ନୂଆଦିଲ୍ଲୀ,୨୩।୮: ମହାରାଷ୍ଟ୍ରର ହିଙ୍ଗୋଲିରୁ ସାଇବର ଠକେଇର ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି, ଯେଉଁଠାରେ ଜଣେ ବ୍ୟକ୍ତି ହ୍ବାଟସଆପ ମାଧ୍ୟମରେ ତାଙ୍କ ଫୋନରେ ବିବାହ କାର୍ଡ ପାଇଥିଲେ। କାର୍ଡଟି ଦେଖାଯାଉଥିଲା ସରଳ କିନ୍ତୁ କ୍ଲିକ କରିବା ମାତ୍ରେ ପୀଡିତଙ୍କ ଆକାଉଣ୍ଟରୁ ପ୍ରାୟ ୨ ଲକ୍ଷ ଟଙ୍କା ଗାଏବ ହୋଇଗଲା।
ସାଇବର ଠକେଇର ଶିକାର ହୋଇଥିବା ସରକାରୀ କର୍ମଚାରୀଙ୍କୁ ଅଗଷ୍ଟ ୩୦ ତାରିଖରେ ଏକ ବିବାହରେ ଯୋଗଦେବା ପାଇଁ ଏକ ଅଜଣା ନମ୍ବରରୁ ନିମନ୍ତ୍ରଣ ପତ୍ର ମିଳିଥିଲା। ଏଥିରେ ଲେଖାଥିଲା, ସ୍ବାଗତ। ବିବାହକୁ ଆସନ୍ତୁ। ପ୍ରେମ ହେଉଛି ଖୁସିର ଦ୍ୱାର ଖୋଲିବା ଚାବି। ଏହା ସହିତ ଏକ PDF ଫାଇଲ ମଧ୍ୟ ସଂଲଗ୍ନ ଥିଲା।
ପ୍ରକୃତରେ, ଏହି PDF ଫାଇଲ ଏକ ଆଣ୍ଡ୍ରଏଡ ଆପ୍ଲିକେସନ ପ୍ୟାକେଜ (APK) ଫାଇଲ ଥିଲା ଯାହାକୁ ବ୍ୟବହାରକାରୀଙ୍କ ଫୋନ ହ୍ୟାକ କରିବା ଏବଂ ବିବାହ କାର୍ଡ ଭାବରେ ଦେଖାଇ ସମ୍ବେଦନଶୀଳ ତଥ୍ୟ ଚୋରି କରିବା ପାଇଁ ବ୍ୟବହାର କରାଯାଇଥିଲା। ପୀଡିତ ବ୍ୟକ୍ତି ଫାଇଲ ଉପରେ କ୍ଲିକ କରିବା ମାତ୍ରେ ସାଇବର ଠକମାନେ ଡାଟା ଆକ୍ସେସ କରି ୧,୯୦,୦୦୦ଟଙ୍କା ଚୋରି କରି ନେଇଥିଲେ।
ହିଙ୍ଗୋଲି ପୋଲିସ ଷ୍ଟେଶନ ଏବଂ ସାଇବର ସେଲ ବିଭାଗରେ ଜଣେ ଅଜଣା ବ୍ୟକ୍ତିଙ୍କ ବିରୁଦ୍ଧରେ ଏକ ମାମଲା ରୁଜୁ କରାଯାଇଛି। ଗତ ବର୍ଷ ଏହି ବିବାହ ନିମନ୍ତ୍ରଣ ଠକେଇ ସାମ୍ନାକୁ ଆସିଥିଲା ଯେତେବେଳେ ଏଥିରେ ଅନେକ ଲୋକ ସେମାନଙ୍କର ଟଙ୍କା ହରାଇଥିଲେ।
ସୂଚନାଯୋଗ୍ୟ, ଏହି ଠକେଇ ଜଣେ ବ୍ୟକ୍ତିଙ୍କୁ ହ୍ବାଟସଆପରେ ବିବାହ ନିମନ୍ତ୍ରଣ ପାଇବା ସହିତ ଆରମ୍ଭ ହୁଏ। କ୍ଲିକ କରିବା ପରେ, ଫୋନରେ APK ଫାଇଲ ଡାଉନଲୋଡ ହୋଇଥାଏ, ଯାହା ପରେ ସାଇବର ଅପରାଧୀମାନେ ପୀଡିତଙ୍କ କାର୍ଯ୍ୟକଳାପ ଉପରେ ନଜର ରଖିପାରିବେ। ସେମାନେ ଫୋନର ମାଲିକ ଭାବରେ ପରିଚୟ ଦେଇ ଟଙ୍କା ଦାବି କରିବା ପାଇଁ ଫୋନରେ ଥିବା ଡାଟା ମଧ୍ୟ ବ୍ୟବହାର କରିପାରିବେ।
