ମୁମ୍ବାଇ,୨୪।୬ : ଭାରତୀୟ ଜନତା ପାର୍ଟି (ଭାଜପା)ଉଦ୍ଧବ ଠାକରେଙ୍କ ବିରୋଧରେ ସେ ବାଲାସାହେବ ଠାକରେଙ୍କୁ ଅପମାନିତ କରିଥିବା ଅଭିଯୋଗ କରାଯାଇଛି। ଭାଜପାକୁ ପରାସ୍ତ କରିବାକୁ ଉଦ୍ଧବ ଠାକରେ କେଉଁମାନଙ୍କ ପାଖରେ ବସିଛନ୍ତି ତାହା ଭୁଲି ଯାଇଛନ୍ତି ବୋଲି ଭାଜପା ଅକ୍ଷେପ କରିଛି। ଭାଜପା ନେତା ତଥା ମହାରାଷ୍ଟ୍ରର ଊପମୁଖ୍ୟମନ୍ତ୍ରୀ
ଦେବେନ୍ଦ୍ର ଫଡନାଭିସ ଏହାକୁ ନେଇ ନିନ୍ଦା କରିଛନ୍ତି। ସୂଚନାଯୋଗ୍ୟ ଶୁକ୍ରବାର ପାଟନାରେ ଭାଜପା ବିରୋଧରେ ବିରୋଧୀ ଦଳର ଏକ ବୈଠକ ଅନୁଷ୍ଠିତ ହୋଇଥିଲା। ବିରୋଧୀଙ୍କୁ ଏକଜୁଟ କରିବା ପାଇଁ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଏହି ବୈଠକ ଡାକିଥିଲେ। ଏଥିରେ କଂଗ୍ରେସ ନେତା ରାହୁଲ ଗାନ୍ଧୀ, ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଏବଂ ବିରୋଧୀ ଦଳର ସମସ୍ତ ବଡ ନେତା ସାମିଲ ହୋଇଥିଲେ। ଏହାକୁ ନେଇ ଭାଜପା ପକ୍ଷରୁ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବଙ୍କୁ କଡ଼ା ସମାଲୋଚନା କରାଯାଇଛି। ଶିବସେନା ପ୍ରତିଷ୍ଠାତା ବାଲାସାହେବ ଠାକରେଙ୍କ ଏକ ପୁରୁଣା ଭିଡିଓ ଶେୟାର କରଯାଇଥିଲା। ଏଥିରେ ବାଳାସାହେବ ଲାଲୁ ପ୍ରସାଦ ଯାଦବଙ୍କ ଉପରେ ମନ୍ତବ୍ୟ ଦେଇଥିଲେ। ଏହାଦ୍ୱାରା ବାଲାସାହେବଙ୍କୁ ଅପମାନିତ କରାଯାଇଥିବା ଭାଜପା ଅଭିଯୋଗ କରିଛି।
ନିଜ ପରିବାର ତଥା ବଂଶବାଦକୁ ବଞ୍ଚାଇବା ପାଇଁ ବିରୋଧୀ ଦଳ ମେଣ୍ଟ କରିଛନ୍ତି। ୨୦୧୯ରେ ମଧ୍ୟ ସମାନ ପ୍ରୟାସ କରାଯାଇଥିଲା, କିନ୍ତୁ କୌଣସି ସୁଫଳ ମିଳି ନ ଥିଲା। ମେହବୁବା ମୁଫତିଙ୍କୁ ନେଇ ଆମକୁ ଥଟ୍ଟା କରୁଥିବା ଉଦ୍ଧବ ଠାକରେ ଆଜି ତାଙ୍କ ସହ ବସିଥିବାର ଦେଖି ମୁଁ ଆଶ୍ଚର୍ଯ୍ୟ ହୋଇଯାଉଛି।
ଲାଲୁ ପ୍ରସାଦର ଏକ ପୁରୁଣା ଭିଡିଓ ଶେୟାର କରାଯାଇ ଠାକରେ ପରିବାରର ମୂଳବଂଶ ବିହାରରୁ ଆସିଥିବା ଦାବି କରାଯାଇଥିଲା। ଏନେଇ ଭାଜପା ନେତା ଚିତ୍ରା କିଶୋର ୱାଘ କହିଛନ୍ତି ଉଦ୍ଧବ ଠାକରେଙ୍କୁ ତାଙ୍କ ପିତାଙ୍କୁ ଅପମାନିତ କରିଥିବା ପୁଅ ଭାବରେ ଇତିହାସରେ ସ୍ମରଣ କରାଯିବ। ଲାଲୁ ପ୍ରସାଦ ଥରେ ଦାବି କରିଥିଲେ ଠାକରେ ପରିବାର ବିହାରର ଏବଂ ବାଲାସାହେବ ଠାକରେ ମହାରାଷ୍ଟ୍ରର ଜଣେ ଅନୁପ୍ରବେଶକାରୀ। ଆଜି ଉଦ୍ଧବ ଠାକରେ ଯେଉଁମାନେ ବାଲାସାହେବ ଠାକରେଙ୍କ ମରାଠୀ ପରିଚୟ ଉପରେ ପ୍ରଶ୍ନ କରିଥିଲେ ସେମାନଙ୍କ ସହ ଅଛନ୍ତି। ଏହା ଅତ୍ୟନ୍ତ ଲଜ୍ଜାଜନକ।
