ସୁନ୍ଦରଗଡ଼, ୨୭।୭(ଡି.ଏନ୍.ଏ.)- ସୁନ୍ଦରଗଡ଼ ସହର ଉପକଣ୍ଠ କିରେଇସ୍ଥିତ ଉତ୍କଳ ଗ୍ରାମ୍ୟ ବ୍ୟାଙ୍କରୁ ମଙ୍ଗଳବାର ଅପରାହ୍ନରେ ଡକାୟତି ହୋଇଛି। ୪ ଜଣ ଦୁର୍ବୃତ୍ତ ବ୍ୟାଙ୍କ କର୍ମଚାରୀଙ୍କୁ ରିଭଲଭର୍ ଦେଖାଇ ଲକ୍ଷରୁ ଊର୍ଦ୍ଧ୍ୱ ଟଙ୍କା ଲୁଟି ନେଇଛନ୍ତି। ଖବର ପାଇ ସୁନ୍ଦରଗଡ଼ ଏସ୍ପି ସାଗରିକା ନାଥ, ସଦର ଏସ୍ଡିପିଓ ମଧୁସିକ୍ତା ମିଶ୍ର ଓ ସଦର ଥାନା ଆଇଆଇସି ଦାୟିତ୍ୱରେ ଥିବା ତାଲିମପ୍ରାପ୍ତ ଡିଏସ୍ପି ସନ୍ତୋଷ କୁମାର ବାରିକ ସାଇଣ୍ଟିଫିକ୍ ଟିମ୍ ସହିତ ବ୍ୟାଙ୍କରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।
ବ୍ୟାଙ୍କର ଶାଖା ପରିଚାଳକ ନୀଳକଣ୍ଠ କୁମାର ସନ୍ଧ୍ୟାରେ ଏନେଇ ସଦର ଥାନାରେ ଲିଖିତ ଭାବେ ରିପୋର୍ଟ କରିବା ପରେ ପୋଲିସ ଏକ ମାମଲା ରୁଜୁ କରିଛି। ୪ଜଣ ଦୁର୍ବୃତ୍ତ ବିଜୁ ଏକ୍ସପ୍ରେସ୍ ଓ୍ବେ ପାର୍ଶ୍ୱରେ ଏକ ନୂତନ କୋଠାରେ ଚାଲିଥିବା ଏହି ବ୍ୟାଙ୍କ ଭିତରକୁ ମଧ୍ୟାହ୍ନ ପ୍ରାୟ ୧ଟା ୪୦ରେ ପଶି ଆସିଥିଲେ। ସେମାନେ ରିଭଲଭର ଦେଖାଇ କର୍ମଚାରୀ ଓ ଗ୍ରାହକମାନଙ୍କୁ ବନ୍ଦ କରିଦେଇଥିଲେ ଗୋଟିଏ କୋଠରିରେ। କ୍ୟାଶ କାଉଣ୍ଟରରୁ ୨ଲକ୍ଷ ୮୭ହଜାର ଟଙ୍କା ଲୁଟି ନେଇଥିଲେ। ଏହା ସହ ଜଣେ ମହିଳା କର୍ମଚାରୀ ଓ ଗ୍ରାହକଙ୍କଠାରୁ ସୁନାଚେନ୍, ମୋବାଇଲ ଫୋନ୍, ଏଟିଏମ୍ କାର୍ଡ ଲୁଟି ୨ଟା ୨୦ରେ ବ୍ୟାଙ୍କରୁ ଫେରାର ହୋଇଯାଇଥିଲେ।
କର୍ମଚାରୀ ଓ ଗ୍ରାହକମାନଙ୍କ ସୂଚନା ମୁତାବକ ଏହି ଦୁର୍ବୃତ୍ତମାନେ ୨ଟି ବାଇକ୍ରେ ଆସିଥିଲେ। ସେମାନେ ଝାଡଖଣ୍ଡୀ ହିନ୍ଦୀ ଭାଷାରେ କଥା ହେଉଥିଲେ। ୨ଜଣ ମାସ୍କ ପିନ୍ଧିଥିବାବେଳେ ୨ଜଣ ପିନ୍ଧି ନ ଥିଲେ। ଏସ୍ପି ସାଗରିକା ନାଥଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ପୋଲିସର ସ୍ବତନ୍ତ୍ର ସ୍କ୍ବାଡ୍ ବ୍ୟାଙ୍କର ସିସିଟିିଭି ଫୁଟେଜ୍ ଆଧାରରେ ତଦନ୍ତ ଆରମ୍ଭ କରିଛି।
