ଲଣ୍ଡନ,୧୭।୧: ବିଶ୍ୱର ଅଗ୍ରଣୀ ଅଲରାଉଣ୍ଡର ବେନ ଷ୍ଟୋକ୍ସ ଚଳିତ ବର୍ଷର ଇଣ୍ଡିଆନ ପ୍ରିମିୟର ଲିଗ୍ରେ ନ ଖେଳିବାକୁ ନିଷ୍ପତ୍ତି ନେଇଛନ୍ତି। କାର୍ଯ୍ୟବୋଝକୁ ନିୟନ୍ତ୍ରିତ ରଖିବା ପାଇଁ ଏବଂ ମାନସିକ ସ୍ତରରେ ନିଜକୁ ଫ୍ରେଶ ରଖିବା ଲାଗି ସେ ଏଭଳି ନିଷ୍ପତ୍ତି ନେଇଥିବା ବ୍ରିଟିଶ ଗଣମାଧ୍ୟମରେ ଏକ ରିପୋର୍ଟରେ ଦର୍ଶାଯାଇଛି। ନିକଟରେ ଶେଷ ହୋଇଥିବା ଆଶେସ ସିରିଜ୍ରେ ଷ୍ଟୋକ୍ସ ଆଖିଦୃଶିଆ ପ୍ରଦର୍ଶନ କରିବାରେ ବିଫଳ ହୋଇଥିଲେ। ୫ ମ୍ୟାଚ୍ରେ କେବଳ ୨୩୬ ରନ୍ କରିବା ସହ ମାତ୍ର ୪ ଉଇକେଟ ନେବାକୁ ସକ୍ଷମ ହୋଇଥିଲେ।
“ଷ୍ଟୋକ୍ସ ଚଳିତ ବର୍ଷ ଆଇପିଏଲରେ ଖେଳିବେ ନାହିଁ, ଯେଉଁଥିରେ ପ୍ରଥମ ଥର ପାଇଁ ୧୦ ଦଳ ଖେଳିବେ। ଏଥିର୍ପୂବରୁ ଏକ ମେଗା ଅକଶନ ହେବାର ଅଛି” ବୋଲି ଲଣ୍ଡନ ଇଭିନିଂ ଷ୍ଟାଣ୍ଡର୍ଡରେ ଏକ ରିପୋର୍ଟରେ ପ୍ରକାଶ ପାଇଛି।
“ଗତ ଦୁଇ ବର୍ଷରେ ଷ୍ଟୋକ୍ସ ଅତ୍ୟନ୍ତ କଠିନ ସମୟ ଦେଖିଛନ୍ତି। ୧୩ ମାସ ତଳେ ତାଙ୍କ ବାପା ଗେଡ୍ଙ୍କ ମୃତ୍ୟୁ ହୋଇଥିଲା। ତା’ ପରେ ୨୦୨୧ରେ ସେ ନିଜ ମାନସିକ ସ୍ବାସ୍ଥ୍ୟ ଏବଂ ଆଙ୍ଗୁଠି ଜନିତ ସମସ୍ୟା କାରଣରୁ ଦୀର୍ଘ ଦିନ ଧରି କ୍ରିକେଟରୁ ଦୂରେଇ ରହିଥିଲେ” ବୋଲି ଉକ୍ତ ରିପୋର୍ଟରେ ଉଲ୍ଲେଖ କରାଯାଇଛି।
