ଖୋର୍ଦ୍ଧା ଅଫିସ,୨୨।୧: କରୋନା କଟକଣା ଯୋଗୁ ଦୀର୍ଘ ୯ ମାସ ବନ୍ଦ ରହିବା ପରେ ଖୋର୍ଦ୍ଧା ଜିଲାର ପର୍ଯ୍ୟଟନ ସ୍ଥଳୀଗୁଡ଼ିକ ଖୋଲିଛି। ଜିଲାର ପ୍ରମୁଖ ପର୍ଯ୍ୟଟନ ସ୍ଥଳ ବରୁଣେଇ ପୀଠରେ ଧିରେ ଧିରେ ପର୍ଯ୍ୟଟକଙ୍କ ଭିଡ଼ ଜମିବାରେ ଲାଗିଛି। ଏହାର ପ୍ରାକୃତିକ ମନୋରମ ପରିବେଶ, ମା’ ବରୁଣେଇ ଓ କରୁଣେଇଙ୍କ ମନ୍ଦିର ଏଠାକୁ ପର୍ଯ୍ୟଟକଙ୍କୁ ଟାଣି ଆଣେ। ତେବେ ବରୁଣେଇ ପୀଠ ଚାରିଆଡ଼େ ଅଳିଆ ଆର୍ବଜନା ପଡ଼ିରହିଛି। ଫଳରେ ପର୍ଯ୍ୟଟକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏହା ଜିଲାର ଏକ ପ୍ରମୁଖ ପର୍ଯ୍ୟଟନ ସ୍ଥଳ ହୋଇଥିଳେ ମଧ୍ୟ ଏଠାକାର ସ୍ବଚ୍ଛତା ପ୍ରତି ସ୍ବତନ୍ତ୍ର ଦୃଷ୍ଟିି ଦିଆଯାଉନାହିଁ ବୋଲି ସାଧାରଣରେ ଅଭିଯୋଗ ହେଉଛି। କେବଳ ଶୌଚାଳୟକୁ ବାଦ ଦେଲେ ପର୍ଯ୍ୟଟକଙ୍କ ଲାଗି କୌଣସି ବିଶେଷ ବ୍ୟବସ୍ଥା ନାହିଁ। ପାନୀୟଜଳ ବ୍ୟବସ୍ଥା ଜରାଜୀର୍ଣ୍ଣ ଅବସ୍ଥାରେ ରହିଛି। ପଲିଥିନ, ପ୍ଲାଷ୍ଟିକ ବୋତଲ, ପ୍ଲାଷ୍ଟିକ ପ୍ଲେଟ ପ୍ରଭୃତି ବରୁଣେଇ ପାଦଦେଶରେ ପଡ଼ିରହିଥିବା ଦେଖିବାକୁ ମିଳିଛି। ଫଳରେ ପରିବେଶ ଦୂଷିତ ହେଉଛି। ଜିଲାର ପ୍ରମୁଖ ପର୍ଯ୍ୟଟନସ୍ଥଳରେ ଯଦି ଏଭଳି ଅବ୍ୟବସ୍ଥା ତେବେ ଅନ୍ୟ ପର୍ଯ୍ୟଟନସ୍ଥଳ ଅବସ୍ଥା କିଭଳି ଥିବ ତାହା ଏଥିରୁ ଅନୁମାନ କରାଯାଇପାରେ ବୋଲି କଟକରୁ ସପରିବାର ଆସିଥିବା ଗଗନ ସାହୁ କହିଛନ୍ତି। ବାରିପଦାରୁ ପିକ୍ନିକ ଲାଗି ଆସିଥିବା ହରିହର ପ୍ରଧାନ କହିଛନ୍ତି, ଏହାର ପ୍ରାକୃତିକ ପରିବେଶ ଉପଭୋଗ କରିବାକୁ ଆମେ ଏଠାକୁ ଧାଇଁ ଆସିଛୁ। ପାହାଡ଼ରେ ବୁଲାବୁଲି ସହ ବଣଭୋଜିର ମଜା ନେବାକୁ ଆସିଛୁ। ତେବେ ବରୁଣେଇ ପୀଠରେ ପାନୀୟଜଳର କୌଣସି ବ୍ୟବସ୍ଥା ନାହିଁ। ପାଣି ପାଇପ ଅଚଳ ହୋଇପଡିଛି। ଏହାର ଉପରେ ଲତାବୁଦା ମାଡିଗଲାଣି। ଏଠାକାର ପରିବେଶ ସ୍ବଚ୍ଛତା ପ୍ରତି ଗୁରୁତ୍ୱ ଦିଆଯାଉନାହିଁ। ସ୍ଥାନୀୟ ପ୍ରଶାସନର ଅବହେଳାକୁ ସେ ଦାୟୀ କରିଛନ୍ତି। ସେହିପରି ଭୁବନେଶ୍ୱରସ୍ଥ ଏକ ଘରୋଇ କଲେଜରୁ ବୁଲିବାକୁ ଆସିଥିବା ଛାତ୍ରୀଛାତ୍ରମାନେ ମଧ୍ୟ ଅନୁରୂପ ଭାବେ ସ୍ବଚ୍ଛତାକୁ ନେଇ ପ୍ରଶ୍ନ ଉଠାଇଛନ୍ତି। ବରୁଣେଇ ଏକ ପ୍ରମୁଖ ପର୍ଯ୍ୟଟନ ସ୍ଥଳ ହୋଇଥିବା ବେଳେ ଏହାର ରକ୍ଷଣବେକ୍ଷଣା ପ୍ରତି ଗୁରୁତ୍ୱ ଦିଆଯାଉନାହିଁ ବୋଲି ଯୁବନେତା ପ୍ଲାବନ ପଟ୍ଟନାୟକ କହିଛନ୍ତି। ବରୁଣେଇ ପୀଠର ପୁନରୁଦ୍ଧାର ଲାଗି ସେ ଦାବି କରିଛନ୍ତି। ଐତିହ୍ୟ ଗବେଷକ ପ୍ରାଧ୍ୟାପକ ଗୋପାଳ କୃଷ୍ଣ ଦାସ କହିଛନ୍ତି, ବରୁଣେଇ ପୀଠର ଏକ ଗୌରବମୟ ଇତିହାସ ରହିଛି। ଖୋର୍ଦ୍ଧାର ଐତିହ୍ୟ କୀର୍ତ୍ତିରାଜି ସଂରକ୍ଷଣ ଲାଗି ସରକାର ଗୁରୁତ୍ୱ ଦେବା ଆବଶ୍ୟକ। ଔଷଧୀୟ ଗୁଳ୍ମ ଏବଂ ଚତୁଃପାର୍ଶ୍ୱରେ ଘେରି ରହିଥିବା ପାହାଡର ସଂରକ୍ଷଣ ନିତାନ୍ତ ଜରୁରୀ ବୋଲି ସେ କହିଛନ୍ତି।
ବରୁଣେଇ ଯିବାକୁ ପାହାଚର ଉଭୟ ପାର୍ଶ୍ୱରେ କାଠଗଣ୍ଡି ପଡ଼ିରହିଛି। ଏହାକୁ ଉଠାଯିବା ବ୍ୟବସ୍ଥା କରାଯାଉନାହିଁ। ପାନୀୟଜଳ ଷ୍ଟାଣ୍ଡପୋଷ୍ଟ ଖରାପ ଥିବାରୁ ପର୍ଯ୍ୟଟକମାନେ ବାହାରୁ ପାଣିବୋତଲ କିଣି ବ୍ୟବହାର କରିବାକୁ ବାଧ୍ୟ ହେଉଛନ୍ତି। ଏ ନେଇ ପୌର କାର୍ଯ୍ୟନିର୍ବାହୀ ଅଧିକାରୀ ଶ୍ୱେତପଦ୍ମା ଶତପଥୀଙ୍କୁ ପଚାରିବାରେ କହିଛନ୍ତି, କୋଭିଡ୍ କଟକଣା ଯୋଗୁ ଏହି ପୀଠ ବନ୍ଦ ଥିବାରୁ ପର୍ଯ୍ୟଟକ ଆସିବା ବନ୍ଦ ରହିଥିଲା। ଏବେ ଖୋଲିବା ପରେ ପୀଠର ସ୍ବଚ୍ଛତା ପ୍ରତି ଗୁରୁତ୍ୱ ଦିଆଯିବ। ପାନୀୟଜଳ ସମେତ ଅନ୍ୟାନ୍ୟ ସମସ୍ୟା ଦୂର ଦିଗରେ ପଦକ୍ଷେପ ନିଆଯିବ।
