ମୁମ୍ବାଇ,୧।୧୨: ଦକ୍ଷିଣ ଆଫ୍ରିକା ବିପକ୍ଷରେ ଆସନ୍ତା ବୁଧବାର ଖେଳାଯିବାକୁ ଥିବା ଦ୍ୱିତୀୟ ଦିନିକିଆ ମ୍ୟାଚ୍ ପୂର୍ବରୁ ବିସିସିଆଇ ଭାରତୀୟ ଦଳର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ଏବଂ ଚୟନ କମିଟିର ମୁଖ୍ୟ ଅଜିତ ଅଗରକରଙ୍କ ସହ ଏକ ଜରୁରୀ ବୈଠକ ଡାକିଥିବା ଖବର ମିଳିଛି। ଟିମ୍ ଇଣ୍ଡିଆର କିଛି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ତୁରନ୍ତ ଆଲୋଚନା ପାଇଁ ଏହି ବୈଠକ ଆହୂତ କରାଯାଇଛି।
ଦକ୍ଷିଣ ଆଫ୍ରିକା ବିପକ୍ଷରେ ଘରୋଇ ଟେଷ୍ଟ୍ ସିରିଜରେ ଭାରତର ପରାଜୟ ପରେ ଦଳରେ ଦେଖାଯାଇଥିବା ତ୍ରୁଟି ଏବଂ ଭବିଷ୍ୟତ ପାଇଁ ‘ଚୟନରେ ସ୍ଥିରତା’ ଏବଂ ଦୀର୍ଘକାଳୀନ ରଣନୀତି ଉପରେ ସ୍ପଷ୍ଟତା ଆଣିବା ଏହି ବୈଠକର ମୁଖ୍ୟ ଲକ୍ଷ୍ୟ।
ରିପୋର୍ଟ ଅନୁଯାୟୀ, ବିସିସିଆଇ ସଚିବ ଦେବଜିତ ଶଇକିଆ, ଯୁଗ୍ମ ସଚିବ ପ୍ରଭତେଜ ସିଂ ଭାଟିଆ, ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ଏବଂ ଚୟନ କମିଟିର ମୁଖ୍ୟ ଅଜିତ ଅଗରକର ଏହି ଆଲୋଚନାରେ ସାମିଲ ହେବେ।
ବରିଷ୍ଠ ଖେଳାଳି ବିରାଟ କୋହଲି ଓ ରୋହିତ ଶର୍ମାଙ୍କ ଭବିଷ୍ୟତକୁ ନେଇ ଚାଲିଥିବା କଳ୍ପନାଜଳ୍ପନା ମଧ୍ୟରେ ଏହି ବୈଠକର ଆୟୋଜନ କରାଯାଇଛି। ତେବେ ମ୍ୟାଚ୍ ଦିନ ବୈଠକ ଥିବାରୁ ଏଥିରେ ବରିଷ୍ଠ ଖେଳାଳିମାନେ ଯୋଗଦେବାର ସମ୍ଭାବନା କମ୍ ବୋଲି ଜଣାପଡିଛି।
ଜଣେ ବରିଷ୍ଠ ବିସିସିଆଇ ଅଧିକାରୀ କହିଛନ୍ତି ଯେ, “ଟେଷ୍ଟ ସିରିଜ୍ ସମୟରେ ପଡ଼ିଆ ଭିତରେ ଓ ବାହାରେ ଦ୍ୱନ୍ଦ୍ୱପୂର୍ଣ୍ଣ ରଣନୀତି ଦେଖିବାକୁ ମିଳିଥିଲା। ଆଗାମୀ ଟି-୨୦ ଓ ଦିନିକିଆ ବିଶ୍ୱକପ୍ ପୂର୍ବରୁ ଆମେ ଏସବୁ ସମସ୍ୟାର ସମାଧାନ ଚାହୁଁଛୁ।”
ଏହି ବୈଠକ ଦଳ ପରିଚାଳନା ଏବଂ ବିଶେଷକରି କୋହଲି ଓ ରୋହିତଙ୍କ ଭଳି ବରିଷ୍ଠ ଖେଳାଳିଙ୍କ ମଧ୍ୟରେ ଥିବା ଯୋଗାଯୋଗରେ ସମ୍ଭାବ୍ୟ ତ୍ରୁଟିକୁ ସୂଚାଉଛି।
