ବରଗଡ଼,୧।୧୨(ପ୍ରେମାନନ୍ଦ ଖମାରୀ): ବରଗଡ଼ ଧନୁଯାତ୍ରା ମହୋତ୍ସବକୁ ଆଉମାତ୍ର ଏକ ସପ୍ତାହ ବାକି। ଆସନ୍ତା ୨୪ତାରିଖରୁ ଏହି ମହୋତ୍ସବ ଆରମ୍ଭ ହେବ। ଦୀର୍ଘ ୧୧ଦିନ ବ୍ୟାପୀ ୨୦୨୬ ଜାନୁଆରୀ ୩ ପର୍ଯ୍ୟନ୍ତ ଚାଲିବ। ଏଥିପାଇଁ ଏଥର ଯେଭଳି ପ୍ରସ୍ତୁତି ଚାଲିଛି, ସେଥିରୁ ଏବେଠାରୁ ଧନୁଯାତ୍ରାର ମହକ ବାରି ହୋଇ ପଡୁଛି। ଉଭୟ ବରଗଡ଼ ସହର(ମଥୁରାନଗରୀ) ଏବଂ ଅମ୍ବାପାଲି(ଗୋପପୁର)ରେ ସାଜସଜ୍ଜା ଆରମ୍ଭ ହୋଇଯାଇଛି। ସେହିପରି କଳାକାରଙ୍କ ପୂର୍ବାଭ୍ୟାସ(ରିହର୍ସାଲ) ମଧ୍ୟ ପଛରେ ପଡ଼ି ନାହିଁ। ବରଗଡ଼ ଗାନ୍ଧିଛକ କଲ୍ୟାଣ ମଣ୍ଡପ ଏବଂ ଅମ୍ବାପାଲି ସମଲେଶ୍ୱରୀ ଉଚ୍ଚ ବିଦ୍ୟାଳୟ ପରିସର ଆଖଡ଼ାଶାଳ ପାଲଟିଛି। ପୂର୍ବାହ୍ନରେ ଗାନ୍ଧିଛକ କଲ୍ୟାଣ ମଣ୍ଡପରେ ମଥୁରା କଳାକାର ଏବଂ ସନ୍ଧ୍ୟାରେ ସମଲେଶ୍ୱରୀ ଉଚ୍ଚ ବିଦ୍ୟାଳୟରେ ଗୋପପୁର କଳାକାରମାନେ ପୂର୍ବାଭ୍ୟାସ କରୁଛନ୍ତି। ଧନୁଯାତ୍ରା ମହୋତ୍ସବର ବିଭିନ୍ନ ଚରିତ୍ରର ଦୃଶ୍ୟାଭିନୟ ଉପରେ ଉପଦେଷ୍ଟାମାନେ କଳାକାରମାନଙ୍କୁ ଦିଗଦର୍ଶନ ଦେଉଛନ୍ତି। କଲ୍ୟାଣ ମଣ୍ଡପରେ ଉଗ୍ରସେନ, କଂସ ମହାରାଜ ସମେତ ଅନ୍ୟ ପାର୍ଶ୍ୱ କଳାକାରମାନେ ପୂର୍ବାଭ୍ୟାସ କରୁଛନ୍ତି। ସେହିପରି ସମଲେଶ୍ୱରୀ ଉଚ୍ଚ ବିଦ୍ୟାଳୟରେ ଶ୍ରୀକୃଷ୍ଣ, ବଲରାମ, ଶ୍ରୀରାଧାଙ୍କ ସମେତ ଅନ୍ୟ କଳାକାରବୃନ୍ଦଙ୍କ ପୂର୍ବାଭ୍ୟାସ ଜାରି ରହିଛି। ପୂର୍ବାଭ୍ୟାସରେ ସବୁ କଳାକାରଙ୍କ ଦୃଶ୍ୟାଭିନୟ ଉଚ୍ଚକୋଟୀର ହେଉଛି। ଏହା ଦେଖିବା ପାଇଁ ଉଭୟ କଲ୍ୟାଣ ମଣ୍ଡପ ଏବଂ ସମଲେଶ୍ୱରୀ ଉଚ୍ଚ ବିଦ୍ୟାଳୟରେ ସବୁଦିନ ଲୋକଙ୍କ ଗହଳି ଜମୁଛି।
Dharitri – Odisha’s No.1 Odia Daily
