ପୁରୀ ଅଫିସ,୨୫।୫: ସର୍ବଦଳୀୟ ପ୍ରତିନିଧି ମଣ୍ଡଳୀ ମଙ୍ଗଳବାର ଗୋବର୍ଦ୍ଧନ ମଠକୁ ଯାଇ ଜଗଦ୍ଗୁରୁ ଶଙ୍କରାଚାର୍ଯ୍ୟ ସ୍ବାମୀ ନିଶ୍ଚଳାନନ୍ଦ ସରସ୍ବତୀଙ୍କୁ ଭେଟିଛନ୍ତି। ଶ୍ରୀମନ୍ଦିର ପରିକ୍ରମା ପ୍ରକଳ୍ପର ସପକ୍ଷବାଦୀ ଓ ବିପକ୍ଷବାଦୀଙ୍କୁ ନେଇ ବିସ୍ତୃତ ଭାବେ ଆଲୋଚନା ହୋଇଛି। ଶଙ୍କରାଚାର୍ଯ୍ୟ ସମସ୍ତ ପକ୍ଷଙ୍କୁ ଶୁଣି ସାରିବା ପରେ ପ୍ରକଳ୍ପ କାର୍ଯ୍ୟ ସମନ୍ବୟରେ ହେଉ ବୋଲି ମତ ରଖିଛନ୍ତି।
ସୋମବାର ଶଙ୍କରାଚାର୍ଯ୍ୟଙ୍କୁ ଗଜପତି ମହାରାଜା ଓ ଶ୍ରୀମନ୍ଦିର ମୁଖ୍ୟ ପ୍ରଶାସକ ଭେଟି ପରିକ୍ରମା ପ୍ରକଳ୍ପ ସମ୍ପର୍କରେ ଅବଗତ କରାଇବା ପରେ ସେ ଉଭୟ ସପକ୍ଷବାଦୀ ଓ ବିପକ୍ଷବାଦୀଙ୍କ ଉପସ୍ଥିତିରେ ଆଲୋଚନା ହେଉ ବୋଲି କହିଥିଲେ। ଏହିକ୍ରମରେ ସର୍ବଦଳୀୟ ପ୍ରତିନିଧି ଦଳ ଓ ପରିକ୍ରମା ପ୍ରକଳ୍ପର ଅଂଶୀଦାରମାନେ ଶଙ୍କରାଚାର୍ଯ୍ୟଙ୍କୁ ଭେଟିଥିବା ଜଣାପଡ଼ିଛି। ଏହି ବୈଠକରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ନ୍ୟାୟିକ ଦିଗ ଉପରେ ଆଲୋଚନା ହେବା ସହ ସମସ୍ତ ଅଂଶୀଦାରଙ୍କୁ ପୃଥକ ପୃଥକ ଭାବେ ପ୍ରକଳ୍ପ ସମ୍ପର୍କରେ ପ୍ରଶ୍ନ କରାଯାଇଥିଲା। ଓବିସିସି ଏବଂ ଏଏସ୍ଆଇ ଅଧିକାରୀଙ୍କୁ ମଧ୍ୟ ପ୍ରଶ୍ନ କରାଯାଇଛି। ତେବେ ଏହି ବୈଠକରେ ମିଶ୍ର ପ୍ରତିକ୍ରିୟା ଦେଖିବାକୁ ମିଳିଛି। ଅନେକ ବ୍ୟକ୍ତି ପ୍ରକଳ୍ପକୁ ସମର୍ଥନ କରିଥିବା ବେଳେ ଅନେକେ ଏହାକୁ ବେଆଇନ ବୋଲି କହିଛନ୍ତି। ପୁରୀ ବିଧାୟକ ଜୟନ୍ତ କୁମାର ଷଡ଼ଙ୍ଗୀ କହିଛନ୍ତି, ପ୍ରକଳ୍ପ କାର୍ଯ୍ୟରେ ଯାହା ଘଟିଯାଇଛି ତାହାକୁ ଭୁଲି ଆଗକୁ କିଭଳି ଭାବେ କାର୍ଯ୍ୟ ଶେଷ କରାଯାଇପାରିବ ସେନେଇ ଚିନ୍ତା କରିବା ଦରକାର। ୫ ହଜାର ପରିବାର ଶ୍ରୀମନ୍ଦିର ଉପରେ ନିର୍ଭର କରି ଚଳନ୍ତି। ଏଣୁ ପ୍ରକଳ୍ପ କାର୍ଯ୍ୟ ସୁରୁଖୁରୁରେ ସରୁ। ସଭିଁଙ୍କ ସମନ୍ବୟରେ କାମ ସରିବା ଦରକାର ବୋଲି ସେ ମତ ରଖିଛନ୍ତି। ଅନ୍ୟପକ୍ଷରେ ଐତିହ୍ୟ ଗବେଷକ ଅନୀଲ ଧର କହିଛନ୍ତି, ଖୁବ୍ କମ୍ ଲୋକ ପ୍ରକଳ୍ପ ସପକ୍ଷରେ ବାହାରିଥିବା ବେଳେ ଅଧିକ ଲୋକେ ବିରୋଧ କରିଛନ୍ତି। ଗୁରୁଜୀ ଏକ ସ୍ପଷ୍ଟ ଚିତ୍ର ପାଇଛନ୍ତି। ଆଧ୍ୟାତ୍ମିକ, ନ୍ୟାୟିକ ଦିଗ ଉପରେ ଆଲୋଚନା ହେଲା। ପରିକ୍ରମା ପ୍ରକଳ୍ପ କରିବା ବେଳେ ୮ଟି ଆଇନର ଉଲ୍ଲଂଘନ ହୋଇଛି। ପ୍ରକଳ୍ପକୁ ୬ଟି କେନ୍ଦ୍ର ଆଇନ ଓ ୨ଟି ରାଜ୍ୟ ଆଇନ ଅନୁମତି ଦେଉନାହିଁ। ସେହିଭଳି ସୁପ୍ରିମକୋର୍ଟ କେବେ ହେଲେ ଆଇନ ଭାଙ୍ଗି କାର୍ଯ୍ୟ କରିବାକୁ ନିର୍ଦ୍ଦେଶ ଦେବେ ନାହିଁ। ପରିକ୍ରମା ପ୍ରକଳ୍ପ କାର୍ଯ୍ୟ ଆଜି ହିଁ ବନ୍ଦ ହେବା ଦରକାର। ଏକ ଏକ୍ସପର୍ଟ କମିଟି ଗଠନ କରାଯିବାକୁ ସେ ମତ ଦେଇଛନ୍ତି। ବିଶିଷ୍ଟ ସ୍ଥପତି ପଦ୍ମବିଭୂଷଣ ସୁଦର୍ଶନ ସାହୁ କହିଛନ୍ତି, ଆଇନର ଊର୍ଦ୍ଧ୍ୱରେ କେହି ନୁହନ୍ତି। ମାତ୍ର ପରିକ୍ରମା ପ୍ରକଳ୍ପ କାର୍ଯ୍ୟ ସୁରୁଖୁରୁରେ ଶେଷ ହେବା ଦରକାର। କାଶୀ ବିଶ୍ୱନାଥରେ ମଧ୍ୟ ବାଦ ବିବାଦରେ ବିକାଶ ହୋଇଛି। ଅନ୍ୟପକ୍ଷରେ ପ୍ରିୟଦର୍ଶନ ପଟ୍ଟନାୟକ କହିଛନ୍ତି, ସମନ୍ବୟରେ କାର୍ଯ୍ୟ ହେବାରେ କୌଣସି ସମସ୍ୟା ନାହିଁ। ମାତ୍ର ୫ ଜଣ ବ୍ୟକ୍ତି ସମନ୍ବୟ କରି ଗୋଟିଏ ଭୁଲ କଲେ ତାହାକୁ କିଭଳି ଭାବେ ଗ୍ରହଣ କରାଯିବ। ଆଇନସମ୍ମତ କାର୍ଯ୍ୟ ହେବା ଦରକାର। ଅନ୍ୟପକ୍ଷରେ ମହାପ୍ରଭୁଙ୍କ ଇଚ୍ଛାରେ କାର୍ଯ୍ୟ ହେଉଥିବା ଓବସିସି ଅଧିକାରୀ କହିଥିବା ବେଳେ ମାମଲା ବିଚାରାଧୀନ ଥିବାରୁ କୌଣସି ପ୍ରତିକ୍ରିୟା ଦେବାକୁ ଏଏସଆଇ ଅଧିକାରୀ ମନା କରିଦେଇଥିଲେ।
ସୂଚନାଯୋଗ୍ୟ, ଜଗଦ୍ଗୁରୁଙ୍କୁ ସୋମବାର ସନ୍ଧ୍ୟାରେ ଗଜପତି ମହାରାଜା ଦିବ୍ୟସିଂହ ଦେବ, ଶ୍ରୀମନ୍ଦିର ମୁଖ୍ୟ ପ୍ରଶାସକ ବୀର ବିକ୍ରମ ଯାଦବ, ଜିଲାପାଳ ସମର୍ଥ ବର୍ମା, ଏସ୍ପି କନୱର ବିଶାଲ ସିଂ ଏବଂ ପରିଚାଳନା କମିଟି ସଦସ୍ୟ ଭେଟିଥିଲେ। ସେମାନେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ସମ୍ପର୍କରେ ଆଲୋଚନା କରିବା ସହ ଏକ ଭିଡିଓ ଦେଖାଇ ବିସ୍ତୃତ ସୂଚନା ଦେଇଥିଲେ ା
