ମୁମ୍ବାଇ,୧ା୫: ପେସ୍ ବୋଲିଂ ସେନ୍ସେସନ୍ ମୟଙ୍କ ଯାଦବ ଅବଶିଷ୍ଟ ଆଇପିଏଲ୍ ମ୍ୟାଚ୍ରେ ଅଂଶଗ୍ରହଣ କରିବା ନେଇ ସନ୍ଦେହ ଉପୁଜିଛି। ମୁମ୍ବାଇ ଇଣ୍ଡିଆନ୍ସ ବିପକ୍ଷ ମ୍ୟାଚ୍ ସମୟରେ ପେଟର ମାଂସପେଶୀ ଟାଣିହେବା ପରେ ଗତ ଚାରି ସପ୍ତାହ ମଧ୍ୟରେ ଦ୍ୱିତୀୟ ଥର ସେ ଆଘାତର ଶିକାର ହୋଇଛନ୍ତି। ଯାହାଫଳରେ ମୟଙ୍କ ଅବଶିଷ୍ଟ ଖେଳିବେ କି ନାହିଁ ସେ ନେଇ ସନ୍ଦେହ ଉପୁଜିଛି।
ତେବେ ୨୧ ବର୍ଷ ବୟସ୍କ ଦିଲ୍ଲୀର ଏହି ବୋଲରଙ୍କ ପାଇଁ ଏକ ବଡ ଖବର ସାମ୍ନାକୁ ଆସିଛି। ଉଦୟମାନ ବୋଲର ଉମ୍ରାନ ମଲିକ, ବିଦୱାଥ କାଭେରାପ୍ପା, ବିଶା ବିଜୟକୁମାର, ୟଶ ଦୟାଲ ଏବଂ ଆକାଶ ଦୀପଙ୍କ ସହ ବିସିସିଆଇ ମୟଙ୍କ ଯାଦବଙ୍କୁ ପେସ୍ ବୋଲିଂ ଚୁକ୍ତି ଦେବାକୁ ସ୍ଥିର କରିଛି।
ଏହି ଚୁକ୍ତିନାମା ପରେ ମୟଙ୍କ ଏନସିଏର କ୍ରୀଡା ବିଜ୍ଞାନ ଏବଂ ମେଡିକାଲ ଦଳର ତତ୍ତ୍ୱାବଧାନରେ ରହିବେ, ଯିଏ ତାଙ୍କ ଆଇପିଏଲ୍ ଫ୍ରାଞ୍ଚାଇଜ୍ ଲକ୍ଷ୍ନୌ ସୁପର ଜିଆଣ୍ଟସ୍ ଠାରୁ ତାଙ୍କ ଆଘାତ ପରିଚାଳନା ଏବଂ ଫିଟନେସ୍ କାର୍ଯ୍ୟକ୍ରମର ଦାୟିତ୍ବ ଗ୍ରହଣ କରିବ।
ଆଇପିଏଲ୍ ଆରମ୍ଭରେ ଘଂଟାପ୍ରତି ୧୫୫ ବେଗରେ ବୋଲିଂ କରି ଏବଂ ବ୍ୟାକ୍-ଟୁ-ବ୍ୟାକ୍ ‘ପ୍ଲେୟାର୍ ଅଫ୍ ଦି ମ୍ୟାଚ୍’ ପୁରସ୍କାର ସହିତ ଚର୍ଚ୍ଚାକୁ ଆସିଥିବା ମୟଙ୍କ ତୃତୀୟ ମ୍ୟାଚ୍ରେ ଆହତ ହେବାରୁ ଚାରି ସପ୍ତାହ ପାଇଁ ବାଦ ପଡିଥିଲେ।
ମଙ୍ଗଳବାର ଫିଟନେସ୍ ଟେଷ୍ଟ ପାସ୍ କରିବା ପରେ ସେ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ପ୍ରତ୍ୟାବର୍ତ୍ତନ କରିଥିଲେ କିନ୍ତୁ ୩.୧ ଓଭର ବୋଲିଂ କରିବା ପରେ ସେ ୩୧ ରନ୍ ଦେଇଥିବା ବେଳେ ପୁନର୍ବାର ଡଗ୍ଆଉଟ୍କୁ ଫେରିଥିଲେ।
ଯଦି ମୟଙ୍କ ଏହି ସମୟରେ ଫିଟ୍ ହୋଇଥାନ୍ତେ, ତେବେ ଟି -20 ବିଶ୍ୱକପ୍ରେ ତାଙ୍କ ଚୟନ ହେବାର ସମ୍ଭାବନା ଥିଲା କିନ୍ତୁ ବର୍ତ୍ତମାନ ତାଙ୍କୁ ଯତ୍ନ ସହକାରେ ପରିଚାଳନା କରିବା ହେଉଛି ଭାରତୀୟ କ୍ରିକେଟ୍ ପ୍ରତିଷ୍ଠାନର ପ୍ରାଥମିକ କାର୍ଯ୍ୟ।
ତାଙ୍କୁ ଖୁବ୍ ଶୀଘ୍ର ଏକ ପେସ୍ ବୋଲିଂ ଚୁକ୍ତି ହସ୍ତାନ୍ତର କରାଯିବ ଏବଂ ଥରେ ସେ ବିସିସିଆଇ ଢାଞ୍ଚାରେ ରହିଲେ ତାଙ୍କର ଅଭିବୃଦ୍ଧି ନିୟମିତ ଭାବରେ ନଜର ରଖାଯିବ ବୋଲି ସେ କହିଛନ୍ତି।
ବିସିସିଆଇ ସୂତ୍ରରୁ ପ୍ରକାଶ ଯେ ଜାତୀୟ ଚୟନ କମିଟି ଏବଂ ଭାରତୀୟ ଦଳ ପରିଚାଳନା ତାଙ୍କୁ ଧୀରେ ଧୀରେ ପ୍ରସ୍ତୁତ କରିବାକୁ ଚାହୁଁଛନ୍ତି ଏବଂ ନିଶ୍ଚିତ କରିଛନ୍ତି ଯେ ସେ ସଠିକ ଫିଟନେସ୍ ବଜାୟ ରଖିପାରିବେ।
