ବଲାଙ୍ଗୀର ଅଫିସ, ୫ା୧: ମଙ୍ଗଳବାରଠାରୁ ବଲାଙ୍ଗୀର ଜିଲାର ଧାର୍ମିକ ଅନୁଷ୍ଠାନ ଯଥା ମନ୍ଦିର, ଗୀର୍ଜା, ମସଜିଦ୍, ଗୁରୁଦ୍ୱାରା ଖୋଲିବା ପାଇଁ ଜିଲା ପ୍ରଶାସନ ପକ୍ଷରୁ ଅନୁମତି ଦିଆଯାଇଛି। ଜିଲାପାଳ କାର୍ଯ୍ୟାଳୟ ଜରୁରୀ ଶାଖା ପକ୍ଷରୁ ଦିଆଯାଇଥିବା ନିର୍ଦ୍ଦେଶାବଳୀରେ ଧାର୍ମିକ ଅନୁଷ୍ଠାନ ଖୋଲିବା ତଥା ସେଠାରେ ଜନସାଧାରଣ ଦର୍ଶନ ଓ ଉପାସନା କରିବା ବେଳେ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡ୍ୟୁର(ଏସ୍ଓପି) ପାଳନ କରିବାକୁ ପରାମର୍ଶ ଦିଆଯାଇଛି। ନିର୍ଦ୍ଦେଶନାମା ପରେ ଦୀର୍ଘ ସାଢ଼େ ୯ ମାସ ହେଲା ଜନସାଧାରଣଙ୍କ ଦର୍ଶନ ଓ ଉପାସନା ପାଇଁ ବନ୍ଦ ରହିଥିବା ଧାର୍ମିକ ଅନୁଷ୍ଠାନଗୁଡିକ ଖୋଲିବ। ଲୋକେ ଧାର୍ମିକ ଅନୁଷ୍ଠାନ ଗଲାବେଳକୁ ମାସ୍କ ପରିଧାନ, ସାମାଜିକ ଦୂରତ୍ୱ ପାଳନ କରିବାକୁ ପରାମର୍ଶ ଦିଆଯାଇଛି ା ଏହାସହିତ ସପ୍ତାହରେ ଗୋଟିଏ ଦିନ ଧର୍ମାନୁଷ୍ଠାନଗୁଡିକ ବନ୍ଦ ରହିବ ଓ ସାନିଟାଇଚେସନ୍ କରାଯିବ। କୌଣସି ଧାର୍ମିକ ଅନୁଷ୍ଠାନ ଭିତରେ ପ୍ରସାଦ ସେବନକୁ ବାରଣ କରାଯାଇଥିବା ବେଳେ ଭକ୍ତମାନେ ଦେବାଦେବୀଙ୍କ ମୂର୍ତ୍ତିକୁ ନ ଛୁଇଁବାକୁ କୁହାଯାଇଛି। ଏହା ସହିତ ୬୫ ବର୍ଷରୁ ଉର୍ଦ୍ଧ୍ୱ ବୟସ୍କ ଲୋକ, ୧୦ ବର୍ଷରୁ ତଳ ବୟସ୍କ ପିଲାଛୁଆ, ଗର୍ଭବତୀ ମହିଳା ଏବଂ ସଂକ୍ରମଣ ରୋଗପ୍ରତି ସମ୍ବେଦନଶୀଳ ବ୍ୟକ୍ତି ମନ୍ଦତର ଭିତରକୁ ନ ଯିବା ପାଇଁ ପରାମର୍ଶ ଦିଆଯାଇଛି। ଏହା ସହିତ ଧର୍ମାନୁଷ୍ଠାନ ପ୍ରବେଶ ପଥ ଓ ପ୍ରସ୍ଥାନ ପଥ ଅଲଗା ଚିହ୍ନଟ, ଭକ୍ତଙ୍କ ପରିଚାଳନା ପାଇଁ ବାରିକେଡ, ପ୍ରବେଶ ପଥରେ ଥର୍ମାଲ ସ୍କାନିଂ କରି ଭକ୍ତଙ୍କୁ ପ୍ରବେଶ କରାଯିବା ନେଇ ପରାମର୍ଶ ଦିଆଯାଇଛି। ମନ୍ଦିର ପୂଜକ ଓ ଟ୍ରଷ୍ଟ ତଥା କମିଟି ପ୍ରତିନିଧିଙ୍କ ସ୍ବାସ୍ଥ୍ୟ ପରୀକ୍ଷା କରାଯିବ। ଏହି ନିୟମକୁ କଡାକଡି ଭାବେ ପାଳନ କରାଯିବାକୁ ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଛି ା ସୁଚାରୁରୂପେ ଧାର୍ମିକ ଅନୁଷ୍ଠାନ ଖୋଲିବା, ଜନସାଧାରଣଙ୍କ ସୁଗମ ଦର୍ଶନ ଓ ଉପାସନା ପାଇଁ ପଦକ୍ଷେପ ନେବାକୁ ପରାମର୍ଶ ଦିଆଯାଇଛି । ଏନେଇ ପ୍ରଶାସନ ପକ୍ଷରୁ ନଜର ଦେବାକୁ ବିଭିନ୍ନ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି । କୌଣସି ବ୍ୟକ୍ତି ନିର୍ଦ୍ଦେଶନାମ ଖିଲାପ କଲେ ତାଙ୍କ ଉପରେ ନିୟମାନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଛି ।
