ବାହାନଗା, ୨୨ା୧୨-୧୦ହଜାରରୁ ଊର୍ଦ୍ଧ୍ୱ ସାମାଜିକ ଉପକରଣ, ୩୦ହଜାରରୁ ଊର୍ଦ୍ଧ୍ୱ ବିଜ୍ଞାନ ଓ ଶିକ୍ଷଣୀୟ ସାମଗ୍ରୀ ପ୍ରସ୍ତୁତ କରି ବାଲେଶ୍ୱର ଜିଲା ବାହାନଗା ବ୍ଲକ ଅଞ୍ଚଳର ଯୁବ ଇଞ୍ଜିନିୟର ଡ. ମିହିର କୁମାର ପଣ୍ଡା ଲିମିକା ବୁକ୍ ଅଫ୍ ରେକର୍ଡସରେ ସ୍ଥାନ ପାଇଛନ୍ତି। ଦୀର୍ଘ ୩୦ବର୍ଷର ସାଧନା, ଛାତ୍ରୀଛାତ୍ର, ବିଭିନ୍ନ ଅନୁଷ୍ଠାନର ପ୍ରେରଣା ଓ ମାତା ସେବତୀ ପଣ୍ଡା, ପିତା ସ୍ବର୍ଗତ ରମାକାନ୍ତ ପଣ୍ଡାଙ୍କ ଆଶୀର୍ବାଦ ଯୋଗୁ ସଫଳତାର ଅଧିକାରୀ ହୋଇପାରିଛନ୍ତି ବୋଲି କୁହନ୍ତି ସେ।
ଇଞ୍ଜିନିୟର ମିହିରଙ୍କ ଘର ବାହାନଗା ବ୍ଲକ ଇଛାପୁର ଗ୍ରାମରେ। ବିଭିନ୍ନ ପ୍ରକଳ୍ପ ଉଦ୍ଭାବନ ସହ ନିଜ ଗ୍ରାମରେ ‘ସ୍ରୋଷ୍ଟି’ (ସୋସିଆଲ ଡେଭଲପମେଣ୍ଟ ରିସର୍ଚ୍ଚ ଅର୍ଗାନାଇଜେଶନ ଫର ସାଇନ୍ସ, ଟେକ୍ନୋଲୋଜି ଆଣ୍ଡ ଇମ୍ପି୍ଲମେଣ୍ଟେଶନ) ନାମରେ ଏକ ଗବେଷଣା ଅନୁଷ୍ଠାନ ଗଢିିଛନ୍ତି । ଏଭଳି କୃତିତ୍ୱ ଲାଗି ସେ ୨୦୧୯ରେ ଭାରତୀୟ ବିଜ୍ଞାନ କଂଗ୍ରେସରେ ସମ୍ମାନିତ ହେବା ସହିତ ଏହି ଆସୋସିଏଶନରେ ସ୍ଥାନିତ ହୋଇଛନ୍ତି। ଥୋମାସ ଆଲଭା ଏଡିଶନ ଅଫ ଇଣ୍ଡିଆ ଦ୍ୱାରା ସେ ପୁରସ୍କୃତ ହୋଇଛନ୍ତି ା ତେବେ ଏସବୁ ପୁରସ୍କାର ପାଇ ସାରିବା ପରେ ସେ ଲିମ୍କା ବୁକ ଅଫ ରେକର୍ଡସରେ ସ୍ଥାନ ପାଇବା ପାଇଁ ଆବେଦନ କରିଥିଲେ। ଆବେଦନର ୮ମାସ ଭିତରେ ଏହି ରେକର୍ଡ଼ସରେ ସ୍ଥାନ ପାଇଥିଲେ। ୨୦୦୦ ମସିହାରୁ ସେ ଲୋକଙ୍କ ପାଇଁ ବିଜ୍ଞାନର ନୂତନ ଧାରା ଉଦ୍ଭାବନ କରିବାରେ ଲାଗିଥିଲେ। ୨୦୦୫ରେ ସାଧାରଣ ଚାଷୀ ଓ ଲୋକଙ୍କ ପାଇଁ ବିଭିନ୍ନ ପ୍ରକଳ୍ପ ପ୍ରସ୍ତୁତ କରିଥିଲେ। ତାଙ୍କ ମୁଖ୍ୟ ଉଦ୍ଭାବନ ମଧ୍ୟରେ ଫ୍ୟାନ୍ ଜେନେରେଟର, ଚାଷୀଙ୍କ ପାଇଁ ଡବଲ ଫେସ୍ ଉଇନୋଉଇଙ୍ଗ ଫ୍ୟାନ୍, ଡୁଆଲ ଫେସ୍ ଫ୍ୟାନ, ଗୃହ ଓ କୃଷିରେ ଲାଗୁଥିବା ବହୁମୁଖୀ ଯନ୍ତ୍ର, ମୋନାଲିସା ଶୀତଳ ଅଖା, ଯଶୋବନ୍ତ ପତ୍ର କଟା ଯନ୍ତ୍ର , ବିଦ୍ୟୁତ ରଙ୍ଗ ବ୍ରସ୍, ହସ୍ତଚାଳିତ ହାଲୁକା ପାଣିପମ୍ପ, ଫ୍ୟାନରେ ଦୁଇ ଆଡକୁ (ଆଗ ପଛ)କୁ ପବନ ବୋହିବା, ନଳକୂପରେ ପାଣି ବାହାରିବା ସହିତ ନଳକୂପ ମୋଡିଲେ ଲୁଗା କିପରି ସଫା କରିହେବ ତାହା ମଧ୍ୟ ଉଦ୍ଭାବନ କରିଛନ୍ତି।
ବିନା ବିଜୁଳିରେ ଚାଲୁଥିବା ଥଣ୍ଡା ପାଣିପାତ୍ର ଆଦି ୧୦ହଜାରରୁ ଅଧିକ ନୂତନ ବିଜ୍ଞାନ ପ୍ରକଳ୍ପ ପ୍ରସ୍ତୁତ କରିଛନ୍ତି ା ସେ ଭାରତ ସମେତ ବିଶ୍ୱର ବହୁ ସ୍ଥାନକୁ ଯାଇ ବିଦ୍ୟାଳୟ ଛାତ୍ରୀଛାତ୍ରଙ୍କୁ ବିଭିନ୍ନ ପ୍ରକଳ୍ପ ବିଷୟରେ ପ୍ରଶିକ୍ଷଣ ଦେଇଥାନ୍ତି। ପିଲାମାନଙ୍କୁ ପାଠ ପଢାଉଥିବା ବେଳେ ସେମାନଙ୍କ ବିଜ୍ଞାନ ସମ୍ବନ୍ଧୀୟ ପ୍ରଶ୍ନର ଉତ୍ତର ଖୋଜିବାକୁ ଯାଇ ସେ ସରଳୀକରଣ କରି ବୁଝାଇବା ପାଇଁ ଚେଷ୍ଟା କରିଥାନ୍ତି। ଏହି ଉଦ୍ୟମ ତାଙ୍କୁ ନୂତନ ବିଜ୍ଞାନ ପ୍ରକଳ୍ପ ଉଦ୍ଭାବନ କରିବାକୁ ପ୍ରେରଣା ଦେବା ସହ ଆଜି ଜଣେ ସଫଳ ବୈଜ୍ଞାନିକ ଭାବେ ଗଢିତୋଳିଛି। ଦେଶବିଦେଶର ବିଭିନ୍ନ ଅନୁଷ୍ଠାନରୁ ୨୫୦ ପୁରସ୍କାରର ଅଧିକାରୀ ଏହି ବ୍ୟକ୍ତିତ୍ୱ ବିଜ୍ଞାନ ଦୁନିଆ ଲାଗି ଏକ ନୂତନ ସମ୍ଭାବନା ।
(ଅରୂପ ଦାସ)
