ନୂଆଦିଲ୍ଲୀ,୨୫।୧ : ଜେଏନୟୁ ପରେ ଏବେ ଜାମିଆ ବିଶ୍ୱବିଦ୍ୟାଳୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ବିବିସି ଡକ୍ୟୁମେଣ୍ଟାରି ସ୍କ୍ରିନିଂକୁ ନେଇ ଏକ ଉତ୍ତେଜନା ସୃଷ୍ଟି ହୋଇଛି। ଜାମିଆ ବିଶ୍ୱବିଦ୍ୟାଳୟରେ ବିବିସି ଡକ୍ୟୁମେଣ୍ଟାରୀ ସ୍କ୍ରିନିଂ ଘଟଣାରେ ୪ ଜଣ ଛାତ୍ରଙ୍କୁ ଅଟକ ରଖାଯାଇଛି। ବୁଧବାର ଦିଲ୍ଲୀ ପୋଲିସ କହିଛି ଯେ ବିବିସି ଡକ୍ୟୁମେଣ୍ଟାରୀ ସ୍କ୍ରିନିଂ ଉପରେ ଜାମିଆ ମିଲିଆ ଇସଲାମିଆ ବିଶ୍ୱବିଦ୍ୟାଳୟ ବାହାରେ ଉତ୍ତେଜନା ସୃଷ୍ଟି କରିଥିବା ଅଭିଯୋଗରେ ଚାରି ଜଣ ଛାତ୍ରଙ୍କୁ ଗିରଫ କରାଯାଇଛି।
ଜାମିଆ ବିଶ୍ୱବିଦ୍ୟାଳୟର ମୁଖ୍ୟ ପ୍ରୋକ୍ଟରଙ୍କ ନିର୍ଦ୍ଦେଶରେ ବିବିସି ଡକ୍ୟୁମେଣ୍ଟାରୀ ସ୍କ୍ରିନିଂ ପୂର୍ବରୁ ଏହି ପଦକ୍ଷେପ ନିଆଯାଇଛି। ପୋଲିସ ସୂତ୍ର ଅନୁଯାୟୀ ଜାମିଆର ସୁରକ୍ଷାକୁ କଡାକଡି କରାଯାଇଛି। ବିଶ୍ୱବିଦ୍ୟାଳୟ ପ୍ରଶାସନ ଛାତ୍ରମାନଙ୍କୁ ବିବିସି ଡକ୍ୟୁମେଣ୍ଟାରୀ ସ୍କ୍ରିନିଂରୁ ନିବୃତ୍ତ ହେବାକୁ କହିଥିଲେ।
ବିନା ଅନୁମତିରେ କ୍ୟାମ୍ପସରେ ଛାତ୍ରମାନଙ୍କର କୌଣସି ବୈଠକ କିମ୍ବା କୌଣସି ଚଳଚ୍ଚିତ୍ରର ସ୍କ୍ରିନିଂ ଅନୁମତି ଦିଆଯିବ ନାହିଁ ବୋଲି ବିଶ୍ୱବିଦ୍ୟାଳୟ ପ୍ରଶାସନ ଏକ ବିଜ୍ଞପ୍ତିରେ କହିଛି। ଶାନ୍ତିପୂର୍ଣ୍ଣ ଏକାଡେମିକ ପରିବେଶକୁ ନଷ୍ଟ କରିବାକୁ ଚାହୁଁଥିବା ନ୍ୟସ୍ତସ୍ବାର୍ଥ ଲୋକ / ସଂଗଠନକୁ ରୋକିବା ପାଇଁ ବିଶ୍ୱବିଦ୍ୟାଳୟ ସମସ୍ତ ପଦକ୍ଷେପ ନେଉଛି। ଏଥିପାଇଁ ଆୟୋଜକଙ୍କ ବିରୋଧରେ କଠୋର ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସୂଚନାଯୋଗ୍ୟ, ମଙ୍ଗଳବାର ସାରେ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (ଜେଏନୟୁ) ରେ ବିବିସି ଡକ୍ୟୁମେଣ୍ଟାରୀ ସ୍କ୍ରିନିଂକୁ ନେଇ ଉତ୍ତେଜନା ଦେଖାଦେଇଥିଲା। ଜବାହରଲାଲ ନେହେରୁ ବିଶ୍ୱବିଦ୍ୟାଳୟର କିଛି ଛାତ୍ର ମଙ୍ଗଳବାର ରାତି ୯ ଟାରେ ଏହି ଡକ୍ୟୁମେଣ୍ଟାରୀର ସ୍କ୍ରିନିଂ କରିଥିଲେ। ତେବେ ସ୍କ୍ରିନିଂ ପୂର୍ବରୁ ଛାତ୍ର ସଂଗଠନ କାର୍ଯ୍ୟାଳୟରେ ଥିବା ଲାଇଟ ବନ୍ଦ ହୋଇଯାଇଥିଲା।
ପ୍ରଶାସନ ବିଦ୍ୟୁତ ଓ ଇଣ୍ଟରନେଟ କାଟି ଦେଇଥିବା ଛାତ୍ରମାନେ ଅଭିଯୋଗ କରିଛନ୍ତି। ପରେ ଛାତ୍ରମାନେ ଏକ ବିକ୍ଷୋଭ ପ୍ରଦର୍ଶନ କରିଥିଲେ ଏବଂ ମୋବାଇଲ ଫୋନରେ ଡକ୍ୟୁମେଣ୍ଟାରୀ ଦେଖିବାବେଳେ ସେମାନଙ୍କୁ ଆକ୍ରମଣ କରାଯାଇଥିବା ଦାବି କରିଥିଲେ। କେତେକ ଅଭିଯୋଗ କରିଛନ୍ତି ଯେ ଆକ୍ରମଣକାରୀମାନେ ଅଖିଲ ଭାରତୀୟ ବିଦ୍ୟା ପରିଷଦ (ଏବିଭିପି)ର ସଦସ୍ୟ ଥିଲେ। ତେବେ ଏବିଭିପି ଏହି ଅଭିଯୋଗକୁ ଅସ୍ବୀକାର କରିଛି। କୁହାଯାଉଛି ଯେ ଏହି ସମୟ ମଧ୍ୟରେ ପଥର ଫିଙ୍ଗିବା ମଧ୍ୟ ଘଟିଥିଲା।
