କୁଜଙ୍ଗ,୨୫।୬(ମନୋଜ ପ୍ରଧାନ)କୁଜଙ୍ଗର ଜୀବନ ରେଖା କୁହାଯାଉଥିବା ୬ କି.ମି. ବିଶିଷ୍ଟ କୁଜଙ୍ଗ-ଚଟୁଆ ରାସ୍ତା ୨୦୧୮ରୁ ଖାଲଖମାରେ ଭରି ରହିଛି। ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ଥିବା ଏହି ରାସ୍ତା ଖଣି ଖାଦାନ ରାସ୍ତାଠାରୁ ଅଧିକ ଜରାଜୀର୍ଣ୍ଣ ହୋଇପଡ଼ିଛି। ଏନେଇ ବାରମ୍ବାର ଅଭିଯୋଗ ଓ ଦାବି କରାଯାଇଥିଲେ ମଧ୍ୟ କୌଣସି ସୁଫଳ ମିଳୁ ନ ଥିଲା। ଆସନ୍ତା ୨୯ରେ ୫- ଟି ସଚିବଙ୍କ ଜଗତ୍ସିଂହପୁର ଗସ୍ତ ସ୍ଥିର ହେବା ପରେ ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଛି। ଏବେ ଯୁଦ୍ଧକାଳୀନ ଭିତ୍ତିରେ ରାସ୍ତାରେ ତାଳିପକା କାମ ଚାଲିଛି। ୫- ଟି ସଚିବଙ୍କ ପାଖରେ ନିଜର ଦୁର୍ବଳତା ଲୁଚାଇବା ପାଇଁ ବିଭାଗ ପକ୍ଷରୁ ଏପରି ଉଦ୍ୟମ କରାଯାଉଛି ବୋଲି ସାଧାରଣରେ ଚର୍ଚ୍ଚା ଜୋରଧରିଛି ।
ସୂଚନାଯୋଗ୍ୟ, ଏହି ରାସ୍ତା ମରାମତି ନିମନ୍ତେ ୨୦୧୯ରେ ପ୍ରାୟ ୪୦ ଲକ୍ଷ୍ୟ ଟଙ୍କା ବ୍ୟୟ ଅଟକଳରେ ଟେଣ୍ଡର ଡକାଯାଇଥିଲା । ୨୦୨୦ ଡିସେମ୍ବର ୧ରେ କାମ ଆରମ୍ଭ ହୋଇ ଫେବୃୟାରୀ ଶେଷ ସୁଦ୍ଧା କାମ ଶେଷ କରିବାକୁ ସମ୍ପୃକ୍ତ ଠିକାଦାର ସହ ବିଭାଗ ଚୁକ୍ତିପତ୍ର ସ୍ବାକ୍ଷର କରିଥିଲା । ମାତ୍ର ନିର୍ଦ୍ଧାରିତ ସମୟରେ କାମ ହୋଇ ନ ଥିଲା । ପରବର୍ତ୍ତୀ ସମୟରେ କୋଭିଡ୍ ସଂକ୍ରମଣ ଓ ଲକ୍ଡାଉନ ଯୋଗୁ କାମ ହୋଇ ପାରି ନ ଥିବା ବିଭାଗ ପକ୍ଷରୁ ଦର୍ଶାଯାଇଥିଲା । ପୁନର୍ବାର ୨୦୨୧ ଜାନୁୟାରୀରେ ସମ୍ପୃକ୍ତ ଠିକାଦାର ମରାମତି କାମ ଆରମ୍ଭ କରିଥିଲେ । ହେଲେ ୧ କି.ମି ରାସ୍ତା ମରାମତି ହୋଇଛି କି ନାହିଁ କାମ ବନ୍ଦ ହୋଇଯାଇଥିଲା। ଏହି କାମ ନିମ୍ନମାନର ହେଉଥିବାରୁ ବନ୍ଦ କରାଯାଇଛି ବୋଲି ତତ୍କଳୀନ ଏସ୍ଡିଓ ସେତେବେଳେ କହିଥିଲେ। ଉକ୍ତ ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ଅନ୍ତର୍ଭୁକ୍ତ କରାଯାଇ ଚଉଡା ରାସ୍ତା କରାଯିବ ବୋଲି ସେ ସେତେବେଳେ ପ୍ରକାଶ କରିଥିଲେ। ଏହାପରେ ୨୦୨୨ରେ ଉକ୍ତ ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ଅନ୍ତର୍ଭୁକ୍ତ କରାଯାଇଥିଲା। ଏଥିପାଇଁ ୪ କୋଟି ୪୭ ଲକ୍ଷ ଟଙ୍କା ବ୍ୟୟ ଅଟକଳ କରାଯାଇ ରାସ୍ତା ସମ୍ପ୍ରସାରଣ କାମ ଚାଲୁ ରହିଛି । ଏନେଇ ରାସ୍ତାର ଉଭୟ ପାର୍ଶ୍ୱ ଖୋଳାଯାଇଥିବାରୁ ଲୋକେ ଯାତାୟାତ ସମୟରେ ଲୋକେ ଅସୁବିଧାର ସମ୍ମୁଖୀନ ହେଉଥିଲେ। ଏବେ ବର୍ଷା ଆରମ୍ଭ ହୋଇଯାଇଥିଲେ ମଧ୍ୟ ୫-ଟି ସଚିବଙ୍କ କୁଜଙ୍ଗ ଗସ୍ତକୁ ଦୃଷ୍ଟିରେ ରଖି ପିଚୁ କାମ ଜାରି ରହିଛି। ରାସ୍ତା ସମ୍ପ୍ରସାରଣ କାର୍ଯ୍ୟ ବଦଳରେ ଏହି କାମ କେଉଁ ଯୋଜନାରେ ଚାଲିଛି ବୋଲି ସହକାରୀ ଯନ୍ତ୍ରୀ ସନ୍ତୋଷ ଦାଶଙ୍କୁ ପଚାରିବାରୁ ସେ କହିଥିଲେ, ରାସ୍ତା କାମ କରୁଥିବା ଠିକାଦାରଙ୍କୁ ମରାମତି କରିବା ପାଇଁ କୁହାଯାଇଛି। ଏଥିପାଇଁ କୌଣସି ସ୍ବତନ୍ତ୍ର ଅନୁଦାନ ହୋଇନାହିଁ। ଜନସାଧାରଣଙ୍କ ଦାବିକୁ ଆଖି ଆଗରେ ରଖି ମରାମତି କାର୍ଯ୍ୟ ଚାଲିଛି।
