନ ବାଲେଶ୍ୱରରେ ପହଞ୍ଚିଥିଲା। ତେବେ ପଏଣ୍ଟ ରିଭର୍ସ ସେଟରେ ସମସ୍ୟା ଥିବା ବେଳେ ସିଗନାଲ ଷ୍ଟାଫ୍ଙ୍କ ଅବହେଳା ଯୋଗୁ ଏକ ବଡ଼ ଦୁର୍ଘଟଣାର ଶିକାର ହୋଇଥାନ୍ତା ମେମୁ ଟ୍ରେନ।
