ବେଙ୍ଗାଲୁରୁ,୩୦।୩: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ପ୍ରସାରଣ ଅଧିକାର ପାଇଁ ୩୩ ହଜାର କୋଟି ଟଙ୍କାର ବେସ୍ ପ୍ରାଇସ ଧାର୍ଯ୍ୟ କରିଛି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)। ପରବର୍ତ୍ତୀ ସିଜନରେ ମ୍ୟାଚ୍ ସଂଖ୍ୟା ବୃଦ୍ଧି କରିବାର ବିକଳ୍ପ ରଖିଥିବା ବିସିସିଆଇ ବୁଧବାର ଠାରୁ ଟେଣ୍ଡର ପାଇଁ ଆମନ୍ତ୍ରଣ (ଆଇଟିଟି) ଡକ୍ୟୁମେଣ୍ଟ ବିକ୍ରି ଆରମ୍ଭ କରି ଦେଇଛି। ବର୍ତ୍ତମାନ ଆଇପିଏଲ ମ୍ୟାଚ୍ ପ୍ରସାରଣ କରୁଥିବା ଷ୍ଟାର ସ୍ପୋଟର୍ସ ସହ ହୋଇଥିବା ଚୁକ୍ତି ଚଳିତ ସିଜନ ପରେ ଶେଷ ହେବ।
ଆଇଟିଟିରୁ ମିଳିଥିବା ସୂଚନା ଅନୁଯାୟୀ, ବିସିସିଆଇ ଆଇପିଏଲର ପ୍ରସାରଣକୁ ୪ଟି ବଣ୍ଡଲ ଭାଗ ଭାଗ କରିଛି। ବଣ୍ଡଲ ଏ’ରେ ସବ୍ କଣ୍ଟିନେଣ୍ଟ ଟେଲିଭିଜନ ରାଇଟ୍ସ ପାଇଁ ପ୍ରତ୍ୟେକ ମ୍ୟାଚ୍ ପିଛା ୪୯ କୋଟି ଟଙ୍କା ଧାର୍ଯ୍ୟ କରାଯାଇଛି। ଏହା ଦ୍ୱାରା ବିସିସିଆଇ ୫ ବର୍ଷରେ ଅଧିକ ୧୮,୧୩୦ କୋଟି ଟଙ୍କା ଆୟ କରିବ। ବଣ୍ଡଲ ବି’ରେ ଡିଜିଟାଲ ରାଇଟ୍କୁ ରଖାଯାଇଛି। ଏଥିରେ ମ୍ୟାଚ୍ ପିଛା ୩୩ କୋଟି ଟଙ୍କାର ବେସ ପ୍ରାଇସ୍ ରହିଛି। ଏଥିରୁ ବିସିସିଆଇ ୧୨,୨୧୦ କୋଟି ଆୟ କରିବ।
ସବୁଠୁ ସ୍ବତନ୍ତ୍ର କୁହାଯାଉଥିବା ବଣ୍ଡଲ ସି’ରେ ପ୍ରତ୍ୟେକ ମ୍ୟାଚ୍ ଲାଗି ୧୬ କୋଟି ବେସ୍ ପ୍ରାଇସ୍ ରହିଛି। ଏହି ହିସାବରେ ୫ ବର୍ଷକୁ ୧୪୪୦ କୋଟି ଆୟ ହେବ। ତେବେ ଏହି ବଣ୍ଡଲ କେବଳ ଓଟିଟି ପ୍ଲାଟଫର୍ମ ପାଇଁ। କେବଳ ଗୋଟିଏ ଓଟିଟି ପ୍ଲାଟଫର୍ମ ଏହାକୁ କିଣିପାରିବ। ଅନ୍ତିମ ତଥା ବଣ୍ଡଲ ଡି’ ହେଉଛି ଭାରତ ଛଡ଼ା ଅନ୍ୟ ଦେଶରେ ଉଭୟ ଡିଜିଟାଲ ଏବଂ ଟେଲିଭିଜନ ପ୍ରସାରଣ କରିବାର ଅଧିକାର। ଏଥି ଲାଗି ମ୍ୟାଚ୍ ିଛା ୩ କୋଟି ଧାର୍ଯ୍ୟ କରାଯାଇଛି। ଏଥିରୁ ୧୧୧୦ କୋଟି ଆୟ ହେବ।
