ଜଳବାୟୁ ପରିବର୍ତ୍ତନ ଏକ ଗମ୍ଭୀର ସମସ୍ୟା ପାଲଟିଛି। ବୃଦ୍ଧି ପାଉଥିବା ତାପମାତ୍ରା, ଅସନ୍ତୁଳିତ ପାଗ ଏବଂ ପ୍ରଦୂଷଣ କେବଳ ପରିବେଶକୁ ପ୍ରଭାବିତ କରୁନାହିଁ ବରଂ ଆମ ସ୍ବାସ୍ଥ୍ୟ ଉପରେ ମଧ୍ୟ ଗମ୍ଭୀର ପ୍ରଭାବ ପକାଉଛି। ଅଷ୍ଟ୍ରେଲିଆରେ ହୋଇଥିବା ଏକ ସଦ୍ୟତମ ଅଧ୍ୟୟନରେ କୁହାଯାଇଛି ଯେ, ବର୍ଦ୍ଧିତ ତାପମାତ୍ରା ଏବଂ ଜଳବାୟୁ ପରିବର୍ତ୍ତନ ଯୋଗୁ ହାଟ୍ଆଟାକ୍ର ଆଶଙ୍କା ଦ୍ରୁତଗତିରେ ବୃଦ୍ଧି ପାଉଛି। ଅତ୍ୟଧିକ ଗରମ ହାର୍ଟ ପାଇଁ ବିପଜ୍ଜନକ।
ଆଡିଲେଡ ବିଶ୍ୱବିଦ୍ୟାଳୟର ଗବେଷକମାନେ କହିଛନ୍ତି ଯେ, ଯେତେବେଳେ ତାପମାତ୍ରା ବୃଦ୍ଧି ପାଏ, ତା’ର ପ୍ରଭାବ ଶରୀର ଉପରେ ଦେଖାଯାଏ। ଏହି କାରଣରୁ ଆମର ଶରୀର ଗରମ ହେବାକୁ ଲାଗେ। ଏପରି ପରିସ୍ଥିତିରେ, ଶରୀରକୁ ଥଣ୍ଡା ରଖିବା ପାଇଁ ହାର୍ଟକୁ ଅଧିକ ପରିଶ୍ରମ କରିବାକୁ ପଡ଼ିଥାଏ। ଏହି ପରିସ୍ଥିତି ସେମାନଙ୍କ ପାଇଁ ଅଧିକ ବିପଦପୂର୍ଣ୍ଣ ଯେଉଁମାନେ ପୂର୍ବରୁ କୌଣସି ପ୍ରକାରର ସମସ୍ୟା ସହିତ ସଂଘର୍ଷ କରୁଛନ୍ତି। ଗରମ ବୃଦ୍ଧି ପାଇବା ଦ୍ୱାରା ରକ୍ତଚାପ ଅସନ୍ତୁଳିତ ହୋଇପାରେ, ଯାହା ଫଳରେ ହୃଦ୍ଘାତ, ଷ୍ଟ୍ରୋକ୍ କିମ୍ବା ଅନ୍ୟାନ୍ୟ ହାର୍ଟ ରୋଗ ସମ୍ପର୍କିତ ସମସ୍ୟାର ଆଶଙ୍କା ବଢ଼ିପାରେ।
ଅଧ୍ୟୟନ ଅନୁଯାୟୀ, ଯଦି ଗ୍ରୀନ୍ହାଉସ ଗ୍ୟାସର ନିର୍ଗମନ ସମାନ ହାରରେ ଜାରି ରହେ, ତେବେ ଆଗାମୀ ୨୫ ବର୍ଷ ମଧ୍ୟରେ ହାର୍ଟରୋଗର ଘଟଣା ତିନି ଗୁଣ ବୃଦ୍ଧି ପାଇପାରେ। କାରଣ ଦେଶରେ ହାର୍ଟ ଜନିତ ମାମଲା ଦ୍ରୁତ ଗତିରେ ବୃଦ୍ଧି ପାଉଛି। ଏପରି ପରିସ୍ଥିତିରେ, ଜଳବାୟୁ ପରିବର୍ତ୍ତନ ଯୋଗୁ ହାର୍ଟ ସମ୍ବନ୍ଧୀୟ ରୋଗର ଆଶଙ୍କା ବଢ଼ିପାରେ। ଜଳବାୟୁ ପରିବର୍ତ୍ତନ ଯୋଗୁ ତାପମାତ୍ରା ବୃଦ୍ଧି ପାଉଛି, ଗରମ ଦିନର ସଂଖ୍ୟା ମଧ୍ୟ ବୃଦ୍ଧି ପାଉଛି, ଯାହା କାରଣରୁ ବିପଦ ଅଧିକ ଗମ୍ଭୀର ହେଉଛି।
ଚଳିତ ବର୍ଷ ଅଧିକ ଗରମ ହେବାର ସମ୍ଭାବନା ପାଣିପାଗ ବିଭାଗ ପ୍ରକାଶ କରିଛି। ମାର୍ଚ୍ଚ ମାସରେ ହିଁ ଅନେକ ସ୍ଥାନରେ ତାପମାତ୍ରା ବୃଦ୍ଧି ପାଇଛି। ଓଡ଼ିଶା ଏବଂ ଛତିଶଗଡ଼ର ଅନେକ ଜିଲାରେ ମାର୍ଚ୍ଚ ମାସରେ ତାପମାତ୍ରା ପ୍ରାୟ ୪୦ ଡିଗ୍ରୀ ରହିଥାଏ। ଅତ୍ୟଧିକ ଗରମ ଅନେକ ସମସ୍ୟା ସୃଷ୍ଟି କରିପାରେ।
ଗ୍ରୀଷ୍ମ ଋତୁରେ ଶରୀରକୁ ହାଇଡ୍ରେଟ୍ ରଖିବା ବହୁତ ଗୁରୁତ୍ୱପୂର୍ଣ୍ଣ, ଯାହା ଦ୍ୱାରା ରକ୍ତ ସଞ୍ଚାଳନ ଠିକ୍ ରହିଥାଏ।
ଘରୁ ବାହାରକୁ ଯିବା ସମୟରେ ମାସ୍କ ପିନ୍ଧନ୍ତୁ ଏବଂ ଅଧିକ ପ୍ରଦୂଷଣ ହେଉଥିବା ସ୍ଥାନଗୁଡ଼ିକୁ ଏଡ଼ାନ୍ତୁ।
ଆପଣଙ୍କ ହାର୍ଟକୁ ସୁସ୍ଥ ରଖିବା ପାଇଁ, ସବୁଜ ପନିପରିବା, ଫଳ ଏବଂ ଓମେଗା-୩ ଯୁକ୍ତ ଖାଦ୍ୟ ଖାଆନ୍ତୁ। ତେଲ ଏବଂ ମସଲା କମ୍ କରନ୍ତୁ।
ଆପଣଙ୍କ ହାର୍ଟକୁ ଶକ୍ତିଶାଳୀ ରଖିବା ପାଇଁ ନିୟମିତ ବ୍ୟାୟାମ କରନ୍ତୁ କିନ୍ତୁ ଅତ୍ୟଧିକ ଗରମରେ କଠିନ ବ୍ୟାୟାମରୁ ଦୂରେଇ ରୁହନ୍ତୁ।
ଯୋଗ, ଧ୍ୟାନ ଏବଂ ସଙ୍ଗୀତ ମାଧ୍ୟମରେ ଚାପ ହ୍ରାସ କରନ୍ତୁ, ଯାହା ଦ୍ୱାରା ହାର୍ଟ ସୁସ୍ଥ ରହିବ।
