ରସୁଲପୁର,୨।୪(ଡି.ଏନ.ଏ.): କୁଆଖିଆ ଥାନା ରାହାମ୍ବା ପଞ୍ଚାୟତ ଢିଅସାହିର ବିକାଶ ଲେଙ୍କା ହତ୍ୟା ମାମଲାରେ ସାମିଲ ଗୋଟିଏ ପରିବାରର ବାପା ଓ ୨ପୁଅଙ୍କୁ ପୋଲିସ ଗିରଫ କରି ଶନିବାର କୋର୍ଟଚାଲାଣ କରିଛି। ସେମାନେ ହେଲେ ବାପା ହରେକୃଷ୍ଣ ବରାଳ, ବଡ଼ପୁଅ ଗରୁଡ଼ ଓରଫ୍ ପୀତାମ୍ବର ବରାଳ ଓ ସାନପୁଅ ତ୍ରିନାଥ ଓରଫ୍ ତପନ ବରାଳ। ଏହି ୩ ଅଭିଯୁକ୍ତଙ୍କୁ ପୋଲିସ ୨ଦିନ ଅଟକରଖି ପଚରାଉଚରା କରୁଥିଲା। ପୂର୍ବ ଶତ୍ରୁତାରୁ ଅଭିଯୁକ୍ତ ବିକାଶଙ୍କୁ ପିଟି ମାରି ପୋଖରୀରେ ଫିଙ୍ଗି ଦେଇଥିଲେ ବୋଲି ପୋଲିସ ସମ୍ମୁଖରେ ପ୍ରକାଶ କରିଛନ୍ତି। ଅଭିଯୁକ୍ତଙ୍କ ବୟାନକୁ ଆଧାର କରି ପୋଲିସ ତଦନ୍ତ ଜାରି ରଖିଛି। ଘଟଣା ସହ ଜଡ଼ତିଥିବା ସନ୍ଦେହରେ ଆଉ ୩ ସନ୍ଧିଗ୍ଧଙ୍କୁ ପୋଲିସ ପଚରା ଉଚରା କରି ଛାଡି ଦେଇଥିବା ଜଣାଯାଇଛି।
ଘଟଣାକୁ ଛାନଭିନ ପାଇଁ ପୋଲିସ ପକ୍ଷରୁ ସନ୍ଧାନୀ କୁକୁର ଓ ସାଇଣ୍ଟିଫିକ୍ ଟିମ୍ର ସହାୟତା ନିଆଯାଇଥିଲା। ଶନିବାର ସକାଳୁ ପୋଲିସ ସନ୍ଧାନୀ କୁକୁର ସହାୟତାରେ ତଦନ୍ତ ଆରମ୍ଭ କରିଥିଲା। ୩ ଅଭିଯୁକ୍ତଙ୍କୁ ଘଟଣା ସ୍ଥଳକୁ ଆଣାଯାଇ ହତ୍ୟାକାଣ୍ଡର ସିନ ରିକ୍ରିଏଶନ କରାଯାଇଥିଲା। ଅଭିଯୁକ୍ତ ବିକାଶଙ୍କୁ କେମିତି ମାରିଥିଲେ ଏବଂ ତାଙ୍କୁ ନେଇ ପୋଖରରୀରେ ଫିଙ୍ଗି ଥିଲେ ସେ ସମ୍ପର୍କରେ ପୋଲିସକୁ ଜଣାଇଥିଲେ।
ଜମି ବିବାଦକୁ ନେଇ ଅଭିଯୁକ୍ତ ହରେକୃଷ୍ଣ ବରାଳ ଓ ବିକାଶ ଲେଙ୍କା ପରିବାରର ସହ ବିବାଦ ରହି ଆସୁଥିଲା। ୨୦୧୬ରେ ଉଭୟ ପରିବାର ମଧ୍ୟରେ ଗଣ୍ଡଗୋଳ ଉପୁଜିଥିଲା। ସେତେବେଳେ ହରେକୃଷ୍ଣଙ୍କ ପରିବାର ବିକାଶଙ୍କ ୨ ହାତକୁ କୋଦାଳରେ ହାଣି ଦେଇଥିଲେ। ସେବେଠାରୁ ଉଭୟ ପରିବାର ମଧ୍ୟରେ ବିବାଦ ଦେଖାଯିବା ସହ କୋର୍ଟରେ ମାମଲା ରହିଆସୁଥିଲା। ବିଭିନ୍ନ ସମୟରେ ଅଭିଯୁକ୍ତ ପରିବାର ବିକାଶଙ୍କୁ ମାରି ଦେବାକୁ ଚେଷ୍ଟା କରି ବିଫଳ ହୋଇଥିଲେ। ବିକାଶଙ୍କ ମା’ବାପାଙ୍କ ମୃତ୍ୟୁ ପରେ ସେ ଏକୁଟିଆ ହୋଇଯାଇଥିଲେ। ତେଣୁ ସେ ନିଜ ଘର ମିର୍ଜାପୁର ଗାଁରେ ରହୁଥିଲେ। କିଛି ଦିନ ହେବ ସେ ରାହାମ୍ବା ସ୍ଥିତ ମାମୁ ଘରକୁ ଆସିଥିଲେ। ଘଟଣା ଦିନ ଜଣେ ସହଯୋଗୀଙ୍କ ସହ ମଧୁବନ ବଜାରରୁ ବିରିୟାନି ଆଣି ଘରକୁ ଫେରିଥିଲେ। ସହଯୋଗୀଙ୍କୁ ଘରେ ଛାଡି ଦେଇ ଗୋଟିଏ ପାକେଟ ବିରିୟାନି ନେଇ ଘରକୁ ଯାଇଥିଲେ। ପରେ ବିକାଶ ସହଯୋଗୀଙ୍କ ସହାୟତାରେ ଗାଁର ଏକ ସ୍ଥାନକୁ ଯାଇଥିଲେ। ସେଠାରେ ଛାଡି ସହଯୋଗୀ ଘରକୁ ଫେରି ଆସିଥିଲେ। ଏହି ଦିନ ବିକାଶଙ୍କୁ ମାରିବାକୁ ଅଭିଯୁକ୍ତ ଯୋଜନା କରିଥିଲେ। ସେଥିପାଇଁ ଅଭିଯୁକ୍ତ ତାଙ୍କ ଗତିବିଧିକୁ ଅନୁଧ୍ୟାନ କରୁଥିଲେ। ଏକ ହୋଟେଲରେ ଅଭିଯୁକ୍ତ ଗରୁଡ କାମ କରୁଥିଲେ। ସେ ହୋଟେଲରୁ ଫୋନ ଯୋଗେ ବିକାଶଙ୍କ ଗତିବିଧିକୁ ପଚାରି ବୁଝୁଥିଲେ। ରାତିରେ ବିକାଶ ମାମୁ ଘରକୁ ଫେରୁଥିବା ଜାଣି ହରେକୃଷ୍ଣ ଓ ତାଙ୍କ ସାନପୁଅ ବିକାଶଙ୍କୁ ଅଟକାଇ ରଖି ଗରୁଡ଼ଙ୍କୁ ଡାକିଥିଲେ। ସେ ଘଟଣାସ୍ଥଳରେ ପହଞ୍ଚତ୍ବା ପରେ ସମସ୍ତେ ମିଶି ବିକାଶଙ୍କୁ ମାରିଥିଲେ। ହତ୍ୟାକାଣ୍ଡକୁ ନେଇ ବିକାଶଙ୍କ ଦାଦା ନିଳମଣି ଲେଙ୍କା ଥାନାରେ ଅଭିଯୋଗ କରିଥିଲେ। ପୋଲିସ ଥାନାରେ ନଂ.୧୦୫/୨୩ରେ ଏକ ମାମଲା ରୁଜୁ କରିଥିଲା। ଥାନା ଅଧିକାରୀ ଶିବ ଚରଣ ବେହେରା ଘଟଣାର ତଦନ୍ତ କରୁଛନ୍ତି। ଘଟଣାରେ ଆଉ କହାର ସଂପୃକ୍ତି ରହିଛି କି ନାହିଁ ସେ ଦିଗରେ ପୋଲିସ ଅଧିକ ତଦନ୍ତ ଜାରି ରଖିଛି।
