ବୈଶିଙ୍ଗା,୨୮।୮(ରତନ ଦାଶ): ମୟୂରଭଞ୍ଜ ଜିଲାର ବୈଶିଙ୍ଗା ପୋଲିସ ପକ୍ଷରୁ ଗୁରୁବାର ଅପରାହ୍ନ ୧ଟା ସମୟରେ ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଯାଇଛି। ମିଳିଥିବା ସୂଚନା ମୁତାବକ ବେତନଟୀ ଓ ବୈଶିଙ୍ଗା ଥାନା ଅଞ୍ଚଳରେ ବାଇକ ଓ ମୋବାଇଲ ଲୁଟେରା ଗ୍ୟାଙ୍ଗ ସକ୍ରୀୟ ହୋଇପଡ଼ିଥିଲେ ଏବଂ ବିଭିନ୍ନ ସ୍ଥାନରେ ସିରିଜ ଲୁଟ , ଛିନତାଇ ଓ ଚୋରି ଘଟଣାରେ ଅସ୍ତବ୍ୟସ୍ତ ହୋଇ ପଡ଼ିଥିଲା ପୋଲିସ ପ୍ରଶାସନ। ତେବେ ବୁଧବାର ରାତିରେ ଥାନାଧିକାରୀ ବାରିଣୀ ଦାସଙ୍କ ନେତୃତ୍ୱରେ ଦେବାଶିଷ ମଣ୍ଡଳ, ପ୍ରଦୀପ କୁମାର ଦେ ଓ ଅନ୍ୟାନ୍ୟ ପୋଲିସ କର୍ମଚାରୀମାନେ ସମ୍ପୃକ୍ତ ଦୁର୍ବୃତ୍ତମାନଙ୍କୁ ଗିରଫ କରାଯିବା ସହିତ ଲୁଟ ସାମଗ୍ରୀ ଉଦ୍ଧାର କରିବାରେ ସଫଳତା ହାସଲ କରିଛନ୍ତି ।
ଖବରରୁ ପ୍ରକାଶ ଯେ, ମେ’ ୧୯ ତାରିଖ ଦିନ ବାଲେଶ୍ୱର ଶିଳ୍ପାଞ୍ଚଳ ଥାନା ଅର୍ନ୍ତଗତ ଛଣପୁର ଗ୍ରାମର ସନ୍ତୋଷ ବେହେରା ବୈଶିଙ୍ଗା ନିକଟସ୍ଥ ପଣସିଆ ଗ୍ରାମର ଶିବ ସିଂଙ୍କ ଘରକୁ ଆସିଥିଲେ। କିଛି ସମୟ ପରେ ସେ ଘରୁ ବାହାରି ତାଙ୍କ ବାଇକଟିକୁ ଆଉ ପାଇ ନ ଥିଲେ। ଏନେଇ ସେ ଥାନାରେ ଏତଲା ଦେଇଥିଲେ। ତାଙ୍କ ଏତଲା ମୂଳେ କେସ ନଂ ୨୫୮ ରୁଜୁ କରାଯାଇ ତଦନ୍ତ ଆରମ୍ଭ ହୋଇଥିଲା ଏବଂ ପରଦିନ ସେହି ପଣସିଆ ଗ୍ରାମର ବନା ସିଂ ଙ୍କ ପୁଅ କୃଷ୍ଣକୁ ଗିରଫ କରିବା ସହ ସନ୍ତୋଷଙ୍କ ଚୋରି ବାଇକଟିକୁ ଜବତ କରି କୋର୍ଟ ଚାଲାଣ କରିଥିଲା ବୈଶିଙ୍ଗା ପୋଲିସ। ତେବେ ଏହା ପଛରେ ଆହୁରି କିଛି ଦୁର୍ବୃତ୍ତ ସମ୍ପୃକ୍ତ ଥିବା ସୂଚନା ମିଳିବା ପରେ ତଦନ୍ତକୁ ତ୍ୱରାନ୍ବିତ କରାଯାଇଥିଲା। ବୁଧବାର ସାରେ ସମଗ୍ର ଅଞ୍ଚଳ ଗଣେଶ ପୂଜା ପାଇଁ ଚଳଚଞ୍ଚଳ ଥିବା ସୁଯୋଗରେ ମୟୂରଭଞ୍ଜ ଓ ବାଲେଶ୍ୱର ଜିଲାର କେତେକ ସ୍ଥାନରେ ପୋଲିସ ପକ୍ଷରୁ ଚଢ଼ାଉ କରାଯାଇ ପଣସିଆ ଗ୍ରାମର ଅଶୋକ ସିଂ ଓ ବଡ଼ସାହି ଥାନା ଅର୍ନ୍ତଗତ ଭିମଦା ଗ୍ରାମର ଶିବଶଙ୍କର ଗିରିଙ୍କୁ ଗିରଫ କରାଯିବା ସହିତ ମୋବାଇଲ, ବାଇକ ଓ ତିନିଟି ବଡ଼ ବ୍ୟାଟେରୀ ଜବତ କରାଯାଇଛି। ତେବେ ବେତନଟୀ ପୋଲିସ ଉପଖଣ୍ଡ ଅଧିକାରୀ ସୁଶ୍ରୀ ମିନତୀ ବିଶ୍ବାଳଙ୍କ ତତ୍ତ୍ୱାବଧାନରେ ତଦନ୍ତ ଜାରି ରହିଛି ଏବଂ ଏହି ରାକେଟରେ ସମ୍ପୃକ୍ତ ଆହୁରି କିଛି ଅଭିଯୁକ୍ତ ଖୁବଶୀଘ୍ର ଗିରଫ ହେବାର ସମ୍ଭାବନା ରହିଛି ବୋଲି ପ୍ରକାଶ କରିଛନ୍ତି ବାରିପଦା ଏଏସ୍ପି ଦୀପକ କୁମାର ଗୋଚ୍ଛାୟତ।
