ନୂଆଦିଲ୍ଲୀ,୩୧।୧ : ବେନାମୀ କାରବାର ଉପରେ ସୁପ୍ରିମକୋର୍ଟ ଦେଇଥିବା ରାୟର ସମୀକ୍ଷା କରିବାକୁ ଏକ ଆବେଦନ ଉପରେ କେନ୍ଦ୍ର ସରକାର ଏକ ଖୋଲା କୋର୍ଟରେ ଶୁଣାଣି ପାଇଁ ଆବେଦନ କରିଛନ୍ତି।
କେନ୍ଦ୍ର ପକ୍ଷରୁ ହାଜର ହୋଇଥିବା ଅତିରିକ୍ତ ସୋଲିସିଟର ଜେନେରାଲ ତୁଷାର ମେହେଟ୍ଟା ଏହି ମାମଲାକୁ ଦୃଷ୍ଟିରେ ରଖି ଖୋଲା କୋର୍ଟରେ ସମୀକ୍ଷା ଆବେଦନ ଶୁଣିବାକୁ ପ୍ରଧାନବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ଜଷ୍ଟିସ ପିଏସ ନରସିଂହଙ୍କ ନେତୃତ୍ୱରେ ଗଠିତ ଖଣ୍ଡପୀଠଙ୍କୁ ଅନୁରୋଧ କରିଛନ୍ତି। ଏହି ବିଚାର ହେତୁ ବେନାମୀ ଆକ୍ଟର କିଛି ବ୍ୟବସ୍ଥା ଚ୍ୟାଲେଞ୍ଜ କରାଯାଇ ନ ଥିବା ବେଳେ ଅନେକ ଆଦେଶ ପାସ କରାଯାଉଛି ବୋଲି ସେ କହିଛନ୍ତି। କେନ୍ଦ୍ରର ଆବେଦନୀ ଜବାବରେ ସୁପ୍ରିମକୋର୍ଟ କହିଛନ୍ତି ଯେ ଆମେ ଏହାକୁ ବିଚାର କରିବୁ।
ସୂଚନାଯୋଗ୍ୟ,ଗତ ବର୍ଷ ଅଗଷ୍ଟ ମାସରେ ସର୍ବୋଚ୍ଚ ନ୍ୟାୟାଳୟ ବେନାମୀ ଆଇନର କିଛି ବ୍ୟବସ୍ଥାକୁ ଖଣ୍ଡନ କରିଥିଲେ। ଏହି ନିୟମଗୁଡିକ ମଧ୍ୟରୁ ଗୋଟିଏ ଅନୁଯାୟୀ, ବେନାମୀ କାରବାରରେ ଲିପ୍ତ ରହିଲେ ସର୍ବାଧିକ ତିନି ବର୍ଷ ଜେଲ ଦଣ୍ଡ, କିମ୍ବା ଜୋରିମାନା କିମ୍ବା ଉଭୟ ସହିତ ଦଣ୍ଡିତ କରାଯିବ। ସର୍ବୋଚ୍ଚ ନ୍ୟାୟାଳୟ ଏହି ବ୍ୟବସ୍ଥାକୁ ଅଣସାମ୍ବିଧାନିକ ବୋଲି କହିଛନ୍ତି। କୋର୍ଟ ଏହା ମଧ୍ୟ କହିଛନ୍ତି ଯେ ବେନାମୀ କାରବାର ନିଷେଧ ଅଧିନିୟମ, ଧାରା ୩ (୨) ଏବଂ ଧାରା ୫ ଅସ୍ପଷ୍ଟ ଏବଂ ଏହା ଉପରେ ମନଇଛା କାର୍ଯ୍ୟ କରାଯାଉଛି।
